ఐఐటీ హైదరాబాద్‌ అద్భుత సృష్టి

ఐఐటీ హైదరాబాద్ | లక్ట్రిక్‌ వాహనాల్లో (ఈవీల్లో) విరివిగా వినియోగిస్తున్న లెడ్‌ యాసిడ్‌, లిథియం-అయాన్‌ బ్యాటరీలకు ప్రత్యామ్నాయంగా 5వీ డ్యూయల్‌ కార్బన్‌ బ్యాటరీని ఐఐటీ హైదరాబాద్‌ కెమిస్ట్రీ విభాగ పరిశోధన బృందం ఆవిష్కరించింది.

April 6, 2021 / 07:00 AM IST

లిథియం బ్యాటరీ కంటే మెరుగైన బ్యాటరీ ఆవిష్కరణ
పర్యావరణ అనుకూలం, ఖర్చు 25% తక్కువే
ఎలక్ట్రిక్‌ వాహనదారులకు ఎంతో లబ్ధి

హైదరాబాద్‌, ఏప్రిల్‌ 5 (నమస్తే తెలంగాణ): ఆధునిక సాంకేతిక ఆవిష్కరణల్లో దేశానికే ఆదర్శంగా నిలుస్తున్న హైదరాబాద్‌ మరో అద్భుత ఆవిష్కరణకు వేదికగా నిలిచింది. ఎలక్ట్రిక్‌ వాహనాల్లో (ఈవీల్లో) విరివిగా వినియోగిస్తున్న లెడ్‌ యాసిడ్‌, లిథియం-అయాన్‌ బ్యాటరీలకు ప్రత్యామ్నాయంగా 5వీ డ్యూయల్‌ కార్బన్‌ బ్యాటరీని ఐఐటీ హైదరాబాద్‌ కెమిస్ట్రీ విభాగ పరిశోధన బృందం ఆవిష్కరించింది. అనేక విశిష్ఠతలు కలిగిన ఈ బ్యాటరీ.. లిథియం-అయాన్‌ బ్యాటరీ కంటే ఇది ఎంతో మెరుగైనది, చవకైనది, పర్యావరణ అనుకూలమైనది కావడం విశేషం. అనేక సెల్‌ల సమాహారమైన లిథియం-అయాన్‌ బ్యాటరీని తయారు చేయడం చాలా సంక్లిష్టమైన వ్యవహారం.

అందులోని ఏ ఒక్క సెల్‌లో సమస్య ఏర్పడినా అది మొత్తం బ్యాటరీ చార్జింగ్‌పై ప్రభావం చూపుతుంది. లేదంటే మొత్తంగా బ్యాటరీనే పనిచేయకుండా మొరాయిస్తుంది. దీన్ని మరమ్మతు చేయడం కూడా సవాళ్లతో కూడినదే. మరోవైపు లిథియం-అయాన్‌ బ్యాటరీల్లో వినియోగించే కోబాల్ట్‌, మాంగనీస్‌, నికెల్‌ లాంటి విషపూరితమైన లోహాల వల్ల పర్యావరణానికి హాని జరుగుతుంది. కానీ 5వీ డ్యూయల్‌ కార్బన్‌ బ్యాటరీలో ఇలాంటి విషపూరితాలేవీ ఉండవు. అంతేకాకుండా లిథియం బ్యాటరీ తయారీకి అయ్యే ఖర్చు కంటే దాదాపు 25 శాతం తక్కువ ఖర్చుతోనే దీన్ని రూపొందిచామని, 100 వాట్ల ఓల్టేజీని కలిగి ఉండే ఈ బ్యాటరీని ఈవీకి అమర్చితే గంటపాటు ప్రయాణించవచ్చని పరిశోధక బృందం వెల్లడించింది. అధిక శక్తితో నడిచే వైద్యపరికాలు, స్టేషనరీ గ్రిడ్స్‌, బ్రేకింగ్‌ సిస్టమ్స్‌కు 5వీ డ్యూయల్‌ కార్బన్‌ బ్యాటరీ ఎంతో అనువుగా ఉంటుందని తెలిపింది.

లిథియం బ్యాటరీకి సరైన ప్రత్యామ్నాయం..

ఈవీలకు సంబంధించిన విడిభాగాలతోపాటు, వాటిని మరమ్మతు చేసే నిపుణుల కొరత చాలానే ఉంది. లిథియం-అయాన్‌ బ్యాటరీ అనేక సంక్లిష్టతలతో కూడినది కావడంతో ఈవీ అమ్మకాలపై ప్రభావం చూపుతున్నది. ఈ ప్రధాన సమస్యను అధిగమించడంలో భాగంగానే మేం డ్యూయల్‌ కార్బన్‌ బ్యాటరీని ఆవిష్కరించాం. ఇది లిథియం బ్యాటరీకి సరైన ప్రత్యామ్నాయం. దీని ద్వారా ఎన్నో సమస్యలకు పరిష్కారం లభించడంతోపాటు ఎలక్ట్రిక్‌ వాహనదారులకు ఎంతో లబ్ధి చేకూరుతుంది.