Google | గూగుల్‌కు ఉద్యోగులు జై.. ఉద్యోగులను ఆకర్శిస్తున్న టాప్‌-10 సంస్థలు

ప్రముఖ ఇంటర్నెట్‌ సర్చ్‌ ఇంజిన్‌ గూగుల్‌ మరోసారి సత్తాచాటింది. దేశవ్యాప్తంగా ఉద్యోగులపై నిర్వహించిన సర్వేలో అత్యధిక మంది ఆకర్షణీయమైన సంస్థల్లో గూగుల్‌ తొలివరుసలో నిలిచింది.

న్యూఢిల్లీ, ఆగస్టు 5 : ప్రముఖ ఇంటర్నెట్‌ సర్చ్‌ ఇంజిన్‌ గూగుల్‌ మరోసారి సత్తాచాటింది. దేశవ్యాప్తంగా ఉద్యోగులపై నిర్వహించిన సర్వేలో అత్యధిక మంది ఆకర్షణీయమైన సంస్థల్లో గూగుల్‌ తొలివరుసలో నిలిచింది. రాండ్‌స్టాడ్‌ ఎంప్లాయిర్‌ బ్రాండ్‌ రీసర్చ్‌(ఆర్‌ఈబీఆర్‌) 2026 పేరుతో నిర్వహించిన సర్వేలో అత్యధిక మంది ఉద్యోగులు తమకు గూగుల్‌ ఆకర్షణీయమైన సంస్థ అని స్పష్టంచేశారు.

ఆ తర్వాత స్థానాల్లో టాటా గ్రూపు, అమెజాన్‌లు నిలిచాయి. ప్రపంచవ్యాప్తంగా 1.75 లక్షల మందితోపాటు భారత్‌ నుంచి 3,500 మంది ఉద్యోగుల నుంచి సేకరించిన సమాచారం ఆధారంగా ఈ నివేదికను రూ పొందించింది. ఈ సందర్భంగా రాండ్‌స్టాడ్‌ ఇండియా ఎండీ నారాయణ్‌ అయ్యర్‌ మాట్లాడుతూ..సర్వేలో పాల్గొన్న మొత్తం ఉద్యోగుల్లో సగం మంది వచ్చే ఆరు నెలల్లో తమ కెరియర్‌ను మార్చుకోవాలని చూస్తున్నారన్నారు. భారత్‌లో ఉద్యోగ భద్రతకు నమ్మదగిన వేతనం, ప్రయోజనాలతోపాటు పనితీరుకు గుర్తింపు, వృత్తిపరమైన కొనసాగింపు అనేవి అత్యంత బలమైన పునాదులని చెప్పారు.

ఉద్యోగులను ఆకర్శిస్తున్న టాప్‌-10 సంస్థలు..

• గూగుల్‌
• టాటా గ్రూపు
• అమెజాన్‌
• సామ్‌సంగ్‌ ఇండియా
• ఇన్ఫోసిస్‌
• రిలయన్స్‌ ఇండస్ట్రీస్‌
• ఐటీసీ గ్రూపు
• హిందుస్థాన్‌ యూనిలీవర్‌
• మహీంద్రా అండ్‌ మహీంద్రా
• డెల్‌ టెక్నాలజీ లిమిటెడ్‌

ఇతర ముఖ్యాంశాలు..

• ఉద్యోగ ఎంపికను ప్రభావితం చేసే అంశాల్లో పని-జీవిత సమతుల్యత(60 శాతం) అగ్రస్థానంలో కొనసాగుతున్నది. ఆ తర్వాత స్థానాల్లో సమాన అవకాశాలు(59శాతం), కెరియర్‌ వృద్ధి(55 శాతం) ఉన్నాయి.
• దేశంలో 46 శాతం మంది ఉద్యోగులు వచ్చే ఆరు నెలల్లో ఉద్యోగం మారాలని యోచిస్తున్నారు. గత ఆరు నెలల్లో 32 శాతం మంది సంస్థను వీడి ఇతర కంపెనీల్లో చేరారు.
• ప్రస్తుతం హైబ్రిడ్‌ వర్క్‌ విధానం ప్రాధాన్యత కలిగిన నమూనాగా మారింది. 2026 చివరి నాటికి పూర్తి రిమోట్‌ వర్క్‌ 18 శాతానికి తగ్గనున్నది.
• పనితీరు గుర్తింపు, కెరియర్‌ కొనసాగింపు, పారదర్శకమైన సమాచార మార్పిడి అనేవి ఉద్యోగ భద్రతకు అత్యంత బలమైన చోదకాలు.
• డిజిటల్‌ రంగ నిపుణుల పోటీతత్వ జీతభత్యాలు, కెరియర్‌ వృద్ధి అవకాశాలకు అత్యధిక ప్రాధాన్యత ఇవ్వనున్నారు.