Bailout | తీసుకున్నది 8,100 కోట్లు.. ఇచ్చేది 2,400 కోట్లే.. కాంగ్రెస్‌ నేత కంపెనీకి 5,700 కోట్ల రుణ మాఫీ!

గాయత్రి ప్రాజెక్ట్స్‌ బెయిలౌట్‌తో బీజేపీ-కాంగ్రెస్‌ బంధం మరోసారి బట్టబయలైంది. అధికారం ఎవరిదైనా అంతిమంగా మనదే రాజ్యం అన్నట్టు ఈ సంప్రదాయ రాజకీయ ప్రత్యర్థుల మధ్య లోపాయికారి ఒప్పందాలు నడుస్తున్నాయి. ఓ కాంగ్రెస్‌ సీనియర్‌ నేత ప్రమోట్‌ చేస్తున్న గాయత్రి ప్రాజెక్ట్స్‌..

• గాయత్రి ప్రాజెక్ట్స్‌ రుణ బకాయిలు సెటిల్మెంట్‌
• బ్యాంకుల రికవరీ 30 శాతమే
• ఆర్థిక ఇబ్బందుల్లో ఉన్నా రూ.వేల కోట్ల ప్రాజెక్టుల్ని కట్టబెట్టిన కేంద్రం
• ఎన్‌డీఏ సర్కారు అడ్డగోలు నిర్ణయాలతో ఆగిన పనులు
• బట్టబయలైన బీజేపీ-కాంగ్రెస్‌ బంధం
• బయట కుస్తీ.. లోపల దోస్తీ.. అన్నట్టు సాగుతోంది బీజేపీ-కాంగ్రెస్‌ బంధం.

కాంగ్రెస్‌ పార్టీకి చెందిన ఓ సీనియర్‌ నేత కంపెనీకి సర్కారీ బ్యాంకులు వేల కోట్ల రూపాయల రుణాలను మాఫీ చేశాయి. అవును.. గాయత్రి ప్రాజెక్ట్స్‌ రుణాల సెటిల్మెంట్‌ సారాంశం ఇదే.

తీసుకున్న అప్పులు రూ.8,100 కోట్లుగా ఉంటే.. ఇస్తామని ఒప్పుకున్నది రూ.2,400 కోట్లే. దీంతో బ్యాంకులు రూ.5,700 కోట్లు వదులుకోవాల్సి వస్తున్నది. ఇక ఆర్థిక ఇబ్బందుల్లో కంపెనీ ఉన్న విషయం తెలిసినా భారీ ఎత్తున మోదీ సర్కారు ప్రాజెక్టుల్ని కట్టబెట్టింది.

Bailout | హైదరాబాద్‌, సెప్టెంబర్‌ 24 : గాయత్రి ప్రాజెక్ట్స్‌ బెయిలౌట్‌తో బీజేపీ-కాంగ్రెస్‌ బంధం మరోసారి బట్టబయలైంది. అధికారం ఎవరిదైనా అంతిమంగా మనదే రాజ్యం అన్నట్టు ఈ సంప్రదాయ రాజకీయ ప్రత్యర్థుల మధ్య లోపాయికారి ఒప్పందాలు నడుస్తున్నాయి. ఓ కాంగ్రెస్‌ సీనియర్‌ నేత ప్రమోట్‌ చేస్తున్న గాయత్రి ప్రాజెక్ట్స్‌.. బ్యాంకులకు రూ.8,100 కోట్లు బకాయిపడి చేతులెత్తేసింది. ఈ లోన్లను వసూలు చేసుకునేందుకు నానా తంటాలు పడిన బ్యాంకర్లు.. చేసేదేమీ లేక న్యాయ పోరాటానికీ దిగారు. ఏండ్లు గడిచాక మేము ఇంతే ఇవ్వగలమని యాజమాన్యం చెప్పడం.. అదే మహాభాగ్యం అన్నట్టు బ్యాంకులు అంగీకరించడం.. చకచకా జరిగిపోయాయి. చివరకు చూస్తే బ్యాంకులకు వాటిల్లిన నష్టం రూ.5,700 కోట్లు. సామాన్యులు పైసా ఎగ్గొట్టినా ఊరుకోని బ్యాంకర్లు.. చిన్న-సన్నకారు రైతులకు రూపాయి రుణాన్ని కూడా మాఫీ చేయని అదే బ్యాంకర్లు.. కార్పొరేట్లకు మాత్రం వేల కోట్ల రుణాలను వదిలేస్తున్నారు. ఇంత జరుగుతున్నా ప్రభుత్వ పెద్దలు చేష్టలుడిగే చూస్తున్నారు.

ఇదీ సంగతి..

గాయత్రి ప్రాజెక్ట్స్‌ రుణ బకాయిల సెటిల్మెంట్‌కు గత వారం నేషనల్‌ కంపెనీ లా ట్రిబ్యునల్‌ (ఎన్‌సీఎల్‌టీ) హైదరాబాద్‌ ధర్మాసనం ఆమోదం తెలిపింది. ప్రభుత్వ రంగ బ్యాంకింగ్‌ సంస్థలైన కెనరా, బీవోబీ, పీఎన్‌బీ తదితర బ్యాంకుల నుంచి గాయత్రి ప్రాజెక్ట్స్‌ రూ.8,100 కోట్ల లోన్లు తీసుకుని ఎగవేసింది. కెనరా బ్యాంక్‌ రుణం వాటానే 24 శాతానికి సమానం. తర్వాత బీవోబీ (18%), పీఎన్‌బీ, ఐడీబీఐ బ్యాంక్‌ (11% చొప్పున)లున్నాయి. కాగా, రూ.2,400 కోట్ల వన్‌-టైం సెటిల్మెంట్‌ ప్లాన్‌తో ప్రమోటర్లు ముందుకు రాగా, దీనికి 97 శాతం బ్యాంకర్లు అంగీకరించారు. దీంతో చెల్లింపులకు ఎన్‌సీఎల్‌టీ 90 రోజుల గడువిస్తూ కేసును సెటిల్‌ చేసేసింది. రికవరీ రేటు 30 శాతమే.

అమ్ముడుపోని ఆస్తులు

గాయత్రి ప్రాజెక్ట్స్‌ రుణాలు తీసుకున్నప్పుడు బ్యాంకుల వద్ద తనఖా పెట్టిన ఆస్తుల్ని కొనేవారే కరువయ్యారు. 2022 నవంబర్‌ నుంచి 2023 డిసెంబర్‌ వరకు బయ్యర్‌ కోసం బ్యాంకులు అన్వేషించినా ఫలితం శూన్యం. 2024 జనవరిలో తనఖా పెట్టిన ఆస్తుల విక్రయానికి బ్యాంకులు సిద్ధమవగా, రూ.474 కోట్లతో ప్రభుత్వ రంగ నేషనల్‌ అసెట్‌ రీకన్‌స్ట్రక్షన్‌ కంపెనీ లిమిటెడ్‌ ముందుకొచ్చింది. అయితే ఈ ఆఫర్‌ను బ్యాంకులు తిరస్కరించాయి. చివరకు బ్యాంకులు, గాయత్రి ప్రాజెక్ట్స్‌ ప్రమోటర్ల మధ్య సంప్రదింపులు సఫలం అవగా, రుణ చెల్లింపుల్లో భాగంగా తనఖా పెట్టిన దాదాపు 13 ఆస్తుల్లో ఏడింటిని అమ్మేందుకు గాయత్రి ప్రాజెక్ట్స్‌కు బ్యాంకులు అప్పగిస్తున్నాయి. ఇక రీ-పేమెంట్‌ ప్లాన్‌ కింద ప్రమోటర్ల నుంచి బ్యాంకులకు రూ.750 కోట్లు రానున్నాయి. మరో రూ.450 కోట్లు కంపెనీకున్న ఆర్బిట్రేషన్‌ క్లెయిముల బకాయిల ద్వారా రానుండగా, బ్యాంకుల వద్ద ఇప్పటికే రూ.160 కోట్లను డిపాజిట్‌, గ్యారంటీ కమీషన్లుగా గాయత్రి ప్రాజెక్ట్స్‌ పెట్టింది. ఆస్తుల అమ్మకం, మదుపరుల నుంచి నిధుల సమీకరణల ద్వారా మిగతా నగదు చెల్లింపులు (రూ.1,040 కోట్లు) జరుగనున్నాయి.

మోదీ సర్కారు హయాంలో..

2015లోనే గాయత్రి ప్రాజెక్ట్స్‌ను ఆర్థిక, న్యాయపరమైన ఇబ్బందులు చుట్టుముట్టినట్టు చెప్తున్నారు. అయినప్పటికీ అప్పుల ఊబిలో కొట్టుమిట్టాడుతున్న ఆ సంస్థకు మోదీ సర్కారు పెద్ద ఎత్తున వివిధ రంగాల్లో ప్రాజెక్టులను కట్టబెట్టడం గమనార్హం. దీంతో కాంగ్రెస్‌ అవినీతిపై గట్టిగా ఆరోపణలు చేసే బీజేపీ అగ్ర నేతలు.. తమకు అనుకూలంగా ఉంటే పార్టీలకతీతంగా మైత్రిని కొనసాగిస్తామని చెప్పకనే చెప్పారు. అయితే కేంద్రం తీసుకున్న అడ్డగోలు నిర్ణయాలు.. పలు కీలక ప్రాజెక్టులకు అర్ధాంతరంగా ఆగిపోయే పరిస్థితుల్ని తెచ్చిపెట్టాయి. ఇందుకు ఉదాహరణగా హైదరాబాద్‌లోని ఉప్పల్‌-నారపల్లి ఫ్లైఓవర్‌నే చెప్పుకోవచ్చు. జాతీయ రహదారి 163పై చేపట్టిన ఈ నిర్మాణం బాధ్యతల్ని 2018లో రూ.425 కోట్లకు గాయత్రి గెల్చుకున్నది. కానీ మధ్యలోనే ఆగిపోయింది. దీనిపై సర్వత్రా విమర్శలు వస్తున్నా.. కాంట్రాక్టర్‌ను మార్చాలని డిమాండ్లున్నా కేంద్ర ప్రభుత్వం పట్టించుకోలేదు. పైగా ఈ ఏడాది మే నెలలో ఫ్లైఓవర్‌ను 10 నెలల్లో పూర్తి చేస్తామంటూ పరోక్షంగా గాయత్రీకి సంబంధిత కేంద్ర మంత్రి మద్దతివ్వడం విశేషం. ఇలా దివాలా తీసిన సంస్థకు ఎన్‌హెచ్‌ఏఐ నుంచి అనేక ప్రాజెక్టులు వచ్చాయి. అంతేగాక ఏపీ, తెలంగాణ, కర్ణాటక రాష్ర్టాల్లో పలు నీటిపారుదల ప్రాజెక్ట్‌లనూ మోదీ సర్కారు అందించింది. కేవలం ఆరేండ్లలోనే రూ.20వేల కోట్లకుపైగా ప్రాజెక్టులను సొంతంగా, ఆయా సంస్థలతో కలిసి గాయత్రీ ప్రాజెక్ట్స్‌ సంస్థ పొందింది.

2015-2021 మధ్య గాయత్రికి దక్కిన ప్రాజెక్టులు

2015లో

ఉత్తరప్రదేశ్‌ (ఘాగ్రా-వారణాసి, సుల్తాన్‌పూర్‌-వారణాసి)లో రూ.3,318 కోట్ల జాతీయ రహదారుల ప్రాజెక్టు

రూ.675 కోట్ల ఈస్టర్న్‌ పెరిఫెరల్‌ ఎక్స్‌ప్రెస్‌వే (ప్యాకేజీ 6)

2016లో

చిత్తూరు ప్రాంతంలోని రూ.306 కోట్ల విలువైన 4 లైనింగ్‌ హైవై ప్రాజెక్ట్‌

2018లో

• రూ.1,483 కోట్ల పూర్వాంచల్‌ ఎక్స్‌ప్రెస్‌వే ప్యాకేజీ 1 (చాంద్‌ సరాయి-సన్సారా)
• రూ.1,276 కోట్ల పూర్వాంచల్‌ ఎక్స్‌ప్రెస్‌వే ప్యాకేజీ 2 (సన్సారా-జరైకాల)
• రూ.583 కోట్ల ఎన్‌హెచ్‌ఏఐ కటక్‌-అంగుల్‌ ప్యాకేజీ 1
• రూ.529 కోట్ల ఎన్‌హెచ్‌ఏఐ కటక్‌-అంగుల్‌ ప్యాకేజీ 2
• రూ.425 కోట్ల ఉప్పల్‌-నారపల్లి ఎలివేటెడ్‌ కారిడార్‌
• రూ.1,139 కోట్ల భారత్‌మాల/ 4 లేన్‌ హైవే ప్యాకేజీ

2019లో

• రూ.1,312 కోట్ల నాగ్‌పూర్‌-ముంబై ఎక్స్‌ప్రెస్‌వే (షిర్డీ సెక్షన్‌)
• రూ.1,339 కోట్ల జమ్ము రింగ్‌ రోడ్‌
• రూ.493 కోట్ల ఖంబాటకీ ఘాట్‌ టన్నెల్‌ (సతరా, మహారాష్ట్ర)
• రూ.340 కోట్ల దిమపూర్‌-కోహిమా రోడ్‌ ప్యాకేజీ (నాగాలాండ్‌)
• చింతలపూడి, కెంప్వాడ్‌ లిఫ్ట్‌ ఇరిగేషన్‌ సహా పలు సాగునీటి ప్రాజెక్టులు

2020లో

• రూ.1,323 కోట్ల రోడ్డు నిర్మాణ పనులు

2021లో

• రూ.2,485 కోట్ల జల్‌ జీవన్‌ మిషన్‌ నీటి పంపిణీ ప్రాజెక్టులు
• కర్ణాటక, ఆంధ్రప్రదేశ్‌ రాష్ర్టాల్లో వందల కోట్ల రూపాయల విలువైన పలు సాగునీటి, లిఫ్ట్‌ ఇరిగేషన్‌ ప్రాజెక్టులు

తనఖా పెట్టిన ఆస్తుల్లో..

• తనఖాలో ఫిక్స్‌డ్‌ అసెట్స్‌, కరెంట్‌ అసెట్స్‌తోపాటు గాయత్రి ప్రాజెక్ట్స్‌, దాని అనుబంధ సంస్థల వాటాలున్నాయి
• ఫిక్స్‌డ్‌ ఆస్తుల్లో ప్లాంట్లు, మెషినరీలు, ఇన్సూరెన్స్‌ కాంట్రాక్టులు
• కరెంట్‌ ఆస్తుల్లో ఇన్వెంటరీ, కన్‌స్ట్రక్షన్‌ మెటీరియల్స్‌, బుక్‌ డెబ్ట్స్‌
• గాయత్రి ఎనర్జీ వెంచర్స్‌ ప్రైవేట్‌ లిమిటెడ్‌, భండారా థర్మల్‌ పవర్‌ కార్పొరేషన్‌ లిమిటెడ్‌ ఈక్విటీ షేర్లు
• గాయత్రి హైటెక్‌ హోటల్స్‌ లిమిటెడ్‌

ప్రిఫరెన్స్‌ షేర్లు

• ప్రమోటర్లకు చెందిన కొన్ని వ్యక్తిగత ఆస్తులతోపాటు వ్యక్తిగత పూచీకత్తులు
• 2015 నుంచే తీసుకున్న రుణాలు చెల్లించలేక ఇబ్బందులుపడ్డ గాయత్రి ప్రాజెక్ట్స్‌
• రుణాల వసూళ్ల కోసం కంపెనీ తమవద్ద తనఖా పెట్టిన షేర్లను బహిరంగ మార్కెట్‌లో అమ్మేసిన కొన్ని బ్యాంకులు
• కంపెనీ దివాలా తీయడంతో ఆగిపోయిన షేర్ల ట్రేడింగ్‌
• ఇండోర్‌ దివాస్‌ టోల్‌వేస్‌, అనుబంధ సంస్థ సాయి మాత్రేయిని టోల్‌వేస్‌ వంటి నష్టదాయక ప్రాజెక్టులకూ గ్యారంటీలిచ్చిన గాయత్రి ప్రాజెక్ట్స్‌. బ్యాంకుల బకాయిల్లో ఇవీ భాగమే
• పెండింగ్‌ ఆర్బిట్రేషన్‌ క్లెయిములతో ఈ రెండు టోల్‌వేస్‌ ప్రాజెక్టులకు అనుమతుల్ని రద్దు చేసిన ఎన్‌హెచ్‌ఏఐ