Vehicles sales : జూలై నెలలో పెరిగిన వాహనాల డిమాండ్‌

Vehicles sales : గత నెలలో వాహానాల అమ్మకాలు (Vehicles sales) అమాంతం పెరిగిపోయాయి. ముఖ్యంగా కమర్షియల్‌ వాహనాలు ఎక్కువగా అమ్ముడుపోయాయి. జూలై నెలలో ప్యాసింజర్ వాహనాలు, ద్విచక్ర వాహనాలతోపాటు అన్ని విభాగాల్లో గణనీయమైన పెరుగుదల కనిపించింది.

August 9, 2021 / 05:24 PM IST

Vehicles sales : జూలై నెలలో పెరిగిన వాహనాల డిమాండ్‌

న్యూఢిల్లీ : సొంత కారు, బైకును కొనుక్కోవాలని సాధారణంగా ప్రతి ఒక్కరూ కోరుకుంటుంటారు. ఈ కోరికలే కార్ల విక్రయాలు పెరిగేందుకు దోహదపడుతున్నాయి. గత నెలలో వాహానాల అమ్మకాలు (Vehicles sales) అమాంతం పెరిగిపోయాయి. ముఖ్యంగా కమర్షియల్‌ వాహనాలు ఎక్కువగా అమ్ముడుపోయాయి. జూలై నెలలో ప్యాసింజర్ వాహనాలు, ద్విచక్ర వాహనాలతోపాటు అన్ని విభాగాల్లో గణనీయమైన పెరుగుదల కనిపించింది. అలాగే, వాహనాల రిజిస్ట్రేషన్లలో వార్షిక ప్రాతిపదికన 34.12 శాతం పెరుగుదల ఉన్నది. గత నెలలో దేశవ్యాప్తంగా మొత్తం 15,56,777 వాహనాలు అమ్ముడవగా.. గత ఏడాది ఇదే నెలలో 11,60,721 యూనిట్లుగా ఉన్నది.

ఫెడరేషన్‌ ఆఫ్‌ ఆటోమొబైల్‌ డీలర్స్‌ అసోసియేషన్‌ (ఎఫ్‌ఏడీఏ) తెలిపిన వివరాల ప్రకారం, గత నెలల కమర్షియల్‌ వాహనాలు 52,130 అమ్ముడుపోయాయి. ఇది వార్షిక ప్రాతిపదికన 165.94 శాతం పెరుగుదలగా ఉన్నది. గత ఏడాది ఇదే నెలలో ఈ సంఖ్య 19,602 గా ఉన్నది. అయితే, 2019 జూలై నెల అమ్మకాలతో పోలిస్తే ఇది 24.84 శాతం తక్కువ. రెండేండ్ల క్రితం ఈ క్యాటగిరిలో 69,361 వాహనాల అమ్మకాలు జరిగాయి. మూడు చక్రాల వాహనాల అమ్మకాల్లో కూడా వృద్ధి నమోదైంది. జూలై నెలలో 83 శాతం కంటే ఎక్కువ వృద్ధి కనిపించింది. గత నెలలో మొత్తం 27,904 వాహనాలతో 83.05 శాతం వార్షిక వృద్ధి నమోదైంది. 2020 జూలైలో ఈ సంఖ్య 15,244. రెండేండ్ల క్రితంతో పోలిస్తే ఆటోల అమ్మకాలు సగానికి తక్కువగా ఉన్నాయి. జూలై 2019 లో 58,943 యూనిట్ల ఆటోలు నమోదయ్యాయి.

టూ వీలర్స్‌ ఎక్కువగా.. ట్రాక్టర్లు తక్కువగా..

జూలై నెలలో టూ వీలర్స్‌ కొనుగోలులో కూడా విపరీతమైన పెరుగుదల ఉన్నది. 2021 జూలైలో 11,32,611 బైకులు నమోదవగా.. గత సంవత్సరం ఇదే నెలలో 8,87,937 యూనిట్లుగా ఉన్నది. అంటే, బైకుల అమ్మకాల్లో 27.56 శాతం పెరుగుదల కనిపించింది. అయితే, ట్రాక్టర్ల కొనుగోళ్లు మందకోడిగా సాగుతున్నాయి. గత నెలలో 82,388 యూనిట్లుగా ఉండగా, గత ఏడాది ఇదే నెలలో 77,257. జూన్‌ నెలలో 14 శాతం వార్షిక వృద్ధి ఉండగా, జూలైలో అది 6.64 శాతానికి పరిమితమైంది.