Visit:
EverGrande | చైనా రియల్ ఎస్టేట్ సంస్థ ‘ఎవర్ గ్రాండే (Evergrande)’కు హాంకాంగ్ కోర్టు గట్టి షాక్ ఇచ్చింది. పునర్వ్యవస్థీకరణ ప్రణాళికల ప్రకారం రుణ దాతలకు వాయిదాల చెల్లింపులో విఫలమైనందున సంస్థను లిక్విడేట్ (Liquidate) చేయాలని సోమవారం ఆదేశించింది. రుణ దాతల పునర్వ్యవస్థీకరణ ప్రణాళిక అమలు చేయలేకపోవడంతోపాటు దివాళా దిశగా అడుగులేస్తున్న ఎవర్ గ్రాండే సంస్థను మూసేయడం మంచిదని పేర్కొంటూ కోర్టు న్యాయమూర్తి లిండా చాన్ ఆదేశాలు జారీ చేశారు.
ఎవర్ గ్రాండే లిక్విడేషన్కు జారీ చేసిన ఆదేశాలతో చైనా ఆర్థిక వ్యవస్థపై ప్రతికూల ప్రభావం చూపే అవకాశం ఉంది. చైనా స్టాక్ మార్కెట్లో వివిధ సంస్థల స్టాక్స్ పై అమ్మకాల ఒత్తిళ్లు పెరుగుతాయని భావిస్తున్నారు. ఎవర్ గ్రాండే లిక్విడేషన్ ప్రక్రియ చేపడితే చైనాలో రియాల్టీ రంగం బిజినెస్ మీద విశ్వాసం సన్నగిల్లే అవకాశం ఉందని చెబుతున్నారు. 300 బిలియన్ డాలర్ల అప్పులపై కొత్త రుణాల పునర్వ్యవస్థీకరణ ప్రణాళిక కోసం ప్రయత్నిస్తున్నట్లు ఎవర్ గ్రాండే తెలిపారు. అయితే, క్రెడిటర్ల తరపున విచారణకు హాజరైన న్యాయవాది పెర్గస్ సౌరిన్ స్పందిస్తూ ఎవర్ గ్రాండే వాదన ఆశ్చర్యకరంగా లేదన్నారు. ఎవర్ గ్రాండే మూసివేతకు దారి తీసిన పరిస్థితులపై ఆ సంస్థ యాజమాన్యమే బాధ్యత వహించాల్సి ఉంటుందన్నారు. హాంకాంగ్ కోర్టు తీర్పు నేపథ్యంలో ఎవర్ గ్రాండే స్టాక్స్ 20 శాతానికి పైగా నష్టపోయాయి. ఫలితంగా కొంత సేపు హాంకాంగ్ స్టాక్ ఎక్స్చేంజీలో కొంత సేపు ట్రేడింగ్ నిలిపేశారు.
చైనాలోని రియాల్టీ రంగంలో రుణాలు అదుపు తప్పాయి. వాటి నియంత్రణతోపాటు రియాల్టీ రంగాన్ని క్రమబద్ధీకరించేందుకు చైనా రెగ్యులేటరీ సంస్థలు కఠినమైన నిబంధనలు తెచ్చాయి. ఫలితంగా ఎవర్ గ్రాండే సహా పలు రియాల్టీ సంస్థలు ఆర్థికపరమైన చిక్కుల్లో పడ్డాయి. 2021లో వాయిదాలు చెల్లించడంలో ఎవర్ గ్రాండే విఫలమై దివాళా ప్రకటించింది.
