టైమ్‌కి ఐటీ రిటర్న్‌ వేస్తేనే ప్రయోజనాలు

నిర్దేశిత పరిమితిని మించి ఆదాయం ఆర్జిస్తున్నవారు ప్రతీ సంవత్సరం ఆదాయపు పన్ను రిటర్న్‌లు (ఐటీఆర్‌లు) వేయడం తప్పనిసరి మాత్రమే కాదు.. గడువు తేదీనాటికల్లా సమర్పించడమూ ప్రధానమే.

నిర్దేశిత పరిమితిని మించి ఆదాయం ఆర్జిస్తున్నవారు ప్రతీ సంవత్సరం ఆదాయపు పన్ను రిటర్న్‌లు (ఐటీఆర్‌లు) వేయడం తప్పనిసరి మాత్రమే కాదు.. గడువు తేదీనాటికల్లా సమర్పించడమూ ప్రధానమే. ఆదాయపు పన్ను శాఖ ప్రకటించిన గడువు తేదీనాటికి ఐటీఆర్‌ ఫైల్‌ చేయడం కేవలం చట్టబద్దమైన అవసరం మాత్రమేనని చాలామంది భావిస్తుంటారు. కానీ సమయానికి రిటర్న్‌ వేయకపోతే పలు ప్రయోజనాలు కోల్పోతామని గ్రహించరు. టైమ్‌కి మీ ఐటీ రిటర్న్‌ వేయడంతో ఒనగూడే లాభాలు, నష్టాలు నిపుణులు ఇలా వివరిస్తున్నారు…

• ప్రధానంగా సమయానికి ఐటీ రిటర్న్‌ వేస్తే జరిమానాలు, వడ్డీల బెడద తప్పుతుంది. గడువుతేదీలోగా రిటర్న్‌ వేయకపోతే రూ.5,000 పెనాల్టీ చెల్లించుకోవాల్సిందే. పెనాల్టీతో ఫైల్‌ చేసే అవకాశాన్ని సైతం కోల్పోతే రూ. 10,000 జరిమానా పడుతుంది. దీనికి తోడు మీరు పన్నులు చెల్లించాల్సి ఉంటే.. వాటిని గడువులోగా పే చేయకపోతే..మీ పన్ను బకాయిపై వడ్డీ పడుతుంది. సకాలంలో రిటర్న్‌ వేయడం ద్వారా ఈ పెనాల్టీలు, వడ్డీ ఫీజులను తప్పించుకోవచ్చు.
• గడువు సమయానికి ఐటీ రిటర్న్‌ ఫైల్‌ చేస్తే కలిగే మరో ముఖ్య ప్రయోజనం..రిఫండ్స్‌ రావాల్సిఉంటే వాటిని క్లెయిమ్‌ చేసుకోవచ్చు. పీపీఎఫ్‌ ఖాతాకు సంబంధించిన రిఫండ్‌, అదనంగా చెల్లించిన పన్నును రిఫండ్‌ పొందడం వంటివి టైమ్‌కి రిటర్న్‌ వేస్తేనే సాధ్యపడుతుంది. అంటే సకాలంలో ఐటీఆర్‌ సమర్పించడం ద్వారా మీకు రావాల్సిన రిఫండ్స్‌ మిస్‌కావు.
• టైమ్‌కి రిటర్న్‌ వేయడంతో లభించే అతి ప్రధానమైన ప్రయోజనం..మీ క్రెడిట్‌ స్కోర్‌ మెరుగుపర్చుకోవడం. బ్యాంక్‌లు మీ రుణ దరఖాస్తుల్ని ఆమోదించడానికి క్రెడిట్‌ స్కోర్‌ ఎంత అవసరమో తెలిసిందే. క్రెడిట్‌ కార్డ్‌ల జారీలో సైతం క్రెడిట్‌ స్కోర్‌కు ప్రాధాన్యత ఉందన్న విషయమూ విదితమే. మీరు సమయానికి రిటర్న్‌ వేస్తే, సకాలంలో పన్నులు చెల్లించే బాధ్యతాయుతమైన ఖాతాదారుగా బ్యాంక్‌లు మిమ్మల్ని పరిగణిస్తాయి.
• మీరు టైమ్‌కి రిటర్న్‌ వేయడం ద్వారా ఆదాయపు పన్ను శాఖ ఆడిట్స్‌ నుంచి ఊరట పొందే అవకాశం ఉంటుంది. గడువు తేదీ తర్వాత ఐటీఆర్‌ ఫైల్‌ చేస్తే రివ్యూ చేయడానికి మీ రిటర్న్‌ను ఐటీ శాఖ ఎంపిక చేసుకోవచ్చు. సకాలంలో రిటర్న్‌ సమర్పిస్తే.. తీవ్ర మానసిక ఒత్తిడి కల్గించే స్క్రూటినీ ప్రక్రియ నుంచి తప్పించుకోవచ్చు.