భారత్‌లోనూ యాపిల్‌ పే

అమెరికా టెక్నాలజీ దిగ్గజం యాపిల్‌.. భారతీయ పేమెంట్స్‌ మార్కెట్‌లోకి ప్రవేశించింది. యాక్సిస్‌ బ్యాంక్‌ భాగస్వామ్యంతో తమ యాపిల్‌ పే సర్వీస్‌ను బుధవారం ప్రారంభించింది. దీంతో ఎక్కడైనా (స్టోర్లు, సూపర్‌ మార్కెట్లు, ఆన్‌లైన్‌ షాపింగ్‌ తదితరాల్లో) ఐఫోన్‌, ఐపాడ్‌, యాపిల్‌ వాచ్‌లను వాడుతున్న భారతీయ యూజర్లు ఇక ఈ నయా పేమెంట్స్‌ సదుపాయాన్ని వాడుకోవచ్చు.

• ఐఫోన్‌, ఐపాడ్‌, యాపిల్‌ వాచ్‌ యూజర్లకు కొత్త పేమెంట్స్‌ సదుపాయం
• యాక్సిస్‌ బ్యాంక్‌ భాగస్వామ్యంతో అందుబాటులోకి..

న్యూఢిల్లీ, సెప్టెంబర్‌ 30 : అమెరికా టెక్నాలజీ దిగ్గజం యాపిల్‌.. భారతీయ పేమెంట్స్‌ మార్కెట్‌లోకి ప్రవేశించింది. యాక్సిస్‌ బ్యాంక్‌ భాగస్వామ్యంతో తమ యాపిల్‌ పే సర్వీస్‌ను బుధవారం ప్రారంభించింది. దీంతో ఎక్కడైనా (స్టోర్లు, సూపర్‌ మార్కెట్లు, ఆన్‌లైన్‌ షాపింగ్‌ తదితరాల్లో) ఐఫోన్‌, ఐపాడ్‌, యాపిల్‌ వాచ్‌లను వాడుతున్న భారతీయ యూజర్లు ఇక ఈ నయా పేమెంట్స్‌ సదుపాయాన్ని వాడుకోవచ్చు. ఫలితంగా గుగూల్‌ పే, ఫోన్‌పే, పేటీఎం వంటి ప్రధాన పేమెంట్స్‌ యాప్‌లకు పోటీగా మరొకటి వచ్చినైట్టెంది. అయితే యాపిల్‌ పే.. యాపిల్‌ కంపెనీ తయారుచేసిన ఉత్పత్తుల వినియోగదారులకు మాత్రమే అందుబాటులో ఉండటంతో దీని వాడకం కొంత తక్కువగానే ఉంటుందన్న అంచనాలున్నాయి.

యాపిల్‌ పే అంటే?

యాపిల్‌ పే అనేది యాపిల్‌ డిజిటల్‌ పేమెంట్‌ సర్వీస్‌. దీనిద్వారా చెల్లింపులు చేయడానికి యాపిల్‌ యూజర్లు.. యాపిల్‌ వ్యాలెట్‌ యాప్‌నకు సూచించిన డెబిట్‌, క్రెడిట్‌ కార్డులను యాడ్‌ చేసుకోవాల్సి ఉంటుంది. దేశీయంగా ప్రస్తుతానికైతే యాక్సిస్‌ బ్యాంక్‌ జారీచేసే వీసా, మాస్టర్‌కార్డ్‌ క్రెడిట్‌ కార్డులకే ఈ యాపిల్‌ పే సర్వీస్‌ ఉన్నది. ఈ ఏడాది ఆఖర్లోగా మరిన్ని బ్యాంకులతో టై-అప్‌ అవుతామని యాపిల్‌ సంస్థ చెప్తున్నది. అలాగే త్వరలోనే మ్యాక్‌ నోట్‌బుక్స్‌ వినియోగదారులకూ ఈ సౌకర్యాన్ని (మ్యాక్‌ సపోర్ట్‌ యాపిల్‌ పే) కల్పిస్తామని కంపెనీ వర్గాలు పేర్కొన్నాయి.

గుర్తుంచుకోండి..

• భారతీయ రూపే నెట్‌వర్క్‌పై నడిచే కార్డులకు యాపిల్‌ పే జత చేసుకోలేం.
• ఈ పేమెంట్‌ సర్వీస్‌ నియర్‌-ఫీల్డ్‌ కమ్యూనికేషన్‌ (ఎన్‌ఎఫ్‌సీ) టెక్నాలజీ ఆధారంగా నడుస్తుంది.
• యాపిల్‌ పే వినియోగానికి యూజర్లకు సెల్యులార్‌ లేదా వైఫై కనెక్షన్‌ అక్కర్లేదు.
• పిన్‌ నెంబర్లు, ఓటీపీలు లేకుండానే లావాదేవీలు.
• ఫేస్‌ ఐడీ, టచ్‌ ఐడీ, డివైస్‌ పాస్‌కోడ్‌లతో లావాదేవీలను ధ్రువీకరించుకోవచ్చు.
• ఒకవేళ ఐఫోన్‌ అపహరణకు గురైతే ఫైండ్‌ మై యాప్‌ను ఉపయోగించి సదరు ఫోన్‌ నుంచి పేమెంట్స్‌ను ఆపే వీలున్నది.
• ఐఫోన్‌ ఎక్స్‌ఆర్‌, ఐవోఎస్‌ 18 లేదా ఆపై వెర్షన్ల యూజర్లు తమ డివైస్‌లపై యాపిల్‌ పే ఇన్‌స్టాల్‌ చేసుకోవచ్చు.
• యాపిల్‌ వాచ్‌ సిరీస్‌ 6, వాచ్‌ ఓఎస్‌11 తర్వాత వెర్షన్‌ యూజర్లకూ అందుబాటులో ఉంటుంది.

యాపిల్‌ పే ఇన్‌స్టాల్‌ ఇలా..

• వ్యాలెట్‌ యాప్‌ తెరిచి ‘+’ (యాడ్‌ కార్డ్‌) బటన్‌ను ఎంచుకోవాలి.
• డెబిట్‌, క్రెడిట్‌ కార్డును ఎంచుకుని, స్క్రీన్‌ పై కనిపించే సూచనలను అనుసరించాలి.
• ఐఫోన్‌ కెమెరాతో కార్డును స్కానింగ్‌ చేసి వివరాలను జత చేయవచ్చు. మాన్యువల్‌గా కూడా ఎంటర్‌ చేయవచ్చు.
• యాక్సిస్‌ బ్యాంక్‌ యాప్‌ ద్వారా కూడా మీ కార్డును యాడ్‌ చేసుకోవచ్చు.
• కార్డును ధ్రువీకరించి యాపిల్‌ వ్యాలెట్‌కు బ్యాంక్‌ (ప్రస్తుతానికైతే యాక్సిస్‌ బ్యాంక్‌) యాడ్‌ చేస్తే యాపిల్‌ పే ద్వారా పేమెంట్స్‌ చేసుకోవచ్చు.

పేమెంట్స్‌ ఇలా..

• ఐఫోన్‌కున్న సైడ్‌ బటన్‌ లేదా హోమ్‌ బటన్‌పై డబుల్‌ క్లిక్‌ చేయాలి.
• ఫేస్‌ ఐడీ లేదా డివైస్‌ పాస్‌వర్డ్‌తో మీ ఐడెంటిటీని ధ్రువీకరించుకోవాలి.
• పేమెంట్‌ కన్‌ఫర్మ్‌ అయ్యేదాకా కాంటాక్ట్‌లెస్‌ రీడర్‌ దగ్గర డిస్‌ప్లే పైభాగాన్ని ఉంచాలి.