వలయాలపై శీతలాస్త్రం

అందంగా కనిపించాలని అందరికీ ఉంటుంది. వయసు పెరిగే కొద్దీ ముఖంపై ముడతలు, కండ్ల కింద వలయాలు వచ్చి సౌందర్యాన్ని దూరం చేస్తాయి. ఈ ముడతలను, ఆ వలయాలను చన్నీళ్లు తరిమికొడతాయి. మంచు ముక్కలను నమ్ముకున్నా ఫలితం కనిపిస్తుంది. ఎందుకు ఆలస్యం శీతలాస్ర్తాన్ని సంధించండి ఇలా..

• వెడల్పాటి గిన్నెలో చన్నీళ్లు పోసి.. అందులో 20 సెకండ్లపాటు ముఖాన్ని ఉంచండి. శ్వాస తీసుకోవడం ఇబ్బంది అయితే, పదేసి సెకండ్ల చొప్పున రెండు, మూడుసార్లు ముఖం అంతా మునిగేలా తలను నీళ్లలో ఉంచాలి. తర్వాత మెత్తటి వస్త్రంతో ముఖాన్ని తుడుచుకోవాలి. ఉదయం, సాయంత్రం ఇలా చేయడం వల్ల మంచి గుణం కనిపిస్తుంది.
• చల్లని నీళ్లతో ముఖం కడగడం వల్ల చర్మం బిగుతుగా మారి ముడతలు తగ్గుముఖం పడతాయి. మొటిమలు, మచ్చలు కూడా తగ్గుతాయి. రక్తప్రసరణ మెరుగై చర్మం మెరుస్తుంది.
• చన్నీళ్లు చర్మంపై ఉండే మృతకణాలను తొలగిస్తాయి. దుమ్ము, ధూళి, మేకప్‌ వల్ల మూసుకుపోయిన స్వేదరంధ్రాలను తెరుస్తాయి. ఫలితంగా చర్మానికి మంచి నిగారింపు వస్తుంది. కండ్ల కింద ఏర్పడే వలయాలకూ చన్నీళ్లు మంచి ఔషధంగా పనిచేస్తాయి. మంచుముక్కలతో ముఖాన్ని రుద్దడం వల్ల కూడా మంచి ఫలితం ఉంటుంది.
• అయితే, నీళ్లు అతి చల్లగా లేకుండా చూసుకోవాలి. అంతేకాదు, మరీ ఎక్కువసేపు ఉంచొద్దు. చన్నీళ్లలో ముఖం ఉంచేముందు గోరువెచ్చని నీటితో ముఖంపై ఉన్న మేకప్‌ను పూర్తిగా కడిగేసుకోవాలి.