మొటిమ‌లు త‌గ్గి చ‌ర్మం మెర‌వాలా? అయితే వీటి గురించి తెలుసుకోండి

Skin care – Beauty Tips | మార్కెట్‌లో దొరికే ప్రతి సౌందర్య సాధనమూ సురక్షితమే అని నమ్మడానికి వీల్లేదు. చర్మం తీరు, ఆరోగ్య సమస్యను బట్టి వాటిని ఎంచుకోవడం ఉత్తమం. తయారీలో ఎలాంటి రసాయనాలు వాడారన్నదీ తెలుసుకోవాలి. ఆ ప్రయత్నంలో ఈ పరిజ్ఞానం ఉపయోగపడుతుంది.

హయలురానిక్‌ యాసిడ్‌

కంటిలోని తడిలో, ఎముకల గుజ్జులో కనిపించే ఈ యాసిడ్‌ను ల్యాబ్‌లో తయారు చేసి, రకరకాల సౌందర్యోత్పత్తులలో వినియోగిస్తారు. పొడి చర్మంలో తేమను నింపి, ముడతలు పడనీయకుండా కాపాడుతుంది. ఈ ఆమ్లం ఉన్నఉత్పత్తులను వాడితే వెంటనే ఫలితం కనిపిస్తుంది.

సాలిసిలిక్‌ యాసిడ్‌

రకరకాల కూరగాయలు, పండ్లలో దొరికే సాలిసిలిక్‌ ఆమ్లం జిడ్డు చర్మం వారికి బాగా పనిచేస్తుంది. మొటిమలను నివారిస్తుంది. చర్మం ఎర్రబారకుండా కాపాడుతుంది. బ్లాక్‌హెడ్స్‌, వైట్‌హెడ్స్‌లాంటి వాటిని నివారిస్తుంది.

విటమిన్‌- సి

నిమ్మజాతి పండ్లలో దొరికే విటమిన్‌-సి మనకు సుపరిచితమే. పిగ్మెంటేషన్‌ను తగ్గించి చర్మ నిర్మాణంలో తోడ్పడుతుంది. ఇది వాడటం ప్రారంభించాక నాలుగు నుంచి ఆరువారాల్లో చర్మం కాంతిమంతంగా కనిపించడం మొదలవుతుంది. కానీ నల్లమచ్చల్లాంటివి తగ్గాలంటే మూడు నాలుగు నెలలు వేచి చూడాల్సిందే!

రెటినాల్‌

విటమిన్‌-ఎ రూపమైన రెటినాల్‌ను నిగారింపు కోసం వాడతారు. ఎనిమిది నుంచి పది వారాల్లో మొటిమలు మాయం అవుతాయి. చర్మం మీది ముడతల్లాంటివి తగ్గడానికి మాత్రం ఇంకాస్త సమయం పడుతుంది.

గ్లైకాలిక్‌ యాసిడ్‌

యాపిల్‌, చెరకులాంటి వాటిలో దొరికే గ్లైకాలిక్‌ యాసిడ్‌ చర్మం మీది మృతకణాలను తొలగించి మృదువుగా కనిపించేలా చేస్తుంది. పిగ్మెంటేషన్‌ను అరికట్టి ఆరోగ్యమంతమైన చర్మ నిర్మాణానికి తోడ్పడుతుంది.

Read More :

“మిల‌మిల మెరిసే చ‌ర్మం కోసం ఈ ఆయుర్వేద ఫేస్‌ప్యాక్‌లు ట్రై చేయండి”