YV Subba Reddy : ఆ రైతులకు అండగా టీటీడీ : చైర్మన్ వైవీ సుబ్బారెడ్డి

YV Subba Reddy : నేల‌ త‌ల్లిని ర‌క్షించేందుకే ఈ మ‌హాస‌మ్మేళ‌నం నిర్వహిస్తున్నామని, గో ఆధారిత వ్యవ‌సాయం చేసే రైతుల‌కు టీటీడీ అండ‌గా...

October 30, 2021 / 05:38 PM IST

YV Subba Reddy : ఆ రైతులకు అండగా టీటీడీ : చైర్మన్ వైవీ సుబ్బారెడ్డి

చిత్తూరు : (YV Subba Reddy) తిరుపతిలోని మహతి కళాక్షేత్రంలో టీటీడీ ఆధ్వర్యంలో రెండు రోజుల పాటు జాతీయ గో మహా సమ్మేళనం జరుగనున్నది. టీటీడీ అన్నప్రసాద విభాగం ఆధ్వర్యంలో ఈ సమ్మేళనాన్ని నిర్వహిస్తున్నారు. ఈ సమ్మేళనాన్ని టీటీడీ చైర్మన్‌ వైవీ సుబ్బారెడ్డి శనివారం ప్రారంభించారు. ఈ సందర్భంగా ఆయన మాట్లాడుతూ కీలక ప్రకటన చేశారు. నేల‌ త‌ల్లిని ర‌క్షించేందుకే ఈ మ‌హాస‌మ్మేళ‌నం నిర్వహిస్తున్నామని, గో ఆధారిత వ్యవ‌సాయం చేసే రైతుల‌కు టీటీడీ అండ‌గా ఉంటుందని చెప్పారు. రైతుల‌కు గిట్టుబాటు ధ‌ర చెల్లించి గో ఆధారిత ఉత్పత్తుల‌ను కొనుగోలు చేస్తామన్నారు. గోవును జాతీయ ప్రాణిగా గుర్తించాల‌ని టీటీడీ పాల‌క‌ మండలిలో తీర్మానం చేసి కేంద్ర ప్రభుత్వానికి విన్నవించినట్లు తెలిపారు. సీఎం జ‌గ‌న్‌ సూచనల మేరకు టీటీడీ పాల‌క మండ‌లి సనాతన హిందూ ధర్మ ప్రచారం చేస్తూనే, గో సంరక్షణ కోసం పెద్ద ఎత్తున కార్యక్రమాలు నిర్వహిస్తున్నదని చెప్పారు. ర‌సాయ‌న ఎరువుల‌తో త‌యారుచేసిన‌ దాణా తినే ఆవుల పాల వ‌ల్ల మ‌హిళ‌ల్లో క్యాన్సర్ పెరుగుతున్నద‌ని పలు అధ్యయ‌నాల్లో తేలిందని వైవీ సుబ్బారెడ్డి చెప్పారు. అందువ‌ల్లనే సీఎం జ‌గ‌న్‌ ప్రకృతి వ్యవ‌సాయాన్ని ప్రోత్సహిస్తున్నారని తెలిపారు.

జాతీయ గో మ‌హాస‌మ్మేళ‌నం సందర్భంగా 24 స్టాల్స్ ఏర్పాటు చేశారు. ఇందులో నాలుగు స్టాల్స్ టీటీడీ ఆధ్వర్యంలో ఉత్పత్తి చేస్తున్న అగరబత్తులు, ఆయుర్వేద పంచగవ్య ఉత్పత్తులు, టీటీడీ ప్రచురణలు, డ్రై ఫ్లవర్ టెక్నాలజీతో తయారు చేసిన ఫొటోలను ఉంచారు. గో మహాసమ్మేళనానికి ఆంధ్ర, తెలంగాణ రాష్ట్రాల నుండి విచ్చేసిన రైతులకు తగిన వసతి సౌకర్యాలను ఏర్పాటు చేశారు. సమ్మేళనానికి హాజరైన రైతులకు సాంప్రదాయ భోజనం, త్రాగునీరు అందిస్తున్నారు. గుడికో గోమాత, శ్రీవారికి గో ఆధారిత నైవేద్యం, నవనీత సేవ, సప్త గో ప్రదక్షిణశాల వంటి కొత్త కార్యక్రమాలను తీసుకొచ్చి గోవు పట్ల ప్రజల ఆలోచన తీరులో మార్పు తీసుకురానున్నట్లు ఇటీవల మీడియా సమావేశంలో టీటీడీ ఈవో ఏవీ ధర్మారెడ్డి తెలిపారు.