Pawan Kalyan OG | పవన్ కల్యాణ్ ఓజీ సినిమా టికెట్ల ధరల పెంపు.. ఏపీ ప్రభుత్వం ఉత్తర్వులు జారీ

Pawan Kalyan OG | ఈ నెల 25న విడుదల కానున్న పవన్ కల్యాణ్ ఓజీ సినిమా టికెట్ల ధరల పెంపునకు ఏపీ ప్రభుత్వం అనుమతినిచ్చింది. బెనిఫిట్ షో టికెట్ ధరను రూ.వెయ్యిగా నిర్ణయించింది. అలాగే టికెట్ల ధరలను మల్టీప్లెక్స్‌ల్లో రూ.150 వరకు పెంచుకునేందుకు అవకాశమిచ్చింది.

Pawan Kalyan OG | హరిహరవీరమల్లు డిసప్పాయింట్ తర్వాత పవర్ స్టార్ పవన్ కల్యాణ్ ఫ్యాన్స్ ఆశలన్నీ ఓజీ చిత్రంపైనే ఉన్నాయి. సుజిత్ దర్శకత్వంలో వస్తున్న ఈ సినిమాపై ఇప్పటికే భారీ అంచనాలు ఏర్పడ్డాయి. ముఖ్యంగా ఈ సినిమాలో పవన్ కల్యాణ్ లుక్, క్యారెక్టరైజేషన్ అభిమానులకు ఎంతగానో నచ్చాయి. దీంతో ఈ సినిమా కచ్చితంగా బాక్సాఫీస్‌ను బద్ధలకొడుతుందని పక్కాగా చెబుతున్నారు. అందుకే ఈ నెల 25నవిడుదల అవుతున్న ఈ సినిమా కోసం ఫ్యాన్స్ ఎంతో ఆత్రుతగా ఎదురుచూస్తున్నారు. ఈ క్రమంలోనే ఓజీ సినిమా టికెట్లపై ఏపీ ప్రభుత్వం కీలక నిర్ణయం తీసుకుంది.

చిత్ర బృందం విజ్ఞప్తి మేరకు ఏపీ ప్రభుత్వం బెనిఫిట్ షోకు అనుమతినిచ్చింది. అలాగే కొన్ని రోజుల పాటు టికెట్ ధరలను పెంచుకునేందుకు అంగీకరించింది. ఈ మేరకు బుధవారం నాడు హోంశాఖ ప్రిన్సిపల్ సెక్రటరీ కుమార్ విశ్వజీత్ మెమో జారీ చేశారు. ఈ జీవో ప్రకారం.. ఈ నెల 25న తెల్లవారుజామున ఒంటిగంటకు ప్రదర్శించే బెనిఫిట్ షో టికెట్ ధరను రూ.వెయ్యిగా నిర్ణయించింది. సినిమా విడుదల రోజు నుంచి అక్టోబర్ 4 వరకు అంటే పది రోజుల పాటు టికెట్ ధరలను సింగిల్ స్క్రీన్‌లో రూ.125 (జీఎస్టీ కలిపి), మల్టీప్లెక్స్‌లో రూ.150 (జీఎస్టీ కలిపి) వరకు పెంచుకునేందుకు అవకాశం కల్పించింది. రాష్ట్రవ్యాప్తంగా అన్ని సినిమా థియేటర్లకు ఈ ఉత్తర్వులు వర్తించనున్నాయి.