‘దానిమ్మ’పై దాడి!

భూమిలో ఉండే శిలీంధ్రాల ద్వారా దానిమ్మ తోటల్లో ‘ఎండు తెగులు’ వ్యాపిస్తుంది. మొక్కల వేర్లను ఆశించే నులిపురుగులు, వేర్లు, కొమ్మలపై రంధ్రాలు చేసే రంపపుపొట్టు పురుగులు చేసే రంధ్రాల ద్వారా.. శిలీంధ్రాలు మొక్కలోకి ప్రవేశిస్తాయి.

ప్రస్తుతం పండ్లతోటల్లో ఎక్కువ లాభాలను అందిస్తున్నది దానిమ్మ పంట. అయితే, ఎండు తెగులుతో ఈ పంటకు తీవ్రమైన నష్టం వాటిల్లుతున్నది. మొక్కలను పూర్తిగా నిర్వీర్యం చేసే ఈ తెగులు.. పండ్లతోటల రైతులకు కంటిమీద కునుకు లేకుండా చేస్తున్నది.

భూమిలో ఉండే శిలీంధ్రాల ద్వారా దానిమ్మ తోటల్లో ‘ఎండు తెగులు’ వ్యాపిస్తుంది. మొక్కల వేర్లను ఆశించే నులిపురుగులు, వేర్లు, కొమ్మలపై రంధ్రాలు చేసే రంపపుపొట్టు పురుగులు చేసే రంధ్రాల ద్వారా.. శిలీంధ్రాలు మొక్కలోకి ప్రవేశిస్తాయి. ఫలితంగా మొక్కల ఆకులు పసుపురంగులోకి మారి, వాడినట్లుగా కనిపిస్తాయి. క్రమంగా గోధుమ రంగులోకి మారి.. ఎండి రాలిపోతాయి. తెగులు వ్యాపించిన మొదట్లో మొక్కలు బలహీనంగా మారి, క్రమేపి ఆకులు రాలిపోతూ ఉంటాయి. కొన్ని వారాల్లోనే మొక్క పూర్తిగా ఎండిపోయి, చనిపోతుంది.

నివారణ చర్యలు : దానిమ్మ తోట వేయాలనుకునే రైతులు.. నాణ్యమైన, ఆరోగ్యమైన మొక్కలనే నాటుకోవాలి. ఇందుకోసం పేరొందిన నర్సరీల నుంచి మాత్రమే మొక్కలను కొనుగోలు చేయాలి. నాణ్యత కోసం ధరలో రాజీ పడొద్దు.

• మొక్కలు నాటే ముందు చేనులో పశువుల ఎరువుతోపాటు ఎకరానికి ఒక కిలో ట్రైకోడెర్మా విరిడి లేదా సూడోమోనాస్‌ ఫ్లోరెసెన్స్‌ జీవ శిలీంధ్రనాశనిని కలిపి, పొలమంతా చల్లి కలియదున్నాలి. దీనివల్ల ఎండుతెగులును కలిగించే శిలీంధ్రాన్ని నాశనం చేయవచ్చు.
• మొక్కలు మరీ దగ్గర దగ్గర కాకుండా.. మొక్క మొక్కకూ కనీసం 10 నుంచి 12 అడుగుల దూరం ఉండేలా నాటుకోవాలి. గుంతలు నింపేటప్పుడు ప్రతి గుంతకూ 500 గ్రా. వేపపిండి కలిపి వేయడం వల్ల మంచి ఫలితాలు ఉంటాయి.
• మొక్కలు నాటేముందు ప్రతి గుంతలో 100 గ్రా. బ్లీచింగ్‌ పొడి చల్లుకోవాలి.
• మొక్కలు నాటిన తర్వాత.. లీటర్‌ నీటిలో 25 గ్రా. బ్లీచింగ్‌ పౌడర్‌ లేదా 2 గ్రా. బావిస్టిన్‌తోపాటు 2.5 మి.లీ. క్లోరిపైరిఫాస్‌ కలిపిన ద్రావణాన్ని మొక్కల పాదుల్లోని మట్టి తడిసేలా పోయాలి.
• అంతరపంటగా బంతిపూలను సాగుచేస్తే.. దానిమ్మ చెట్లకు నులిపురుగుల బెడద తగ్గుతుంది.