Visit:
విహారయాత్రకు వెళ్లాలని అందరికీ ఉంటుంది. కానీ, స్నేహితులందరికీ ఒకేసారి సెలవు దొరకదు. ఇంట్లో వారితో వెళ్లడం కంటే.. మన వయసు వారితోనే కలిసి తిరగాలనిపిస్తుంది. మరి ఇలాంటప్పుడు ఏం చేయాలి? సరిగ్గా ఈ సమస్యకే పరిష్కారం చూపిస్తున్నది ‘కమ్యూనిటీ ట్రావెల్’. అపరిచితులంతా ఒకే గ్రూపుగా ఏర్పడి, విదేశీ వీధుల్లో విహరిస్తూ.. కొత్త స్నేహాలను వెతుక్కునే అవకాశాన్ని కల్పిస్తున్నది. ముఖ్యంగా మిలీనియల్స్, జెన్-జీ యువత.. ఇప్పుడు దేశవిదేశాల్లో ఈ ‘సోలో-గ్రూప్’ మ్యాజిక్ను ఆస్వాదిస్తున్నది. అసలేంటి ఈ ట్రెండ్? ఎందుకు యువత అపరిచితులతో ప్రయాణించడానికి అంతగా ఇష్టపడుతున్నది?
ఒకప్పుడు గ్రూప్ టూర్లు అంటే కేవలం పెద్దవారే ఎక్కువగా వెళ్లేవారు. కానీ, ఇప్పుడు సీన్ మారింది. వృత్తిరీత్యా వేర్వేరు నగరాలకు మారడం, పాత స్నేహితులు దూరమవ్వడం వంటి కారణాల వల్ల చాలామందికి ట్రావెల్ పార్ట్నర్స్ దొరకడం లేదు. ఈ క్రమంలోనే భద్రతతో కూడిన స్వేచ్ఛని వెతుక్కునే ప్రయత్నం చేస్తున్నది నేటి తరం. ఒంటరిగా విదేశాలకు వెళ్లాలంటే ఇకపై భయం అక్కర్లేదు. ఇలాంటి గ్రూపుల్లో తోడు వెతుక్కోవచ్చు. ఏ ఇబ్బంది వచ్చినా చూసుకోవడానికి ‘ట్రిప్ కెప్టెన్’ కూడా ఉంటారు. వీసా, ఫ్లయిట్ టికెట్లు, హోటల్ బుకింగ్స్.. ఇవన్నీ కంపెనీలే చూసుకుంటాయి. మనం కేవలం మన బ్యాగు సర్దుకుని వెళ్తే చాలు! ఇప్పుడిదే.. యువతకు కావాల్సిన అసలైన వెసులుబాటు.
ఈ ప్రయాణాల్లో అతిపెద్ద విశేషం ఏమిటంటే.. విమానాశ్రయంలో అపరిచితుల్లా కలిసిన వారంతా, ట్రిప్ ముగిసేసరికి ప్రాణ స్నేహితులైపోతున్నారు.
ఆత్మీయ సంభాషణలు: రోజంతా విదేశీ వీధుల్లో తిరుగుతూ, రాత్రిపూట అంతా కలిసి భోజనం చేస్తూ.. మనసు విప్పి మాట్లాడుకునే అవకాశం ఇక్కడ దొరుకుతుంది. ఏఐ, చాట్ జీపీటీలతో నిత్యం గడిపే నేటి తరానికి ఇదొక గొప్ప ‘హ్యూమన్ కనెక్ట్’.
కొత్త జంటలు: చిత్రం ఏంటంటే.. ఇలాంటి ట్రిప్పుల్లో పరిచయమై, ఆ తర్వాత పెళ్లి పీటల దాకా వెళ్లిన జంటలు కూడా వందల్లో ఉన్నాయట! డేటింగ్ యాప్స్ కంటే ఇలాంటి సహజమైన పరిచయాలే బాగుంటాయని యువత భావిస్తున్నది.
ప్రయాణం అంటే కేవలం ఒక ప్రదేశాన్ని చూడటం మాత్రమే కాదు. కొత్త వ్యక్తులను కలుసుకోవడం, మన గురించి మనం కొత్తగా తెలుసుకోవడం. అపరిచితులతో చేసే ప్రయాణం మనల్ని మరింత విశాలంగా ఆలోచింపజేస్తుంది. ప్రస్తుతం మన దేశ యువతకు వియత్నాం ఒక ఫేవరెట్ ప్రదేశంగా మారింది. అక్కడి కొబ్బరి తోటలు, అందమైన సముద్ర తీరాలు, రుచికరమైన ఆహారం.. ఇవన్నీ గ్రూపుగా ఎంజాయ్ చేయడానికి అనువుగా ఉన్నాయి. తక్కువ ఖర్చులో విదేశీ యాత్రను పూర్తి చేయాలనుకునే వారికి ఇది ఒక సరైన గమ్యస్థానం. ‘ఒంటరితనం’ అనేది నేటితరాన్ని వేధిస్తున్న ఒక నిశ్శబ్ద సమస్య. దాన్ని పారదోలడానికి కమ్యూనిటీ ట్రావెల్ ఒక అద్భుతమైన మార్గం. స్నేహితులు రాలేదని మీ ప్లాన్స్ వాయిదా వేసుకోకండి.. ప్రపంచం చాలా పెద్దది, అందులో మీ కోసం కొత్త స్నేహితులు ఎక్కడో ఒకచోట ఎదురుచూస్తూనే ఉంటారు. మరి ఈ వేసవిలో మీరు కూడా అపరిచితుల గ్రూపుతో కలిసి ట్రిప్ ప్లాన్ చేస్తారా?
