గోగుమల్లె సుందారి!

గంగవ్వ.. పల్లె పాటకు పర్యాయపదం. ఆమె పాడితేనే ఊళ్ల బతుకమ్మ. ఆమె స్వరం వినిపిస్తేనే పొలంలో పని. నాడు.. సౌదీకి వెళ్లిన భర్త కోసం క్యాసెట్‌లో పాట రికార్డింగ్‌ చేసి పంపితే, నేడు.. పల్లె పదాల అభిమానులను ఉత్సాహ పరిచేందుకు మైక్‌ పట్టింది. అరవై ఏండ్ల వయసులో యూ ట్యూబ్‌ సంచలనంగా మారిన.. జక్కుల గంగవ్వ పాట ముచ్చట!

మాది రాజన్న సిరిసిల్ల జిల్లా రుద్రంగి. నాలుగేండ్లప్పుడే లగ్గం అయ్యింది. మా ఆయన పేరు నాంపల్లి. మా పెండ్లప్పుడు తొమ్మిదేండ్ల పిలగాడు. మా ఇంట్ల ఆడిబిడ్డను నేనొక్కదాన్నే. అవ్వయ్యకు, అన్నలకు, వదినెలకు నేనంటే మస్తు పాయిరం. సదువు, సందె లేని కుటుంబమే అయినా మా ఇంట్ల ఎప్పుడూ పాటల మోతలు వినిపిస్తుండేటియి. మా అవ్వ లచ్చిందేవవ్వ. ఒక్క బిడ్డెనని నా పెండ్లయినంక కూడా సంకలెత్తుకొని తిరుగుతుండేది. మా అవ్వకు బతుకమ్మ పాటలు, దేవుండ్ల పాటలు చానా వస్తుండె. పొద్దు గూట్లెవడ్డంక గొర్లను మందలగొట్టి అన్నలు, అయ్య ఇంటికి రాంగనే అందరమూ ఒక్కతాన కూసొని బంతిభోజనం చేద్దుము. అప్పుడు మా అవ్వ రామ సక్కదనాల పాటలు పాడి సంతోషపెడ్తుండె. గంజి, గట్క కన్నా ఆమె పాటలతోనే కడుపు నిండినట్లయ్యేది. చిన్నప్పటి సంది పాటల పందిట్ల పెరిగినందుకు నాగ్గూడ ఇష్టం ఏర్పడింది. చిన్నతనంలనే లగ్గంజేసిండ్రు కాబట్టి నేను కొన్ని రోజులు అవ్వగారింట్ల ఉంటె, కొన్ని రోజులు అత్తగారింట్ల ఉండేదాన్ని. అవ్వ దగ్గర విన్న పాటలను అన్నలను అడిగి నేర్చుకునేదాన్ని. అవ్విటినే అత్తగారింట్ల పాడుతుండేదాన్ని. మా ఆయన, అత్త మామలు నా పాటలకు ఖుషీగైతుండె.

నా పాటతోనే బతుకమ్మ ఊరుకువోయినా, పల్లెకువోయినా ‘గంగులు పాటలు బాగ పాడ్తదంటగద’ అనే పొగడ్తలే వినిపిస్తుండె. అట్లా అంటుంటె చెప్పరాని సంబురమైతుండె. ఎంత తీర్వాటంలేని పని ఉన్నా బతుకమ్మ పండుక్కి అవ్వగారింటికి పోయేదాన్ని. నా పాట కోసం రామరావుపల్లె ఊరా నూరడు మంది ఎదురుసూద్దురు. నా పాటతోటే ఊళ్ల బతుకమ్మ లేచేది. ఎన్నడన్నా ఆల్సమైతే ‘అగో గంగవ్వ రాకపాయెనా ఈ తాప’ అనే రంది కనిపిస్తుండె. అందుకోసం ఒకపొద్దు ముందుగాల్నే మా అన్నలు నన్ను బతుకమ్మకు తీస్కపోయేటోళ్లు. ఆడిబిడ్డెకు బతుకమ్మనే పెద్ద పండుగ కదా? పూలను, నీళ్లను, పుట్టింటి చీరరైకను చూసి మురిసిపోయే సంబురాల మధ్యన నా పాట వాడవాడల మార్మోగేది.

క్యాసిట్ల పంపేది

పిల్లలు పెద్దగైనంక ఖర్సులు ఎక్కువైనయి. ఇంటిల్లాదులం పొలంకాడనే ఉంటనే ఎట్లెళ్లుతదని మా ఆయన పనికోసం సౌదీకి పోయిండు. ఒకటి కాదు, రెండు కాదు ఇరవైయేండ్ల కాలం దేశంలనే ఉన్నడు. పిలగాళ్లు ఎట్లున్నరు? ఎద్దు ఎవుసం ఎట్లుంది? అని మంచిచెడ్డ అర్సుకునేందుకు ఆయన మాకు నెలకో రెండు నెల్లకో కారటు రాస్తుండె. మేంగూడా ఖుద్దు మత్లబు తెలుపుతూ కారటు రాస్తుంటిమి. కానీ నోటిమాటల్లేవు. నాతోటి మాట్లాడకుండా, నా పాట వినకుండా ఉండలేడు ఆయన. ఏమనిపించిందో ఏమోగానీ ‘గంగూ.. ఈ కారటు బంజేసి క్యాసిట్‌ పంపు. దినాం నీ పాటలు వినే పానం. ఇన్నిరోజుల సంది నీ పాట వినిపించక దోడ్‌ దోడ్‌ అన్నట్లుంది. టేప్‌రికాట్ల క్యాసిటేసి నీ పాటలు నింపి పంపుర్రి. తీరిక ఉన్నప్పుడల్లా వింటూ పానం నిమ్మలం చేసుకుంట’ అన్నడు. మా ఆయన కోసం నేను, నా పిల్లలు పాటలు పాడి పంపిస్తుంటిమి. దేశంకాని దేశంల ఎట్లున్నడో, ఏం తిన్నడోగానీ నా పాట వింటూ బతికిండు.

యాదికి తెచ్చుకుంటున్న

నా పాటనే పానం అనుకున్న మా ఆయన ఆరేండ్ల కింద కాలం చేసిండు. అప్పుడు చెప్పరాని దుఃఖమనిపించింది. నా పాట వినుకుంట ఇంకొంతకాలం ఉండకపాయె అనిపించింది. ఆయన జ్ఞాపకాల్ల బతుకుతున్న సమయంలో మా అన్న కొడుకులు మహేందర్‌, స్వామి నా పాటకు మళ్ల జీవం పోసిండ్రు. అప్పుడెప్పుడో చిన్నతనంల మా అవ్వను చూసుకుంట నేర్చుకున్న పాటలను యాదికి తెప్పించిండ్రు. ‘సిట్ట సిట్టెండా కొట్టె సెట్టిగురు పెట్టె’ పాటను వాళ్లకు నేనే ఇచ్చిన. అత్తగారింటికి వెళ్లిన కొత్త కోడలు అవ్వయ్యను గుర్తుచేసుకుంట పాడుకునే పాట ఇది. దీనిని య్యూటూబ్‌ల పెడితే లక్షలమంది చూసిండ్రంట. మళ్లొక పాట ఇవ్వక్కా అని అడిగిండ్రు. అప్పుడు ‘మందల్ల మ్యాకను బ్యారము చేయంగా శ్రీరామనందన మ్యాకపోతూ’ అనే పాట ఇచ్చిన. ఇదికూడా ఎక్కడంటే అక్కడ వినిపిస్తుంది. ఇసొంటి పాటలు ఇంకా చానా ఉన్నయి.

సీన్మలెక్క అనిపించింది

మంచి పాటలు ఇస్తున్నవ్‌. జనాలు బాగా ఆదరిస్తుండ్రని నా పాటలను నన్నే పాడి, వీడియోల నటించమని అడిగిండ్రు పోరగాళ్లు. ‘నాతో కాదురా’ అని చెప్పిన. కానీ మా పిలగాళ్లు వినలేదు. వయసు పిల్లగా ఉన్నప్పుడు పాడిన పాటలను, అప్పుడెట్లా పాడిన్నో యాదికి తెచ్చుకుని ‘మూడుసోల్ల వడ్లువోసి ముల్కా కూరొండి గోగుమల్లె సుందారి’ పాట పాడిన. వీడియోను చూసినంక నాకైతే ఓ సీన్మలెక్క కనిపించింది. మా ఆయన కోసం క్యాసిట్ల పాటలు నింపినప్పుడు విన్న నా గొంతు మళ్ల ఇన్నొద్దులకు వింటూ మురిసిపోయిన.