మీ ఇంట్లోనే ఈజీగా కంపోస్ట్‌ ఎరువు రెడీ చేసుకోవ‌చ్చు

వంటింటి వ్యర్థాలతో కంపోస్ట్‌ ఎరువు తయారు చేసుకోవచ్చని మనకు తెలుసు. మొక్కల పెరుగుదలకు ఎంతగానో ఉపయోగపడే ఈ సేంద్రియ ఎరువు తయారీకి నెల నుంచి నెలన్నర సమయం పడుతుంది. ఇందుకు కొంత స్థలమూ కావాలి. ఆ ఇబ్బంది లేకుండా, వారం రోజుల్లోనే తయారు చేసుకోగలిగేలా ‘వెప్రా కంపోస్ట్‌ కిట్‌ ( Vapra Home Composting Kit )’ను రూపొందించారు హైదరాబాద్‌కు చెందిన పావని లొల్లా ( Pavani Lolla ).

ఇంట్లోనే కంపోస్ట్‌ ఎరువును సిద్ధం చేసుకునేందుకు సాయపడుతుందీ కిట్‌. ఎరువు తయారీని వేగవంతం చేసేలా ఓ గ్రీన్‌ మిక్స్‌ను రూపొందించిందీ సంస్థ. హోమ్‌ కంపోస్ట్‌ కిట్‌తో పాటు గ్రీన్‌ మిక్స్‌ పొట్లం, కంపోస్టింగ్‌ యంత్రం కూడా ఇస్తారు. ఈ చిన్నపాటి పరికరంలో.. కూరగాయలు, పండ్లు తరిగినప్పుడు మిగిలిన చెక్కులు, ముక్కలు, కోడిగుడ్డు పెంకులు, పాచిపోయిన అన్నం, రాలిన ఆకుల్లాంటి వాటితో పాటు.. సంస్థ ఇచ్చే కంపోస్ట్‌ మిక్స్‌ను వేసి మూత పెట్టి 5 నిమిషాల పాటు గిరగిరా తిప్పాలి. అలా వారం రోజులు చేస్తే కంపోస్ట్‌ ఎరువు తయారైపోతుంది. ఎరువు తయారీలో ఇబ్బంది పెట్టే దశ.. దుర్వాసన. ఆ సమస్య ఇక్కడ ఉండదు. వీ హబ్‌ స్టార్టప్‌గా అభివృద్ధి చెందిన ఈ సంస్థ తయారుచేసే కిట్‌ విలువ మూడున్నరవేలు. హైదరాబాద్‌ ఉప్పల్‌లోని కూరగాయల మార్కెట్లో వెప్రా ప్లాంట్‌ పిట్‌ కంపోస్టర్‌ను పైలట్‌ ప్రాజెక్టుగా నెలకొల్పారు. ఇక్కడ కూరగాయల వ్యర్థాల నుంచి కంపోస్ట్‌ ఎరువు తయారవుతున్నది. ‘మా అధ్యయనం ప్రకారం మన ఇంట్లో నుంచి బయటికి వెళ్లే చెత్తలో 60 శాతం ఆర్గానిక్‌ వ్యర్థాలే ఉంటున్నాయి. వాటిని ఎరువుగా మారిస్తే మొక్కలకు ఉపయోగపడుతుంది. అందుకే నా ఆలోచనను నలుగురికీ ఉపయోగపడే స్టార్టప్‌గా మలిచాను’ అంటారు పావని.

Read More :

“ట్రాన్స్‌జెండ‌ర్ల స‌మ‌స్య‌ల‌పై పోరాడుతున్న డాక్ట‌ర్ త్రినేత్ర‌.. ఎవ‌రీమె !!”