Jalsa Movie | సినిమాలోనే కాదు.. నిజ జీవితంలోనూ ఈ బాలుడికి అదే వ్యాధి !!

Jalsa Movie | అమెజాన్‌ ప్రైమ్‌లో విడుదలైన ‘జల్సా’ చిత్రం ఉత్కంఠ భరితమైన ఇతివృత్తంతో ప్రేక్షకుల మనసులను దోచుకుంటున్నది. విద్యాబాలన్‌, షెఫాలీ షా ప్రధాన పాత్రల్లో నటించారు. తెలుగు మూలాలున్న సూర్య కాశీభట్ల ( Surya Kasibhatla ) అనే కుర్రాడు ఆ ఇద్దరు దిగ్గజాలతో పోటీపడ్డాడు. సూర్య కుటుంబం అమెరికాలోని టెక్సాస్‌లో స్థిరపడింది. ‘జల్సా’లో సూర్యది సెరిబ్రల్‌ పాల్సీతో బాధపడుతున్న ఓ కౌమార బాలుడి పాత్ర.

నిజానికి సూర్య కూడా సెరిబ్రల్‌ పాల్సీ బాధితుడే. సరిగ్గా నడవలేడు, మాట్లాడనూ లేడు. కానీ సినిమాలంటే ప్రాణం. నటన పట్ల మమకారం. అనుకోకుండానే ఈ అవకాశం వచ్చింది. ‘జల్సా’ దర్శకుడు సురేశ్‌ త్రివేణి ఓ ప్రెస్‌మీట్‌లో ‘సూర్య అద్భుతమైన నటుడు, నేను ఎప్పటికీ వదులుకోలేని కుర్రాడు. తనను మొదటిసారి కలిసినప్పుడే, నాకు ఆయుష్‌ దొరికాడని అనుకున్నాను’ అంటూ ఆకాశానికి ఎత్తేశాడు. విద్యాబాలన్‌ అయితే, ‘మా అనుబంధం గురించి ఎంత చెప్పినా తక్కువే. సెట్స్‌లోనే కాదు, బయట కూడా మేం తల్లీబిడ్డలమే. సూర్య నటన ఎంతోమందికి ప్రేరణగా నిలిచింది’ అంటూ వాత్సల్యాన్ని కురిపించింది. మొదటి సినిమా సూపర్‌ హిట్‌ కావడంతో చాలా ఆనందంగా ఉన్నాడు సూర్య. తను అద్భుతంగా పియానో వాయిస్తాడు. పాటలు రాస్తాడు. సైన్స్‌ ప్రయోగాలపై ‘నాసా’కు ఉత్తరాలూ రాస్తుంటాడు. గొప్ప శాస్త్రవేత్త కావాలన్నది సూర్య ఆశయం.