అమ్మో.. ఆస్తమా!

ఆస్తమా.. దీర్ఘకాలిక ఊపిరితిత్తుల వ్యాధి. ఈ రుగ్మత పిల్లల్లో పెరుగుతున్నది. ట్రెకియో బ్రాంకియల్‌ భాగాలకు వచ్చే ఈ సమస్య వల్ల శ్వాసనాళాలు రకరకాల ఉత్ప్రేరకాలకు ఉత్తేజం చెందుతాయి. శ్వాస లోనికి పీల్చడం, తిరిగి బయటికి వదలడం చాలా కష్టం అవుతుంది. ఆస్తమా తరచుగా వస్తూ తగ్గిపోతూ ఉంటుంది

ఆస్తమా.. దీర్ఘకాలిక ఊపిరితిత్తుల వ్యాధి. ఈ రుగ్మత పిల్లల్లో పెరుగుతున్నది. ట్రెకియో బ్రాంకియల్‌ భాగాలకు వచ్చే ఈ సమస్య వల్ల శ్వాసనాళాలు రకరకాల ఉత్ప్రేరకాలకు ఉత్తేజం చెందుతాయి. శ్వాస లోనికి పీల్చడం, తిరిగి బయటికి వదలడం చాలా కష్టం అవుతుంది. ఆస్తమా తరచుగా వస్తూ తగ్గిపోతూ ఉంటుంది. సరైన అవగాహన లేకపోవడం వల్ల చాలామంది ఈ రుగ్మతను వెంటనే గుర్తించలేకపోతున్నారు. దీంతో చిన్నారులకు సకాలంలో వైద్యం చేయించడం లేదు. పుట్టుకతోనే కృత్రిమ శ్వాస అవసరమైన పిల్లలు, కిక్కిరిసిన నివాసాలలో ఉండే చిన్నారులు, సరైన వసతులులేని సంరక్షణ కేంద్రాలలో మనుగడ సాగించే అనాథలు, తల్లిపాలు తాగని పిల్లలు, పొగ అలవాటు ఉన్న కుటుంబాల్లో పుట్టినవారు.. ఆస్తమాకు గురయ్యే ఆస్కారం మరీ ఎక్కువ.

ఉత్ప్రేరకాలు: ఇంట్లోని దుమ్ము, ధూళిలో ఉండే డస్ట్‌మైట్‌ అనే సూక్ష్మజీవి, బొద్దింకలు, జంతువుల లాలాజలం, పెంపుడు జీవాల బొచ్చు వ్యాధిని తీవ్రతరం చేస్తాయి. వైరస్‌ సోకిన తరువాత కూడా వ్యాధి లక్షణాలు కనిపిస్తాయి. వైరస్‌లో ఆర్‌ఎస్‌వీ, పారా ఇన్‌ఫ్లుయెంజా, రైనోవైరస్‌, జంక్‌
ఫుడ్స్‌లో ఉండే సల్ఫైట్స్‌, బెంజోయేట్స్‌ వంటి వాటివల్ల కూడా వ్యాధి ముదురుతుంది. చల్లగాలి, స్ప్రేలు, దోమలను పారదోలే పొగ కాయిల్స్‌, అకస్మాత్తుగా వాతావరణంలో వచ్చే మార్పులు, చల్లదనం వ్యాధికి ప్రధాన కారణాలు.

వ్యాధి లక్షణాలు: తుమ్ములు, ముక్కు కారడం, ముక్కు దురద, తరచూ దగ్గు, దగ్గినప్పుడు వాంతులు, ఛాతీలోంచి శబ్దాలు, శ్వాసక్రియలో వేగం, ఛాతీ పట్టేసినట్టు అనిపించడం ముఖ్యమైన లక్షణాలు.

వైద్యం: వ్యాధి తీవ్రతను బట్టి వైద్యులు సూచించిన మందులను క్రమం తప్పకుండా వాడాలి. డాక్టరు సలహాపై ఇన్‌హేలర్లు ఉపయోగించాలి. ఇవి సురక్షితమైనవి. వీటిని వాడటం వల్ల భవిష్యత్తులో ఆ మందులకు బానిసలు అవుతారనుకోవటం అపోహ మాత్రమే.

– డాక్టర్‌ కర్రా రమేశ్‌రెడ్డి
పిల్లల వైద్య నిపుణులు