పెంపుడు జంతువులకు సొంత వైద్యం చేస్తున్నారా?

June 11, 2022 / 06:45 AM IST

Pets | పెంపుడు జంతువులకు సొంత వైద్యం చేస్తున్నారా? సోషల్‌ మీడియా, యూట్యూబ్‌లో చూసి ఏవేవో మాత్రలు బలవంతంగా మింగిస్తున్నారా? అయితే జాగ్రత్త! ఆ ఔషధాలు మూగజీవాల ప్రాణాలు తీయవచ్చు.

కరోనా సమయంలో ప్రతి ఇంట్లో ‘డోలో’త్సవమే! మందుల డబ్బాలో డోలో ఉండి తీరాల్సిందే. ఏ చిన్న ఆరోగ్య సమస్య వచ్చినా డోలో వేసుకునేవారు. ఆ అనుభవంతో.. పెంపుడు జంతువులకు కాస్త కలతగా అనిపించినా, చర్మంపై దద్దుర్లు వచ్చినా, జ్వరం, దగ్గు ఉన్నా.. చాలామంది యజమానులు సొంతంగా వైద్యం చేస్తున్నారు. ఇది ఏ మాత్రం సురక్షితం కాదని హెచ్చరిస్తున్నారు వెటర్నరీ వైద్యులు. నిపుణుల సలహా తీసుకోకుండా పెట్స్‌కు డైక్లోఫినాక్‌, ఇబుప్రోఫెన్‌ వంటి మందులు ఇస్తుండటంతో వాటికి మూత్రపిండ, జీర్ణసంబంధ వ్యాధులు ఎక్కువ అవుతున్నాయి.

పెంపుడు జంతువులు ప్రత్యేకమైన శరీర ధర్మాలను కలిగి ఉంటాయి. వాటికంటూ ఓ వైద్య విధానం ఉంది. ఔషధాలూ ఉన్నాయి. కొన్ని మందుల దుష్ప్రభావాల వల్ల పెట్స్‌ చూపును కోల్పోతున్నాయని, రక్తహీనతకు గురవుతున్నాయని నిపుణులు గుర్తించారు. అందుకే వెటర్నరీ వైద్యుల ప్రిస్క్రిప్షన్‌ లేకుండా ఎలాంటి మందులూ పెట్స్‌పై ప్రయోగించవద్దంటున్నారు.