Ramanna Youth | అందరికీ అతనో నటుడు. టైమింగ్ అతని బలం. హీరో పాత్రలకు పర్ఫెక్ట్ దోస్తు. కానీ, ఆ యువకుడు మాత్రం కెమెరా ముందు నటించాలని ఎప్పుడూ అనుకోలేదు. అనుకోకుండా వచ్చిన ఒక అవకాశం.. తన జీవితం అవుతుందని అస్సలు ఊహించలేదు. కానీ ‘పట్టవలయున్ పట్టు గట్టిగా.. పట్టినచో సాధించవలెన్’ అన్నట్టు నటుడిగా అలరించిన అతగాడు దర్శకుడిగా ప్రయత్నించి తొలి సినిమాతోనే వారెవ్వా అనిపించుకున్నాడు. ‘రామన్న యూత్’ సినిమాతో హిట్టు కొట్టిన దర్శకుడు, హీరో అభయ్ నవీన్ పరిచయం ఇది.
అభయ్ ఇంజినీరింగ్ చదివాడు. కాలేజ్ నుంచి బయటికి రాగానే బ్యాంక్ ఉద్యోగం వచ్చింది. తండ్రి టీచర్. ఆర్థికంగా ఓ మోస్తరు కుటుంబం. అభయ్ మాటలు ఎదుటి వారిని బాగా ఆకట్టుకుంటాయి. అందులో సెటైరికల్ ఫన్ ఉంటుంది. అదే బ్యాంకు కొలీగ్స్ను అతనికి ఫ్యాన్స్ చేసింది. దీంతో ఒకరోజు ‘నువ్వు సినిమాల్లో ట్రై చెయ్’ అని ఓ సహోద్యోగి సలహా ఇచ్చాడు. అప్పటివరకు అతనికి సినిమాల ఆలోచనే లేదు. ఏదో కాలేజ్ రోజుల్లో ఫన్నీ స్కిట్స్ చేశాడంతే! సీనియర్ సలహా గురించి ఆలోచిస్తుండగానే ఆఫీస్లో అందర్నీ పదోన్నతులు పలకరించాయి. అనుభవం లేదని అభయ్కి ఇంక్రిమెంట్తో సరిపెట్టారు. అంతే మనోడు హర్ట్ అయ్యాడు. రాత్రికి రాత్రే ఉద్యోగం మానేయాలని ఫిక్సయ్యాడు. మర్నాడే రాజీనామా చేశాడు.
తర్వాత ఏంటి? తన సహోద్యోగి మాటలు గుర్తొచ్చాయి. రామానాయుడు స్టూడియోలో నటనలో శిక్షణ తీసుకున్నాడు. ఎక్కడో.. ఏదో సినిమాకు ఆడిషన్స్ జరుగుతున్నాయని వెళ్లాడు. సెలెక్ట్ అయ్యాడు. ‘బొమ్మల రామారం’ సినిమాలో అవకాశం వచ్చింది. అది పెద్దగా విజయం సాధించలేదు. నిరాశలో ఉండగానే తరుణ్ భాస్కర్ సినిమా ఆడిషన్స్కు వెళ్లాడు. హీరో ఫ్రెండ్ పాత్రకు సెలెక్ట్ అయ్యాడు. ‘పెళ్లిచూపులు’ సినిమా సూపర్ హిట్. అభయ్ నటనకు మంచి మార్కులు పడ్డాయి. ఆ తర్వాత మెల్లమెల్లగా సినిమా అవకాశాలు కూడా పెరిగాయి.
ఆ సమయంలోనే అభయ్ ఓ కథ రాసుకున్నాడు. గ్రామాల్లో బడా రాజకీయ నాయకుల వెంట తిరగాలని ఉవ్విళ్లూరే ఓ యువకుడి కథ అది. కొంతమంది నిర్మాతలను కలిసి కథ చెప్పాడు. అందరూ బాగుందన్నారు. కానీ, ప్రొడ్యూస్ చేయడానికి ఎవరూ ముందుకు రాలేదు. క్రౌడ్ ఫండింగ్ చేద్దాం అనుకున్నాడు. వర్కవుట్ కాలేదు. ఎట్టకేలకు నిర్మాత దొరికాడు. అభయ్ అమ్మమ్మ ఊరు సిద్దిపేట జిల్లాలోని అంకుశాపూర్లో షూటింగ్ మొదలైంది. ఊరంతా అతనికి సపోర్ట్ చేసింది. సినిమా పూర్తయింది. విడుదలే మిగిలింది. అన్నీ అనుకున్నట్టుగా జరుగుతున్నాయని అనుకునేంతలో కష్టాలు మొదలయ్యాయి. అనుకోకుండా అభయ్ తండ్రి కన్నుమూశాడు. కొండంత బాధను గుండెల్లో దాచుకొని సినిమా విడుదల కోసం ప్రయత్నాలు చేశాడు. మూడేండ్ల నిరీక్షణ ఫలించి.. ‘రామన్న యూత్’ రిలీజైంది. తొలిరోజే పాజిటివ్ టాక్ వచ్చింది. ‘సినిమా విడుదల అయితే చాలు అనుకుంటున్న ఈ రోజుల్లో.. బాగుంది అనిపించుకున్నదంటే నా కష్టం వృథా కాలేదు. త్వరలోనే మరో యూత్ ఫుల్ తెలంగాణ సినిమాతో మీ ముందుకొస్తా’ అంటున్నాడు అభయ్.
-ప్రవీణ్ కుమార్ సుంకరి