Warangal : లింగ నిర్ధారణ పరీక్షలపై నిఘా పెంచుతాం.. డీఎంహెచ్‌వో డాక్టర్‌ లలితాదేవీ

వరంగల్‌ : లింగ నిర్ధారణ పరీక్షలపై ప్రత్యేక నిఘా పెడుతామని డీఎంహెచ్‌వో డాక్టర్‌ లలితాదేవి అన్నారు. మంగళవారం డీఎంహెచ్‌వో కార్యాలయంలో అడ్వయిజరీ కమిటీ నిర్వహించారు. ఈ సందర్భంగా ఆమె మాట్లాడుతూ స్కానింగ్‌ సెంటర్లలో లింగ నిర్ధారణ పరీక్షలు నిర్వహిస్తే సంబంధిత రెడియాలాజిస్ట్‌, గైనకాలాజిస్ట్ బాధ్యులను చేసి చర్యలు తీసుకుంటామని అన్నారు. కరోనా నేపథ్యంలో అవగాహన కార్యక్రమాలు, వర్క్​‍షాపులు తక్కువగా నిర్వహించామని అన్నారు. రాబోయే రోజుల్లో ఆడపిల్లలు తక్కువగా ఉన్న ప్రాంతాలను గుర్తించి స్వచ్ఛంద సంస్థల సహకారంతో అవగాహన కార్యక్రమాలు చేపట్టాలని సమావేశంలో నిర్ణయించారు.

స్కానింగ్‌ సెంటర్‌లపై తనిఖీలు నిర్వహించాలని సమావేశంలో పలువురికి సూచించారు. ఈ సమావేశంలో డిప్యూటీ డీఎంహెచ్‌వో డాక్టర్‌ యాకూబ్‌పాషా, డాక్టర్‌ పద్మ, డాక్టర్‌ కళ్యాణి, లీగల్‌ అడ్వయిజర్‌ రేవతీ దేవి, జిల్లా మాస్ మీడియా అధికారి ఆశోక్‌రెడ్డి, సర్వోదయ సేవా సమితి ప్రతినిధి కవిరాజ్‌, సీహెచ్‌టీవో మాధవరెడ్డి పాల్గొన్నారు.