Thousand-Pillar Temple | గాయత్రిదేవి అలంకరణలో వేయిస్తంభాల రుద్రేశ్వరదేవి

చారిత్రిక రుద్రేశ్వరస్వామి వేయిస్తంభాల దేవాలయంలో శ్రీదేవిశరన్నవరాత్రి ఉత్సవాల్లో భాగంగా మంగళవారం మూడోరోజు రుద్రేశ్వరీదేవిని గాయత్రీ దేవిగా అలంకరించారు.

హనుమకొండ చౌరస్తా, అక్టోబర్‌ 13 : చారిత్రిక రుద్రేశ్వరస్వామి వేయిస్తంభాల దేవాలయంలో శ్రీదేవిశరన్నవరాత్రి ఉత్సవాల్లో భాగంగా మంగళవారం మూడోరోజు రుద్రేశ్వరీదేవిని గాయత్రీ దేవిగా అలంకరించారు. అమ్మవారికి ఐదు రకాల పిండి వంటలు నివేదన సమర్పించి భక్తులంతా గాయత్రీ మంత్ర పారాయణం చేస్తుండగా రుదేశ్వరిదేవిని సింహ వాహనంపై మంగళ వాయిద్యాలు మంగళ హారతులతో రుద్రేశ్వరీదేవికి జై అంటూ వాహనసేవ నిర్వహించారు. లోకకళ్యానార్థం గ్రామ, జిల్లా, రాష్ర్టంలో ప్రజలను కరువు కాటకాల నుంచి కాపాడాలని గణపతి నవగ్రహ రుద్ర హోమాలు మూలమంత్రయుక్తంగా వైదికోక్తంగా 18 అధ్యాయాలతో దేవి ఉపాసకులు భరత్‌ శర్మ మహా చండీయాగం నిర్వహించారు.

ఆలయ ప్రాంగణంలో వేలాది మంది భక్తులకు ఎమ్మెల్యే నాయిని రాజేందర్‌రెడ్డి దాతృత్వంలో నిత్యాన్నదానం చేశారు. సాయంకాలం తాడూరి రేణుక శిష్య బృందంచే కూచిపూడి నృత్యం నిర్వహించారు. పల్లకిసేవలో నీలం సుహాస్, ఉత్సవ కమిటీ ఉపాధ్యక్షులు పల్లం రమేష్‌, కోన శ్రీకర్‌, బండారి నరేష్‌, మాడిశెట్టి వరుణ్‌, సతీష్‌, నల్లెల లక్ష్మణ్‌, గుజ్జా సంపత్‌రావు సౌమ్య దంపతులు వాహన సేవలో పాల్గొని సేవలందించారు. ఆలయ ఈవో డి.అనిల్‌కుమార్‌ ఏర్పాట్లు పర్యవేక్షించారు. ఆలయ ప్రధానార్చకులు గంగు ఉపేంద్రశర్మ, గంగు మణికంఠశర్మ వైదిక కార్యక్రమాలు నిర్వహించారు.