మావోయిస్టులకు వ్యతిరేకంగా ర్యాలీ

ములుగు జిల్లా వాజేడు మండలం జగన్నాథపురంలో మావోయిస్టులకు వ్యతిరేకంగా మంగళవారం గ్రామస్తులు ర్యాలీ నిర్వహించారు.

వాజేడు, జూన్‌4 : ములుగు జిల్లా వాజేడు మండలం జగన్నాథపురంలో మావోయిస్టులకు వ్యతిరేకంగా మంగళవారం గ్రామస్తులు ర్యాలీ నిర్వహించారు. గ్రామానికి చెందిన ఇల్లందుల ఏసు సోమవారం వంట చెరకు కోసం కొంగాల అడవిలోకి వెళ్లి మావోయిస్టులు అమర్చిన మందుపాతర పేలి మృతి చెందిన నేపథ్యంలో నిరసన చేపట్టారు. జాతీయ రహదారిపై ఏసు కుటుంబసభ్యులతో పాటు బంధువులు, గ్రామస్తులు ర్యాలీ తీశారు. ‘మావోయిస్టుల పోరాటం అంటే అమాయకులు, మూగ జీవాలను చంపడమేనా?, అడవుల్లో స్వేచ్ఛగా తిరిగే హక్కు ఏజెన్సీవాసులకు లేదా’ అంటూ మావోయిస్టులకు వ్యతిరేకంగా నినాదాలు చేశారు.