జపాన్‌లో ఉద్యోగాల కోసం దరఖాస్తుల ఆహ్వానం

విదేశీ ఉద్యోగాల నియామకాల్లో భాగంగా జపాన్‌లో తెలంగాణ ఓవర్సీస్‌ మ్యాన్‌పవర్‌ కంపెనీ లిమిటెడ్‌ (టామ్‌కమ్‌) ఆధ్వర్యాన అర్హులైన నర్సింగ్‌ అభ్యర్థుల ఎంపిక కోసం రెండో పైలట్‌ బ్యాచ్‌ శిక్షణ కోసం దరఖాస్తులు కోరుతున్నట్లు వరంగల్‌ ఎంప్లాయ్‌మెంట్‌ ఆఫీసర్‌ మాధవి తెలిపారు. సోమవారం ఆమె ఒక ప్రకటన చేశారు

పోచమ్మమైదాన్‌, జనవరి 2: విదేశీ ఉద్యోగాల నియామకాల్లో భాగంగా జపాన్‌లో తెలంగాణ ఓవర్సీస్‌ మ్యాన్‌పవర్‌ కంపెనీ లిమిటెడ్‌ (టామ్‌కమ్‌) ఆధ్వర్యాన అర్హులైన నర్సింగ్‌ అభ్యర్థుల ఎంపిక కోసం రెండో పైలట్‌ బ్యాచ్‌ శిక్షణ కోసం దరఖాస్తులు కోరుతున్నట్లు వరంగల్‌ ఎంప్లాయ్‌మెంట్‌ ఆఫీసర్‌ మాధవి తెలిపారు. సోమవారం ఆమె ఒక ప్రకటన చేశారు. ఈ నెల 4 నుంచి కాకతీయ మెడికల్‌ కాలేజీ క్యాంపస్‌లోని గవర్నమెంట్‌ కాలేజ్‌ ఆఫ్‌ నర్సింగ్‌, మల్టీపర్పస్‌ కమ్యూనిటీ హాల్‌లో శిక్షణ ఇస్తారని ఆమె చెప్పారు.

ఇందు కోసం సంబంధిత కళాశాలలు, సంస్థల నుంచి బీఎస్సీ నర్సింగ్‌ గ్రాడ్యుయేట్లు, జీఎన్‌ఎం డిప్లొమా హోల్డర్లు దరఖాస్తు చేసుకోవచ్చన్నారు. ఎలాంటి అనుభవం లేకున్నా 22 నుంచి 35 సంవత్సరాల లోపు కలిగి ఉన్న వారు వీటికి అర్హులని ఆమె పేర్కొన్నారు. ఆసక్తిగల అభ్యర్థులు మెడికల్‌ కాలేజీలో జరిగే స్క్రీనింగ్‌ పరీక్షకు హాజరు కావాలన్నారు.

సూచించిన తేదీల్లో ఉదయం 10 గంటల లోపు రిపోర్టు చేయాలని వివరించారు. ఎంపికైన అభ్యర్థులకు జపనీస్‌ భాషపై రెసిడెన్షియల్‌ శిక్షణతోపాటు అక్కడ పనిచేయడానికి అవసరమైన అదనపు వృత్తిపరమైన నైపుణ్యాలు ఇస్తారని తెలిపారు. వారికి నెలకు రూ.1.20 లక్షల నుంచి రూ.1.50 లక్షలు ఇస్తారని వివరించారు. ఇతర వివరాలకు టామ్‌కామ్‌ హెచ్‌ఆర్‌ సెల్‌నంబర్లు 9100798204, 9908830438లో సంప్రదించాలని సూచించారు.