ముంబై : సోషల్ మీడియాలో మహిళలపై శక్తిమాన్ నటుడు ముఖేష్ ఖన్నా చేసిన వ్యాఖ్యలు పెనుదుమారం రేపాయి. యూట్యూబ్ చానెల్ను నడుపుతున్న ముఖేష్ ఖన్నా పలు అంశాలపై యూట్యూబ్ వేదికగా తన అభిప్రాయాలు వెల్లడిస్తుంటారు. తాజా వీడియోలో సెక్స్ కోసం యువకులను ఆకర్షించే యువతుల క్యారెక్టర్ను తప్పుపడుతూ వివాదాస్పద వ్యాఖ్యలు చేశారు.
లైంగిక వాంఛలు తీర్చాలని పురుషుడిని కోరేవారు మహిళలు కాదని వారు సెక్స్ వర్కర్లని ముఖేష్ ఖన్నా వ్యాఖ్యానించారు. నాగరిక సమాజానికి చెంది మంచిగా పెరిగిన బాలిక ఎవరూ లైంగిక వాంఛలు తీర్చాలని యువకుడిని కోరదని ఈ వీడియోలో ముఖేష్ ఖన్నా పేర్కొన్నారు. ఇంటర్నెట్లో వలపన్నే మగువల పట్ల పురుషులు జాగ్రత్తగా ఉండాలని ఆయన హితవు పలికారు.
అమాయక పురుషులే లక్ష్యంగా కొందరు మహిళలు రాకెట్లు నడిపి బ్లాక్మెయిల్ చేస్తున్నారని హెచ్చరించారు. మరోవైపు మహిళలు కూడా పరిమితుల్లో ఉండాలని సంప్రదాయాలు, కట్టుబాట్లను గౌరవించాలని అన్నారు. ఇక ముఖేష్ ఖన్నా వ్యాఖ్యలపై నెటిజన్లు భగ్గుమన్నారు. ముఖేష్ ఖన్నా వ్యాఖ్యలపై ఆయన ఓ సెక్సిస్ట్ అని పలువురు నెటిజన్లు కామెంట్లు చేశారు.