హైదరాబాద్ : గ్లోబల్ రౌండ్ యూనివర్శిటీ ర్యాంకింగ్(ఆర్యూఆర్) 2021 లో హైదరాబాద్ విశ్వవిద్యాలయం అగ్ర సంస్థలలో ఒకటిగా స్థానం సంపాదించింది. ఆర్యూఆర్ ర్యాంకింగ్స్లో మొత్తం 13 భారతీయ విద్యాసంస్థలు చోటుసంపాదించాయి. ఐఐఎస్సీ, ఐఐటీలు, ఐఐఎస్ఇఆర్-పూణేల తరువాత ర్యాంక్ పొందిన ఏకైక విశ్వవిద్యాలయం హైదరాబాద్ విశ్వవిద్యాలయం అని వర్సిటీ తెలిపింది.
2021లో విశ్వవిద్యాలయ ప్రపంచ ర్యాంక్ 350 గా ఉంది. ఇదే 2020 లో 363వ స్థానంలో ఉంది. అదే బోధనా ర్యాంక్ ప్రపంచవ్యాప్తంగా 84 గా ఉందని వెల్లడించింది. క్లారివేట్ అనలిటిక్స్ భాగస్వామ్యంతో ఆర్యూఆర్ 2021 ప్రపంచ విశ్వవిద్యాలయ ర్యాంకింగ్స్ను మంగళవారం విడుదల చేసింది. ప్రపంచ వ్యాప్తంగా 85 దేశాల నుండి 1,150 విశ్వవిద్యాలయాలు ఈ ర్యాక్సింగ్స్లో పాల్గొన్నాయి. బోధన, పరిశోధన, అంతర్జాతీయ వైవిధ్యం, ఆర్థిక స్థిరత్వం అనే నాలుగు అంశాలను సర్వేలో పరిగణలోకి తీసుకున్నారు.
గ్లోబల్ ర్యాంకింగ్పై వర్సిటీ వీసీ ప్రొఫెసర్ అప్పా రావు పోడిలే మాట్లాడుతూ.. తమ విశ్వవిద్యాలయం టాప్ 350 ప్రపంచ సంస్థలలో స్థానం సంపాదించడం చాలా గొప్ప అనుభూతినిచ్చిందన్నారు. ఆర్యూఆర్లో మొదటి ఆరు సంస్థలలో ఉన్న ఏకైక భారతీయ విశ్వవిద్యాలయం తమదన్నారు. తమ అధ్యాపకుల అద్భుతమైన పరిశోధనలు, యువ సహోద్యోగులకు సరైన దిశా నిర్దేశం అందించడంలోనూ, బోధనతో సహా అన్ని డొమైన్లలో చేసిన కృషికిగాను ఈ గుర్తింపు దక్కిందని వీసీ పేర్కొన్నారు.