ఇండస్ట్రియల్‌ కారిడార్లకు దక్కని చోటు

ఇండస్ట్రియల్‌ కారిడార్లకు బడ్జెట్‌లో నిధులు కేటాయిస్తే తెలంగాణకు మరిన్ని పరిశ్రమలు వచ్చే ఆస్కారం ఉండగా, తాజా పరిణామాలతో వీటి కోసం మరికొంతకాలం వేచిచూడక తప్పని పరిస్థితి ఏర్పడింది.

హైదరాబాద్‌, ఫిబ్రవరి 1 (నమస్తే తెలంగాణ): ఇండస్ట్రియల్‌ కారిడార్లకు బడ్జెట్‌లో నిధులు కేటాయిస్తే తెలంగాణకు మరిన్ని పరిశ్రమలు వచ్చే ఆస్కారం ఉండగా, తాజా పరిణామాలతో వీటి కోసం మరికొంతకాలం వేచిచూడక తప్పని పరిస్థితి ఏర్పడింది. మధ్యంతర బడ్జెట్‌లో కారిడార్ల ఊసేలేదు. రాష్ర్టానికి బహుళ ప్రయోజనాలు ఉండటంతో ఎలాగైనా ఇండస్ట్రియల్‌ కారిడార్లు ఏర్పాటు చేయాలని గత కేసీఆర్‌ సర్కారు ఎప్పుడో ప్రతిపాదించింది. ఇందులో నాగపూర్‌-హైదరాబాద్‌, హైదరాబాద్‌-విజయవాడ, హైదరాబాద్‌-వరంగల్‌ కారిడార్లున్నాయి.

నాగపూర్‌-హైదరాబాద్‌కు గతంలోనే కేంద్రం ఆమోదం తెలిపినప్పటికీ తుది అనుమతులు రావాల్సి ఉన్నది. కాగా, హైదరాబాద్‌-విజయవాడ, హైదరాబాద్‌-వరంగల్‌ కారిడార్లకు ఇంతవరకు కేంద్రం నుంచి ఎటుంటి అనుమతి రాలేదు. నిజానికి అనేకసార్లు అప్పటి కేసీఆర్‌ ప్రభుత్వం కేంద్రానికి రకరకాలుగా విజ్ఞప్తి చేసింది. అయినా.. తెలంగాణపట్ల తీవ్ర వివక్షను ప్రదర్శిస్తున్న కేంద్ర ప్రభుత్వం.. వీటికి అనుమతులు ఇవ్వకుండా తాత్సారం చేస్తూ వచ్చింది. ఇప్పుడు బడ్జెట్‌లోనూ చుక్కెదురైంది.