అమెరికాలో రోడ్డు ప్ర‌మాదం… తెలంగాణ యువ‌కుల దుర్మ‌ర‌ణం

అమెరికాలో జ‌రిగిన రోడ్డు ప్ర‌మాదంలో తెలంగాణ‌కు చెందిన ఇద్ద‌రు యువ‌కులు దుర్మ‌ర‌ణం పాల‌య్యారు. మ‌రో ముగ్గురు యువ‌కులు తీవ్రంగా గాయ‌ప‌డ్డారు. అమెరికాలోని యూనియ‌న్ కౌంటిలోని ఇల్లినాయిస్‌ రూట్ నెం.3 ద‌గ్గ‌ర గురువారం రెండు కార్లు ఢీకొన‌డంతో ఈ ప్ర‌మాదం జ‌రిగింది. ఈ ప్ర‌మాదంలో ఎదుటి కారు డ్రైవ‌ర్ కూడా మ‌ర‌ణించారు.

ఈ యువ‌కులు స‌ద‌ర‌న్ ఇల్లినాయిస్‌ యూనివ‌ర్శిటీ కార్బ‌న్‌డోల్‌లో చ‌దువుకుంటున్నారు. వంశీకృష్ణ పెచ్చెట్టి (23) న‌గ‌రంలోని నిజాంపేట్‌కు చెందిన‌వాడు. వంశీకృష్ణ మ‌ర‌ణ వార్త విన‌గానే రెడ్డి రెవిన్యూలో విషాద ఛాయ‌లు అలుముకున్నాయి. ఇక‌… ఈ ప్ర‌మాదంలో మ‌ర‌ణించిన మ‌రో విద్యార్థి ప‌వ‌న్ స్వ‌ర్ణ స్వ‌స్థ‌లం ఖ‌మ్మం. క‌ల్యాణ్ ద్రోణ‌, కార్తిక్ కాకుమాను, య‌శ్వంత్ ఉప్ప‌ల‌పాటి గాయ‌ప‌డిన వారిలో వున్నారు.

ఈ ప్ర‌మాదంపై వంశీకృష్ణ పిచ్చెట్టి సోద‌రుడు శ‌శికిర‌ణ్ పెచ్చెట్టి స్పందించారు. ఓ కారు మా సోద‌రుడి కారుకి ఎదురుగా వేగంతో వ‌చ్చి ఢీకొట్టింది. ఈ దుర‌దృష్ట‌మైన ఘ‌ట‌న‌లో ఇద్ద‌రు విద్యార్థులు మ‌ర‌ణించారు. మ‌రో ముగ్గురు గాయ‌ప‌డ్డారు. వంశీ డ్రైవ‌ర్ వెన‌క సీటులో కూర్చున్నాడు. వీరందరూ కార్బ‌న్‌డోల్‌లోని స‌ద‌ర‌న్ ఇల్లినాయిస్ యూనివ‌ర్శిటీలో మాస్ట‌ర్స్ ఇన్ కంప్యూట‌ర్ విద్యను అభ్య‌సిస్తున్నారు అంటూ వంశీకృష్ణ సోద‌రుడు శ‌శికిర‌ణ్ పిచ్చెట్టి తెలిపారు. ఇక‌.. ఈ ఇద్ద‌రు విద్యార్థుల మృతికి యూనివ‌ర్శిటీ కూడా సంతాపం తెలిపింది.