భారీ బెట్టింగ్‌ ముఠా గుట్టు రట్టు.. సీఐడీ స్పెషల్‌ ఆపరేషన్‌లో 11 మంది అరెస్టు

ఆన్‌లైన్‌ బెట్టింగ్‌ కార్యకలాపాలపై సీఐడీ పోలీసులు ఉకుపాదం మోపారు. ‘డఫాబెట్‌' పేరుతో దేశవ్యాప్తంగా ఆన్‌లైన్‌ బెట్టింగ్‌లు నిర్వహిస్తున్న భారీ నెట్‌వర్‌ను ఛేదించి, 11 మంది నిందితులను అరెస్టు చేశారు.

• రూ.3.21 లక్షలు, 3 కార్లు, 26 ఫోన్లు స్వాధీనం

హైదరాబాద్‌, జూన్‌ 1 (నమస్తే తెలంగాణ): ఆన్‌లైన్‌ బెట్టింగ్‌ కార్యకలాపాలపై సీఐడీ పోలీసులు ఉకుపాదం మోపారు. ‘డఫాబెట్‌’ పేరుతో దేశవ్యాప్తంగా ఆన్‌లైన్‌ బెట్టింగ్‌లు నిర్వహిస్తున్న భారీ నెట్‌వర్‌ను ఛేదించి, 11 మంది నిందితులను అరెస్టు చేశారు. వారి నుంచి 3 విలాసవంతమైన బీఎండబ్ల్యూ, మెర్సిడెస్‌, కియా సెల్టోస్‌ కార్లు, 8 ల్యాప్‌టాప్‌లు, 2 ఐప్యాడ్‌లు, 26 మొబైల్‌ ఫోన్లు, 5 పాస్‌పోర్టులు, రూ.3.21 లక్షల నగదును స్వాధీనం చేసుకున్నట్లు సీఐడీ డీజీ చారుసిన్హా సోమవారం మీడియా సమావేశంలో వెల్లడించారు. దేశంలోని పలు రాష్ట్రాల్లో ఈ ముఠా కార్యకలాపాలు నిర్వహిస్తూ కోట్ల రూపాయల అక్రమ లావాదేవీలు జరిపినట్టు దర్యాప్తులో వెల్లడైందని తెలిపారు.

కరీంనగర్‌కు చెందిన ఓ సాఫ్ట్‌వేర్‌ ఇంజినీర్‌ 2024-2025 జనవరి మధ్య బెట్టింగ్‌లలో రూ.9.95 లక్షలు కోల్పోయినట్టు పోలీసులకు చెప్పాడని, అతని ఫిర్యాదు మేరకు ఈ ముఠాపై కేసు నమోదైందని చెప్పారు. నిందితులు 8 స్థాయిల్లో 46 మధ్యవర్తి బ్యాంకు ఖాతాల ద్వారా బెట్టింగ్‌ డబ్బును సేకరించి, ఇతర ఖాతాలకు మళ్లించినట్టు దర్యాప్తులో తేలిందని వివరించారు. ఆన్‌లైన్‌ బెట్టింగ్‌పై ఇప్పటికే 414 కేసులు నమోదు చేశారని డీజీ చారుసిన్హా తెలిపారు.