అంతరిక్ష అంగడి.. తెలంగాణ స్పేస్‌టెక్‌

తెలంగాణ స్పేస్‌ టెక్నాలజీపై దృష్టి కేంద్రీకరించింది. స్పేస్‌టెక్‌ పరిశ్రమలో ఉపగ్రహాల వంటి అప్‌స్ట్రీమ్‌ విభాగాలు, ఐప్లెడ్‌ ఆర్టిఫిషియల్‌ ఇంటెలిజెన్స్‌ వంటివి వేగంగా వృద్ధి చెందే ఆస్కారం ఉన్నది. జాతీయ విధానాల మద్దతు, ప్రైవేట్‌ భాగస్వామ్యం ఉండటంతో

తెలంగాణ స్పేస్‌టెక్‌ ఫ్రేమ్‌వర్క్‌ ప్రారంభం
స్పేస్‌ హబ్‌గా మారే అన్ని అర్హతలు హైదరాబాద్‌ సొంతం
రోదసి సాంకేతికతకు గమ్యస్థానంగా మార్చేందుకు కృషి
ఇప్పటికే అత్యుత్తమ ఏరోస్పేస్‌ స్టార్టప్‌లు
మన సాంకేతికతను ప్రపంచానికి ఎగుమతి చేద్దాం
కొత్త శిఖరాలకు భారత అంతరిక్ష రంగం
దేశ శాస్త్రవేత్తలకు మంత్రి కేటీఆర్‌ పిలుపు

తెలంగాణ స్పేస్‌ టెక్నాలజీపై దృష్టి కేంద్రీకరించింది. స్పేస్‌టెక్‌ పరిశ్రమలో ఉపగ్రహాల వంటి అప్‌స్ట్రీమ్‌ విభాగాలు, ఐప్లెడ్‌ ఆర్టిఫిషియల్‌ ఇంటెలిజెన్స్‌ వంటివి వేగంగా వృద్ధి చెందే ఆస్కారం ఉన్నది. జాతీయ విధానాల మద్దతు, ప్రైవేట్‌ భాగస్వామ్యం ఉండటంతో రాష్ట్రం మరిన్ని ఆవిష్కరణలకు సహకారం అందిస్తుంది.

స్పేస్‌ టెక్‌లో విదేశాల్లో ఎంతోమంది నూతన ఆవిష్కరణలు చేశారు. వారిలో ఎక్కువ మంది భారతీయులే. దేశంలోనే సాంకేతికతను నిర్మించి, ఎగుమతి చేయాలి. దేశంలో అంతరిక్ష పరిశ్రమ 2026 నాటికి 558 బిలియన్‌ డాలర్లకు చేరుతుందని అంచనా. ఇందులో మనం ఎక్కువ వాటా సాధించాలి. – తెలంగాణ స్పేస్‌టెక్‌ ఫ్రేమ్‌వర్క్‌ ప్రారంభోత్సవంలో మంత్రి కేటీఆర్‌

హైదరాబాద్‌, ఏప్రిల్‌ 18 (నమస్తే తెలంగాణ): అంతరిక్ష సంబంధిత కార్యకలాపాలకు కేంద్రంగా మారేందుకు అన్ని అర్హతలు హైదరాబాద్‌కు ఉన్నాయని పరిశ్రమలు, ఐటీ శాఖల మంత్రి కే తారకరామారావు తెలిపారు. ఇక్కడ ఏరోస్పేస్‌, డిఫెన్స్‌ రంగాలకు అవసరమయ్యే వాతావరణం ఏర్పడిందని, గ్లోబల్‌ సప్లయ్‌ చైన్‌లో కూడా ఉన్నందున స్పేస్‌ హబ్‌గా అవకాశం ఉన్నదని వెల్లడించారు. నగరానికి చెందిన ఎస్‌ఎంఈలే ఇస్రో మార్స్‌ ఆర్బిటర్‌ మిషన్‌కు 30 శాతానికి పైగా భాగాలను సరఫరా చేశాయని గుర్తు చేశారు. ధ్రువ, స్కైరూట్‌ ఏరోస్పేస్‌ వంటి అత్యుత్తమ స్టార్టప్‌లూ ఇక్కడే ఉన్నాయని చెప్పారు. సోమవారం మెటావర్స్‌లో ‘తెలంగాణ స్పేస్‌ టెక్‌ ఫ్రేమ్‌వర్క్‌’ను మంత్రి కేటీఆర్‌ ప్రారంభించారు.

ఈ కార్యక్రమంలో నీతిఆయోగ్‌ సీఈవో అమితాబ్‌కాంత్‌, ఇస్రో చైర్మన్‌ సోమనాథ్‌, ఇన్‌-స్పేస్‌ చైర్మన్‌ పవన్‌ గోయెంకా, రాష్ట్ర పరిశ్రమల శాఖ ముఖ్య కార్యదర్శి జయేశ్‌ రంజన్‌తోపాటు పలువురు పరిశ్రమ వర్గాల ప్రతినిధులు పాల్గొన్నారు. ఈ సందర్భంగా మంత్రి కేటీఆర్‌ మాట్లాడుతూ.. తెలంగాణ అనేక రంగాల్లో అభివృద్ధి సాధించి, తాజాగా స్పేస్‌ టెక్నాలజీపై దృష్టి కేంద్రీకరించినట్టు చెప్పారు. స్పేస్‌టెక్‌ పరిశ్రమలో ఉపగ్రహాల వంటి అప్‌స్ట్రీమ్‌ విభాగాలు, ఐప్లెడ్‌ ఆర్టిఫిషియల్‌ ఇంటెలిజెన్స్‌ వంటివి వేగంగా వృద్ధి చెందే ఆస్కారం ఉన్నదని అన్నారు. జాతీయ విధానాల మద్దతు, ప్రైవేట్‌ భాగస్వామ్యం ఉండటంతో రాష్ట్ర ప్రభుత్వం మరిన్ని ఆవిష్కరణలకు సహకారం అందిస్తుందని తెలిపారు. స్పేస్‌ టెక్‌లో విదేశాల్లో ఎంతోమంది నూతన ఆవిష్కరణలు చేశారని, అందులో ఎక్కువ మంది మన భారతీయ శాస్త్రవేత్తలు, ఇంజినీర్లే ఉన్నారని చెప్పారు. భారతీయ శాస్త్రవేత్తలు మన దేశంలోనే సాంకేతికతను నిర్మించి, ప్రపంచానికి ఎగుమతి చేయాల్సిన సమయం ఆసన్నమైందని పిలుపునిచ్చారు. దేశంలో అంతరిక్ష పరిశ్రమ 2026 నాటికి 558 బిలియన్‌ డాలర్లకు చేరుతుందన్న అంచనా ఉన్నదని, ఇందులో మనం ఎక్కువ వాటాను సాధించాల్సిన సమయం వచ్చిందని స్పష్టం చేశారు.

 

ఎమర్జింగ్‌ టెక్నాలజీలపైనా దృష్టి
మల్టీమీడియా, యానిమేషన్‌, గేమింగ్‌ అండ్‌ ఎంటర్‌టైన్‌మెంట్‌ తదితర రంగాల్లోనూ ఎంతో ప్రగతిని సాధించినట్టు కేటీఆర్‌ చెప్పారు. రాష్ట్రంలోని 1,500 స్టార్టప్స్‌ మెంటార్‌షిప్‌ సహకారాన్ని సాధించాయని, రూ.1,800 కోట్లకుపైగా నిధులు సమీకరించాయని అన్నారు. 2016లో తెలంగాణ ఐసీటీ పాలసీని ప్రవేశపెట్టి నేడు ఎంతో ప్రగతిని సాధించిందని తెలిపారు. ఎమర్జింగ్‌ టెక్నాలజీస్‌పై దృష్టి సారించామని, ఆర్టిఫిషియల్‌ ఇంటెలిజెన్స్‌, బ్లాక్‌చెయిన్‌ టెక్నాలజీ, డ్రోన్స్‌, క్లౌడ్‌ తదితర వాటిని అమలుచేస్తున్నామని వెల్లడించారు. ఔషధాల రవాణా కోసం డ్రోన్‌ ఆధారిత మెడిసిన్‌ ఫ్రమ్‌ స్కై, వ్యవసాయ ఆధారిత స్టార్టప్స్‌ వృద్ధికి సాగు-బాగు, 31 జిల్లాల్లో పచ్చదనం పెంపునకు 12,000 హెక్టార్లలో ఏరియల్‌ సీడింగ్‌ కోసం హరా-భరా, లైఫ్‌ సర్టిఫికెట్ల జారీ, డ్రైవింగ్‌ లైసెన్సుల రెన్యూవల్‌ తదితరాల కోసం రియల్‌ టైం డిజిటల్‌ అథెంటికేషన్‌ ఆఫ్‌ ఐడెంటిటీ (ఆర్‌టీడీఏఐ), స్మార్ట్‌ఫోన్‌ ఆధారిత ఈ-ఓటింగ్‌ సొల్యూషన్స్‌ తదితర ప్రాజెక్టులు చేపట్టామని గుర్తు చేశారు. తెలంగాణ ఆర్టిఫిషియల్‌ ఇంటెలిజెన్స్‌ మిషన్‌(టీ-ఏఐఎం), మెంటార్‌షిప్‌ ప్రోగ్రామ్‌, సైబర్‌ సెక్యూరిటీ సెంటర్‌ ఆఫ్‌ ఎక్స్‌లెన్స్‌ను ఏర్పాటు చేసినట్టు వివరించారు.

తెలంగాణ ప్రముఖ పాత్ర పోషిస్తుంది : అమితాబ్‌ కాంత్‌
స్పేస్‌టెక్‌ ఫ్రేమ్‌వర్క్‌ను తెలంగాణ ప్రభుత్వం విడుదల చేయడం సంతోషంగా ఉన్నదని నీతిఆయోగ్‌ సీఈవో అమితాబ్‌కాంత్‌ అన్నారు. అంతరిక్ష రంగంలో ఇస్రో ఎంతగానో అభివృద్ధి చెందిందని, దేశం స్పేస్‌ టెక్నాలజీలో గ్లోబల్‌ లీడర్‌గా ఎదిగేందుకు అవసరమైన అవకాశాలు ఉన్నాయని చెప్పారు. ఇందులో తెలంగాణ ప్రముఖ పాత్ర పోషిస్తుందని ఆశాభావం వ్యక్తంచేశారు. ఇస్రో చైర్మన్‌ సోమనాథ్‌ మాట్లాడుతూ.. తెలంగాణ స్పేస్‌టెక్‌ ఫ్రేమ్‌వర్క్‌ లక్ష్యాలు బాగున్నాయని ప్రశంసించారు. స్పేస్‌ టెక్నాలజీకి అవసరమైన వాతావరణం తెలంగాణలో ఉన్నదని, పలు స్టార్టప్స్‌, డిఫెన్స్‌ రంగంలో కంపెనీలు ఉన్నాయని తెలిపారు. మిథానీ, ఎంటీఏఆర్‌, వెమ్‌ తదితర పబ్లిక్‌, ప్రైవేటు సంస్థలు రాష్ట్రంలో కార్యకలాపాలు సాగిస్తుండటం స్పేస్‌ రంగాభివృద్ధికి సహకరిస్తుందని అన్నారు. అనంతరం మంత్రి కేటీఆర్‌ స్పేస్‌ టెక్‌ ఎన్‌ఎఫ్‌టీ (నాన్‌ ఫంగబుల్‌ టోకెన్‌) కలెక్షన్‌ను ప్రారంభించారు. ఎన్‌ఎఫ్‌టీ విక్రయాల ద్వారా వచ్చే ఆదాయాన్ని సోషల్‌ టెక్‌ ప్రాజెక్టుల్లో ఒకదానికి ఉపయోగిస్తామని పేర్కొన్నారు.

మెటావర్స్‌ అంటే..
వర్చువల్‌ రియాలిటీ, ఆగుమెంటెండ్‌ రియాలిటీ, ఇమ్మర్సివ్‌ టెక్నాలజీ, సోషల్‌ మీడియా, ఆర్టిఫిషియల్‌ ఇంటెలిజెన్స్‌ల కలయిక. ఒక్క మాటలో చెప్పాలంటే అభివృద్ధి చెందిన టెక్నాలజీల కలబోత. డిజిటల్‌ ప్రపంచంతో అనుసంధానమయ్యే సాంకేతికత. ఏదైనా ఒక చోటున లేకున్నా, అక్కడే ఉన్నట్టు, అక్కడి వారితో సంభాషణలు జరపవచ్చు. ఇందులో ప్రతీది వర్చువల్‌. వాస్తవికంగా ఏదీ జరుగదు.

తెలంగాణ స్పేస్‌ టెక్‌ ఫ్రేమ్‌ వర్క్‌ చేసేదేంటి?
అత్యాధునిక సాంకేతిక పరిజ్ఞానం ద్వారా వ్యవసాయం, పట్టణ ప్రణాళిక-అభివృద్ధి, విపత్తుల నిర్వహణ, పర్యావరణం-సహజ వనరుల పరిరక్షణ, ఇంటర్నెట్‌-కమ్యూనికేషన్‌ తదితర రంగాల అభివృద్ధే లక్ష్యంగా రాష్ట్ర ప్రభుత్వం దీన్ని ప్రారంభించింది. అంతరిక్ష రంగానికి చెందిన మౌలిక సదుపాయాల అభివృద్ధి, వ్యాపారాభివృద్ధి, కంపెనీల మధ్య సమన్వయానికి అవసరమైన చర్యలు, నైపుణ్యాభివృద్ధి, శిక్షణ, పరిశోధనలు, ఆవిష్కరణలకు ప్రోత్సాహం వంటి చర్యలను రాష్ట్ర ప్రభుత్వం చేపడుతుంది.

 

తెలంగాణను వన్‌-స్టాప్‌ డెస్టినేషన్‌గా తీర్చిదిద్దేందుకు కృషి

స్పేస్‌టెక్‌ పర్యావరణ వ్యవస్థను మరింత వేగవంతం చేస్తూ, ప్రపంచంలోనే స్పేస్‌ టెక్నాలజీలో తెలంగాణను వన్‌-స్టాప్‌ డెస్టినేషన్‌గా తీర్చిదిద్దేందుకు కృషిచేస్తామని కేటీఆర్‌ అన్నారు. పరిశ్రమలు, విద్యాసంస్థలకు అవసరమైన సహకారాన్ని అందిస్తామని చెప్పారు. ఇస్రో, ఇన్‌-స్పేస్‌, నీతిఆయోగ్‌, ఇండియన్‌ ఇన్‌స్టిట్యూట్‌ ఆఫ్‌ సైన్స్‌ అండ్‌ టెక్నాలజీ (ఐఐఎస్‌టీ), హైదరాబాద్‌కు చెందిన ఐఐటీ, ఐఐఐటీ, ఏఆర్‌సీఐ, ఎన్‌ఆర్‌ఎస్‌సీ తదితర సంస్థలతో కలిసి పనిచేస్తామని తెలిపారు.

అందరం కలిసి భారత అంతరిక్ష సాంకేతిక రంగాన్ని కొత్త శిఖరాలకు తీసుకొని వెళ్దామని మంత్రి పిలుపునిచ్చారు. తెలంగాణ వేగంగా అభివృద్ధి చెందుతున్న యువ రాష్ట్రమని, అనతి కాలంలోనే స్టార్టప్స్‌ స్టేట్‌గా గుర్తింపు పొందిందని వెల్లడించారు. దేశంలోనే అతిపెద్ద ఇంక్యుబేటర్‌ టీ-హబ్‌, తెలంగాణ ఇన్నోవేషన్‌ సెల్‌, మహిళా ఔత్సాహిక పారిశ్రామికవేత్తల కోసం వీ-హబ్‌, రిసెర్చ్‌ ఇన్నోవేషన్‌ సర్కిల్‌ ఆఫ్‌ హైదరాబాద్‌, తెలంగాణ అకాడమీ ఆఫ్‌ స్కిల్‌ అండ్‌ నాలెడ్జ్‌(టాస్క్‌), టీ-వర్క్స్‌, ఎమర్జింగ్‌ టెక్నాలజీస్‌ వింగ్‌ను ఏర్పాటు చేశామని వివరించారు.