Telangana | సర్కారు దీపావళి కానుక.. ఉద్యోగులకు ఒక డీఏ!

Telangana | రాష్ట్రంలోని ఉద్యోగ, ఉపాధ్యాయులు, పెన్షనర్లకు దీపావళి కానుకగా ఒక్క డీఏ ఇవ్వాలని రాష్ట్ర క్యాబినెట్‌ నిర్ణయించింది. నవంబర్‌ మొదటివారంలో సామాజిక, ఆర్థిక, కులగణన సర్వే ప్రారంభించి, నెలాఖరులోగా పూర్తి చేయాలని నిర్ణయం తీసుకున్నది.

• 317 జీవోలో స్పౌజ్‌, హెల్త్‌, మ్యూచువల్‌ ట్రాన్స్‌ఫర్లు
• కేంద్రానికి 76.4 కి.మీ. హైదరాబాద్‌ మెట్రో డీపీఆర్‌
• నవంబర్‌ నెలాఖరులోగా కులగణన సర్వే పూర్తి
• గిరిజన యూనివర్సిటీకి 211 ఎకరాల స్థలం
• యంగ్‌ ఇండియా స్పోర్ట్స్‌ వర్సిటీకి గచ్చిబౌలి స్టేడియం
• స్కిల్‌ యూనివర్సిటీకి అనుబంధంగా 3 ఐటీఐలు
• ప్రతి నియోజకవర్గానికి 3,500 ఇందిరమ్మ ఇండ్లు
• ఉస్మానియాకు గోషామహల్‌ పోలీస్‌ గ్రౌండ్‌
• రాష్ట్ర క్యాబినెట్‌ సమావేశంలో నిర్ణయాలు

Telangana | హైదరాబాద్‌, అక్టోబర్‌ 26 (నమస్తే తెలంగాణ): రాష్ట్రంలోని ఉద్యోగ, ఉపాధ్యాయులు, పెన్షనర్లకు దీపావళి కానుకగా ఒక్క డీఏ ఇవ్వాలని రాష్ట్ర క్యాబినెట్‌ నిర్ణయించింది. నవంబర్‌ మొదటివారంలో సామాజిక, ఆర్థిక, కులగణన సర్వే ప్రారంభించి, నెలాఖరులోగా పూర్తి చేయాలని నిర్ణయం తీసుకున్నది. సీఎం రేవంత్‌ రెడ్డి అధ్యక్షతన శనివారం సచివాలయంలో మంత్రి మండలి సమావేశమైంది. ఈ సందర్భంగా తీసుకున్న నిర్ణయాలను మంత్రులు పొంగులేటి శ్రీనివాస్‌రెడ్డి, పొన్నం ప్రభాకర్‌ మీడియాకు వివరించారు.

• మొదటి విడతగా ప్రతి అసెంబ్లీ నియోజకవర్గానికి 3,500 ఇందిరమ్మ ఇండ్లు మంజూరు. దీపావళి తర్వాత ప్రతి గ్రామంలో గ్రామసభ నిర్వహించి కుల, మతాలకతీతంగా అతి పేదలకు ఇండ్ల కేటాయింపు.
• జీవో 317పై క్యాబినెట్‌ సబ్‌ కమిటీ నివేదిక ఆధారంగా హెల్త్‌, స్పౌజ్‌, మ్యూచువల్‌ ట్రాన్స్‌ఫర్లు వెంటనే చేయాలని నిర్ణయం. 317లోని ఇతర అంశాలపై, జీవో 46పై అసెంబ్లీ సమావేశాల్లో చర్చించి, క్లియరెన్స్‌ కోసం కేంద్రానికి పంపాలని నిర్ణయం.
• నవంబర్‌ 31లోపు సామాజిక, ఆర్థిక, కుల సర్వే పూర్తి చేయాలని నిర్ణయం.
• రాష్ట్రవ్యాప్తంగా 6 వేలకుపైగా ధాన్యం సేకరణ కేంద్రాల ఏర్పాటు. రైస్‌ మిల్లర్ల వద్ద గతంలో ఇచ్చిన రూ.20 వేల కోట్ల ధాన్యం మిగిలిపోగా మిల్లర్లలో క్లీన్‌ చిట్‌ ఉన్నవారిని ఒక క్యాటగిరీ, నోటీసులు ఇచ్చిన తర్వాత డబ్బులు కట్టినవారిని రెండో క్యాటగిరీ, వాళ్లు కట్టకపోతే ప్రభుత్వమే రికవరీ చేసినవారిని మూడో క్యాటగిరీలో ఉంచి, డిఫాల్టర్లను ఎలిమినేట్‌ చేయాలని నిర్ణయం. ఈ సీజన్‌లో ప్రభుత్వం సేకరించే ధాన్యానికి సంబంధించి క్యాటగిరీలను బట్టి బ్యాంకు గ్యారెంటీలు తీసుకోవాలని నిర్ణయం.
  హైదరాబాద్‌ మెట్రోరైలు రెండో దశకు సంబంధించి నాగోల్‌-శంషాబాద్‌, రాయదుర్గం-కోకాపేట, ఎంజీబీఎస్‌-చాంద్రాయణగుట్ట, మియాపూర్‌-పటాన్‌చెరు, ఎల్బీనగర్‌-హయత్‌ నగర్‌ మార్గాల్లో 76.4 కిలోమీటర్ల మేర కొత్త మెట్రోరైలు ఏర్పాటుకు రూ.24,269 కోట్లకు డీపీఆర్‌ సిద్ధమైంది. కేంద్ర, రాష్ట్ర ప్రభుత్వాల ఆధ్వర్యంలో పీపీపీ పద్ధతిలో ప్రాజెక్టు చేపట్టేందుకు డీపీఆర్‌ను కేంద్రానికి పంపాలని నిర్ణయం.
• పంచాయతీరాజ్‌, ఆర్‌అండ్‌బీ శాఖల పరిధిలో సుమారు 16-17 వేల కిలోమీటర్ల రహదారులు నిర్మించాల్సి ఉన్నది. ఇందుకు రూ.25-28వేల కోట్లు అవసరమని అంచనా. పాత జిల్లాను ఒక యూనిట్‌గా తీసుకొని నాలుగేండ్లలో పీపీపీ పద్ధతిలో ఈ రోడ్లు నిర్మించాలని నిర్ణయం. ఈ మేరకు డీపీఆర్‌ తయారు చేసేందుకు అన్ని శాఖల ఇంజినీరింగ్‌ శాఖల ముఖ్య అధికారులతో కమిటీ.
• గోషామహల్‌ పోలీస్‌ గ్రౌండ్‌ను ఉస్మానియా దవాఖాన నిర్మాణానికి బదిలీ చేసేందుకు ఆమోదం.
• ములుగు గిరిజన విశ్వవిద్యాలయానికి 211 ఎకరాల స్థలం కేటాయింపు.
• యంగ్‌ ఇండియా స్పోర్ట్స్‌ యూనివర్సిటీ కోసం గచ్చిబౌలి స్టేడియం వాడాలని నిర్ణయం.
• స్కిల్‌ యూనివర్సిటీకి అనుబంధంగా మదిర, వికారాబాద్‌, హుజూర్‌నగర్‌లో ఐటీఐలు ఏర్పాటు.
• రాష్ట్రంలో కొత్తగా 8 ప్రాంత్లాలో ఏర్పాటు చేసిన కోర్టులకు, మరో రెండు కాలేజీలకు స్టాఫ్‌ మంజూరు.
• రిజర్వాయర్లలో సిల్ట్‌ తొలగింపునకు కడెం ప్రాజెక్టు ఎంపిక.

4 నుంచి కులగణన : మంత్రి పొన్నం

సమగ్ర కుల గణన సర్వేకు సంబంధించిన విధివిధానాలను క్యాబినెట్‌ ఆమోదించిందని మంత్రి పొన్నం ప్రభాకర్‌ చెప్పారు. నవంబర్‌ 30లోపు సర్వే పూర్తి చేయాలని నిర్ణయం తీసుకున్నట్టు తెలిపారు. సోమవారం కలెక్టర్లతో సదస్సు నిర్వహిస్తామని, జిల్లా, మండల అధికారులకు శిక్షణ ఇస్తామని వివరించారు. నవంబర్‌ 4 లేదా 5 నుంచి సర్వే ప్రారంభమవుతుందన్నారు. సమాచార సేకరణకు సంబంధించి ప్రతి 150 ఇండ్లకు ఒక బృందాన్ని ఏర్పాటు చేస్తామని చెప్పారు. మొత్తం 20 రోజుల్లోపు ప్రక్రియ పూర్తిచేస్తామని, ఈ వివరాలతో నివేదికను ప్రజలకు అందుబాటులో ఉంచుతామన్నారు. ఉద్యోగులకు దీపావళి కానుకగా డీఏ ఇస్తున్నామని, ఖజానాపై నెలకు రూ.230 కోట్ల భారం పడుతుందని తెలిపారు.

ప్రభుత్వ తీరు అవమానకరం

ఉద్యోగ, ఉపాధ్యాయ, పెన్షనర్లకు న్యాయ సమ్మతంగా రావాల్సిన డీఏల మంజూరులో రాష్ట్ర ప్రభుత్వం వ్యవహరిస్తున్న తీరు అవమానకరంగా ఉన్నదని తెలంగాణ స్టేట్‌ టీచర్స్‌ యూనియన్‌ (టీఎస్‌టీయూ) రాష్ట్ర అధ్యక్ష, ప్రధాన కార్యదర్శులు మహమ్మద్‌ అబ్దుల్లా, చందూరి రాజిరెడ్డి ఆవేదన వ్యక్తంచేశారు. ఎన్నికల సందర్భంగా కాంగ్రెస్‌ ఇచ్చిన హామీలను విస్మరించడం సరికాదన్నారు. ఉద్యోగులకు ఐదు డీఏలు రావాల్సి ఉంటే, ఒక్కటే మంజూరు చేయడం అవమానించడమేనని ఆగ్రహం వ్యక్తంచేశారు.

ప్రభుత్వం మాట మార్చింది

ఉద్యోగ, ఉపాధ్యాయ, పెన్షనర్లకు పెండింగ్‌ డీఏలు విడుదల చేస్తామని సీఎం రేవంత్‌రెడ్డి హామీ ఇచ్చి, ఇప్పుడు తప్పడం సమంజసం కాదని తెలంగాణ యునైటెడ్‌ మెడికల్‌ అండ్‌ హెల్త్‌ ఎంప్లాయీస్‌ యూనియన్‌ రాష్ట్ర అధ్యక్షుడు ఎండీ ఫసియుద్దీన్‌, ప్రధాన కార్యదర్శి యాదనాయక్‌ విమర్శించారు. ఐదు డీఏలు కలిపి 17.28 శాతం రావాల్సి ఉన్నదన్నారు. ఇందులో ఒక డీఏ మాత్రమే ప్రకటించడం అన్యాయమన్నారు. 2023 జూలై 1 నుంచి అమలు కావాల్సిన పీఆర్సీ కూడా ప్రకటించకుండా కాలయాపన చేస్తున్నారని మండిపడ్డారు. ఈ-కుబేర్‌ వ్యవస్థను రద్దు చేయాలని డిమాండ్‌ చేశారు. మ్యానిఫెస్టోలో పేరొన్న విధంగా జీవో 317ను రద్దు చేయాలని, పాతపెన్షన్‌ విధానాన్ని అమలు చేయాలని, కాంట్రాక్టు ఉద్యోగులందరినీ రెగ్యులర్‌ చేయాలని కోరారు. ఉద్యోగుల సమస్యలపై వెంటనే స్పందించకపోతే ఆందోళనలు చేపడతామని హెచ్చరించారు.