EAMCET Exams | ప్రశాంతంగా తెలంగాణ ఎంసెట్‌ ఎగ్జామ్స్‌.. ఇవాళ అగ్రికల్చర్‌, ఫార్మసీ స్ట్రీమ్‌ పరీక్షలు పూర్తి

EAMCET Exams | తెలంగాణ ఎంసెట్‌ పరీక్షలు ప్రశాంతంగా జరుగుతున్నాయి. ఇవాళ్టి నుంచి ఈ నెల 14 వరకు ఈ పరీక్షలు కొనసాగనున్నాయి. ఇవాళ అగ్రికల్చర్‌, ఫార్మసీ స్ట్రీమ్‌కు సంబంధించిన పరీక్షలు జరిగాయి.

హైదరాబాద్‌: తెలంగాణ ఎంసెట్‌ పరీక్షలు ప్రశాంతంగా జరుగుతున్నాయి. ఇవాళ్టి నుంచి ఈ నెల 14 వరకు ఈ పరీక్షలు కొనసాగనున్నాయి. ఇవాళ అగ్రికల్చర్‌, ఫార్మసీ స్ట్రీమ్‌కు సంబంధించిన పరీక్షలు జరిగాయి. ఉదయం 9 గంటల నుంచి 12 గంటల వరకు, మధ్యాహ్నం 3 గంటల నుంచి 6 గంటల వరకు రెండు సెషన్‌లలో పరీక్షలను నిర్వహించారు.

తెలంగాణలో 95 కేంద్రాల్లో, ఆంధ్రప్రదేశ్‌లో 18 కేంద్రాల్లో తొలిరోజు ఎంసెట్‌ పరీక్షలు జరిగాయి. తెలంగాణలో ఈ పరీక్షల కోసం 47,177 మంది రిజస్టర్‌ చేసుకోగా.. 43,766 మంది హాజరయ్యారు. మొత్తం 92.76 శాతం హాజరు నమోదైంది. ఇక ఆంధ్రప్రదేశ్‌లో 10,401 మంది రిజస్టర్‌ చేసుకోగా 9,089 మంది (87.38 శాతం) హాజరయ్యారు. రెండు రాష్ట్రాల్లో కలిపి ఈ పరీక్షకు 91.79 శాతం హాజరు నమోదైంది.

తెలంగాణ ఉన్నత విద్యామండలి చైర్మన్‌ ఆర్‌ లింబాద్రి హైదరాబాద్‌ నగరంలోని పలు పరీక్షా కేంద్రాలను సందర్శించి పరీక్షలు జరుగుతున్న తీరును పరిశీలించారు. కాగా ఇవాళ అగ్రికల్చర్‌, ఫార్మసీ స్ట్రీమ్‌లో పరీక్షలు పూర్తికాగా.. రేపు మెడికల్ స్ట్రీమ్‌లో, 12, 13, 14 తేదీల్లో ఇంజినీరింగ్‌ స్ట్రీమ్‌లో ఎంసెట్‌ పరీక్షలు జరుగనున్నాయి.