Revanth Reddy | 65 టికెట్లను రూ.600 కోట్లకు అమ్ముకున్న రేవంత్‌ రెడ్డి: ఓయూ విద్యార్థి నేత విజయ్‌ కుమార్‌

పీసీసీ అధ్యక్షుడు రాష్ట్రంలోని 65 నియోజకవర్గాల టికెట్లను రూ.600 కోట్లకు అమ్ముకున్నారని ఉస్మానియా యూనివర్సిటీ విద్యార్థి నేత కురవ విజయ్‌కుమార్‌ ఆరోపించారు.

• రేవంత్‌ వసూళ్లపై ఐటీ, ఈడీకి ఫిర్యాదు చేస్తాం
• రేవంత్‌రెడ్డిని జిల్లాల్లో తిరగనివ్వం
• ఓయూ విద్యార్థి నేత కురవ విజయ్‌కుమార్‌

Revanth Reddy | హైదరాబాద్‌, అక్టోబర్‌ 15 (నమస్తే తెలంగాణ): పీసీసీ అధ్యక్షుడు రాష్ట్రంలోని 65 నియోజకవర్గాల టికెట్లను రూ.600 కోట్లకు అమ్ముకున్నారని ఉస్మానియా యూనివర్సిటీ విద్యార్థి నేత కురవ విజయ్‌కుమార్‌ ఆరోపించారు. దీనిపై వెంటనే అధిష్ఠానం విచారణ జరిపించాలని డిమాండ్‌ చేశారు. రూ.600 కోట్ల వసూళ్లపై ఊరుకునే ప్రసక్తే లేదని, ఈడీ, ఐటీలకు ఫిర్యాదు చేస్తామని హెచ్చరించారు. ఆదివారం ఆయన తన అనుచరులతో కలిసి గాంధీభవన్‌ను ముట్టడించిన అనంతరం. మాట్లాడుతూ.. రేవంత్‌రెడ్డిపై తీవ్ర ఆరోపణలు చేశారు. చంద్రబాబు అండ్‌కో కబంధహస్తాల నుంచి కాంగ్రెస్‌ను కాపాడాలని డిమాండ్‌ చేశారు.

తెలంగాణ కాంగ్రెస్‌ పార్టీ దళారుల చేతుల్లోకి వెళ్ళిపోయిందని విమర్శించారు. మునుపెన్నడూ లేనివిధంగా కాంగ్రెస్‌ టికెట్లు అమ్ముకున్నారని మండిపడ్డారు. గద్వాల టికెట్‌ను రూ.10 కోట్ల క్యాష్‌, 5 ఎకరాల భూమికి కొనుక్కున్నట్టు టికెట్‌ పొందిన సరితా తిరుపతయ్య బాహాటంగా చెప్పుకుంటున్నారని పేర్కొన్నారు. గద్వాల మాత్రమే కాకుండా 65 నియోజకవర్గాల అభ్యర్థుల నుంచి తన కుటుంబసభ్యులు, చెంచాల ద్వారా వసూళ్లు చేస్తున్నారని ఆరోపించారు. నోట్లు, ఓట్లు, సీట్ల అమ్మకాలు, కొనుగోళ్లలో ఆరితేరిన రేవంత్‌రెడ్డి ఇప్పుడు కాంగ్రెస్‌ పరువును గంగలో కలుపుతున్నారని ధ్వజమెత్తారు. నమ్మించి మోసం చేసిన రేవంత్‌రెడ్డిని తమ జిల్లాలో తిరగనివ్వబోమని, తరిమి కొడతామని హెచ్చరించారు.