Inter Hall Tickets | ఇంటర్‌ హాల్‌టికెట్లపై క్యూఆర్‌కోడ్‌.. దారితప్పడం, అడ్రస్‌ తెలియకపోవడం ఉండదిక

Inter Hall Tickets | మీరు ఇంటర్‌ వార్షిక పరీక్షలు రాయబోతున్నారా? ఒక వేళ మీ పరీక్షాకేంద్రం సెంటర్‌ తెలియకపోతే డోంట్‌ వర్రీ. హాల్‌టికెట్లపై పరీక్షాకేంద్రం లొకేషన్‌ క్యూ ఆర్‌కోడ్‌ రూపంలో ఉంటుంది. ఈ క్యూఆర్‌కోడ్‌ను స్కాన్‌చేయగానే మీ పరీక్షాకేంద్రం అడ్రస్‌ తెలిసిపోతుంది.

• కొత్తగా సీఎస్‌డీవోల మొబైల్‌నెంబర్‌
• విద్యార్థుల మొబైల్స్‌కే హాల్‌టికెట్ల లింక్‌
• ఇంటర్‌ బోర్డు చరిత్రలో ఇదే తొలిసారి

Inter Hall Tickets | హైదరాబాద్‌, ఫిబ్రవరి 15 (నమస్తే తెలంగాణ) : మీరు ఇంటర్‌ వార్షిక పరీక్షలు రాయబోతున్నారా? ఒక వేళ మీ పరీక్షాకేంద్రం సెంటర్‌ తెలియకపోతే డోంట్‌ వర్రీ. హాల్‌టికెట్లపై పరీక్షాకేంద్రం లొకేషన్‌ క్యూ ఆర్‌కోడ్‌ రూపంలో ఉంటుంది. ఈ క్యూఆర్‌కోడ్‌ను స్కాన్‌చేయగానే మీ పరీక్షాకేంద్రం అడ్రస్‌ తెలిసిపోతుంది. మీరు ఉండే ప్రాంతం నుంచి సెంటర్‌ ఎంత దూరమో.. ట్రాఫిక్‌ ఎలా ఉందో.. ఎన్ని నిమిషాల్లో చేరుకోగలరో కూడా చెబుతుంది.

ఇలాంటి ప్రత్యేకతలతో హాల్‌టికెట్లను ఇంటర్‌బోర్డు సిద్ధం చేస్తున్నది. ఇలా క్యూఆర్‌కోడ్‌తో హాల్‌టికెట్లు జారీచేయడం ఇదే తొలిసారి. ఈ ఏడాది ఇంటర్‌ పరీక్షలు మార్చి 5 నుంచి ప్రారంభంకానున్నాయి. వార్షిక పరీక్షల నేపథ్యంలో విద్యార్థులు సులభంగా పరీక్షాకేంద్రాలకు చేరుకునేందుకు ఇంటర్‌బోర్డు ఇలా ప్రత్యేక ఏర్పాట్లు చేసినట్టు ఇంటర్‌బోర్డు డైరెక్టర్‌ కృష్ణ ఆదిత్య తెలిపారు.

మరికొన్ని ఏర్పాట్లు..

• ఇది వరకు పరీక్షాకేంద్రం పూర్తి అడ్రస్‌ను హాల్‌టికెట్లపై ముద్రించేవారు కాదు. అడ్రస్‌ కాలమ్‌లో 13 పదాలు మాత్రమే ఉండేవి. కానిప్పుడు పరీక్షాకేంద్రం ఇంటినెంబర్‌, కాలనీ, ఏ ప్రాంతంలో ఉందో తదితర పూర్తి వివరాలను హాల్‌టికెట్లపై ముద్రిస్తారు.
• హాల్‌టికెట్‌పై పరీక్షా కేంద్రం అడ్రస్‌ను క్యూఆర్‌కోడ్‌ రూపంలో ముద్రిస్తున్నారు. కోడ్‌ను స్కాన్‌చేస్తే లొకేషన్‌ చూపిస్తుంది.
• పరీక్షాకేంద్రం చీఫ్‌ సూపరింటెండెంట్‌(సీఎస్‌), డిపార్ట్‌మెంటల్‌ ఆఫీసర్‌ (డీవో) మొబైల్‌ నెంబర్లను సైతం హాల్‌టికెట్లపై ముద్రిస్తారు. వారికి ఫోన్‌చేసి సైతం అడ్రస్‌ కనుక్కోవచ్చు.
• హాల్‌టికెట్‌పై ఐవీఆర్‌ నెంబర్‌ను సైతం తొలిసారిగా ముద్రిస్తున్నారు. హాల్‌టికెట్‌ డౌన్‌లోడింగ్‌ సహా ఇతర సాంకేతిక సమస్యల పరిష్కారానికి ఉపయోగపడుతుంది.
• సెంటర్‌ లొకేటర్‌ యాప్‌ సైతం అందుబాటులో ఉంటుంది. ఈ యాప్‌లో హాల్‌టికెట్‌ నెంబర్‌ ఎంటర్‌చేస్తే లొకేషన్‌ను చూపిస్తుంది. ఎంత సమయంలో చేరుకోవచ్చో. పరీక్షాకేంద్రానికి వెళ్లేందుకు గల మార్గాలను చూపిస్తుంది.
• హాల్‌టికెట్‌ లింకును విద్యార్థి మొబైల్‌ ఫోన్‌, తల్లిదండ్రుల ఫోన్లకు పంపిస్తారు. విద్యార్థి సొంతంగా డౌన్‌లోడ్‌ చేసుకుని ప్రింట్‌ తీసుకుని పరీక్షలకు హాజరుకావొచ్చు. ప్రిన్సిపాల్‌ సంతకం లేకపోయినా పరీక్షలకు అనుమతిస్తారు.