పంటల సేకరణలో జాతీయ విధానం తేవాలి : కేకే

k keshava rao | పంటల సేకరణలో జాతీయ విధానం తీసుకురావాలని రాజ్యసభలో టీఆర్‌ఎస్‌ పార్లమెంటరీ పక్షనేత కే కేశవరావు కేంద్ర ప్రభుత్వాన్ని

న్యూఢిల్లీ : పంటల సేకరణలో జాతీయ విధానం తీసుకురావాలని రాజ్యసభలో టీఆర్‌ఎస్‌ పార్లమెంటరీ పక్షనేత కే కేశవరావు కేంద్ర ప్రభుత్వాన్ని డిమాండ్‌ చేశారు. సోమవారం టీఆర్‌ఎస్‌ భవన్‌లో ఆయన మీడియాతో మాట్లాడారు. తెలంగాణ దుర్భరమైన పరిస్థితుల్లో ఉంది. రాష్ట్రంలో రెండు పంటలు పండుతాయి. రబీలో పండే వరి పంట వాతావరణ పరిస్థితుల వల్ల బాయిల్డ్ రైస్‌గా చేసి కేంద్రానికి ఇస్తున్నాం.

తెలంగాణ ఏర్పడిన నాటి నుంచి నీరు, విద్యుత్, పెట్టుబడి సాయం ఇస్తూ ఏ పంటలు వేయాలో అధ్యయనం చేస్తూ పంట ఉత్పత్తి సామర్థ్యం పెంచాం. 62 లక్షల ఎకరాల్లో పంట సాగు ఉంది. ధాన్యం తీసుకోవాలని చెప్తుంటే మీరు ఇంత ధాన్యం ఎలా పండిస్తారు? అని కేంద్రం అంటుంది. రైతు వ్యతిరేక కేంద్ర ప్రభుత్వం ఇది. పంటల సేకరణలో జాతీయ విధానం తేవాలి. ఎంత ధాన్యం సేకరిస్తారో కేంద్రం స్పష్టం చేయాలి.

కోటి టన్నుల ధాన్యం సేకరించాలి

ఎంఓయూ ప్రకారం.. 40 లక్షల మెట్రిక్ టన్నుల ధాన్యం కొనుగోలు చేస్తామని కేంద్రం అంటుంది. తెలంగాణ నుంచి కోటి టన్నులు ధాన్యం ఇస్తాం తీసుకోండి.. ఇది దేశానికే ప్రయోజనం. మొత్తం కోటి టన్నుల ధాన్యాన్ని సేకరించాలి. 80, 85 లక్షల టన్నులు అంటూ కేంద్ర మంత్రి బేరం ఆడుతున్నాడు. కేంద్రం స్పష్టత ఇస్తే పంటల మార్పిడి అంశాన్ని రైతులకు వివరిస్తాం. రెండు మూడేళ్ల సమయం ఇస్తే పంట మార్పిడి వైపు రైతులు మళ్లుతారు. అంతవరకు బాయిల్డ్ రైస్ కొనుగోలు చేయాలని కేంద్రాన్ని కోరుతున్నాం. కేంద్రం కొనుగోలు చేయకపోవడం వల్ల వర్షాలతో రైతులు ఇబ్బందులు పడుతున్నారు.

తెలంగాణతో ఒకలా.. పంజాబ్‌తో ఒకలా వ్యవహరిస్తున్నది

రాష్ట్రం పట్ల కేంద్రం వివక్ష చూపకూదన్నారు. పంజాబ్ పట్ల ఒకలా.. తెలంగాణా పట్ల ఒకలా కేంద్రం వ్యవహరిస్తోంది. తెలంగాణ రాష్ట్రం ఉత్పత్తి చేసిన పంటను కేంద్రం కొనుగోలు చేయాలి. పంటల సేకరణలో కేంద్రం జాతీయ విధానం తీసుకురావాలి. తెలంగాణ రాష్ట్ర నాలుగు డిమాండ్లు నెరవేర్చాలి. పార్లమెంట్‌లో గందరగోళం సృష్టించే ఉద్దేశం మాకు లేదు. తెలంగాణ రైతుల ప్రయోజనం కోసం చర్చ చేపట్టాలని కోరుతున్నాం.