Mukhra Womens Protest | హైదరాబాద్‌కు వస్తున్న రాహుల్‌గాంధీకి ముఖ్రా మహిళల నిరసన

Mukhra Womens Protest | గత ఎన్నికల్లో మహిళలకు ఇచ్చిన హామీలను ఇంకెప్పుడు నెరవేరుస్తారంటూ ఆదిలాబాద్ జిల్లా, ముఖ్రా (కె) గ్రామ మహిళలు ప్లకార్డులతో నిరసన తెలిపారు.

ఆదిలాబాద్‌ : గత ఎన్నికల్లో మహిళలకు ఇచ్చిన హామీలను ఇంకెప్పుడు నెరవేరుస్తారంటూ ఆదిలాబాద్ జిల్లా, ముఖ్రా (కె) గ్రామ మహిళలు ప్లకార్డులతో నిరసన (Mukhra Womens ) తెలిపారు. భారత్ సమిట్‌ ( Bharat sammit )లో పాల్గొనేందుకు హైదరాబాద్ వస్తున్న కాంగ్రెస్ అగ్రనేత రాహుల్ గాంధీకి ( Rahul Gandhi ) ఎన్నికల సమయంలో మహిళలకు ఇచ్చిన హామీలను గుర్తుచేస్తూ ప్రశ్నల వర్షం కురిపించారు.

కాంగ్రెస్ పార్టీ 6 గ్యారంటీలు, 13 డిక్లరేషన్లు, 420 హామీలతో అధికారంలోకి వచ్చి మూడేళ్లు అవుతున్నా, మహిళలకు ఇచ్చిన హామీలను నెరవేర్చకుండా మోసం చేసిందని ఆగ్రహం వ్యక్తం చేశారు. ఆనాడు రాహుల్ గాంధీ, సోనియా గాంధీ, ప్రియాంక గాంధీలు తెలంగాణ మహిళలకు ఇచ్చిన హామీలను ప్లకార్డులో ప్రదర్శించారు. ప్రతి మహిళకు నెలకు రూ.2,500 ఆర్థిక సాయం, పెళ్లయిన ఆడపిల్లకు తులం బంగారం, డిగ్రీ పూర్తి చేసిన యువతులకు స్కూటీలు, ప్రతి ఎకరానికి రూ.15,000 రైతు భరోసా ఎందుకు అమలు చేయడం లేదని పేర్కొన్నారు.

24 గంటల త్రీఫేజ్ విద్యుత్ సరఫరా, రైతు కూలీలకు ఏడాదికి రూ.12,000, వృద్ధ మహిళలకు నెలకు రూ.4,000 పింఛన్ ఇస్తామని మూడేళ్లు గడుస్తున్నా ఒక్క హామీని కూడా పూర్తిస్థాయిలో అమలు చేయకుండా కాంగ్రెస్ ప్రభుత్వం ప్రజలను మోసం చేస్తోందని మండిపడ్డారు. రేవంత్ రెడ్డి ప్రభుత్వం రైతులు, మహిళలు, యువతతో పాటు అన్ని వర్గాలను వంచించిందని ఆరోపించారు. ఇప్పటికైనా మహిళలకు ఇచ్చిన హామీలను నెరవేర్చాలని డిమాండ్ చేస్తూ, హైదరాబాద్‌కు వస్తున్న రాహుల్ గాంధీకి ప్లకార్డుల ద్వారా నిరసనను తెలియజేశారు. ఈ కార్యక్రమంలో మాజీ సర్పంచ్ గాడ్గే మీనాక్షి, సరోజ, పారు బాయి, శోభ, లక్ష్మి తదితర మహిళలు పాల్గొన్నారు.