సిద్దాపూర్‌ రిజర్వాయర్‌ పూర్తిచేస్తా..

సిద్దాపూర్‌ రిజర్వాయర్‌ పూర్తి చేయడమే తన సంకల్పమని మాజీ స్పీకర్‌, బాన్సువాడ ఎమ్మెల్యే శ్రీనివాసరెడ్డి అన్నారు. కామారెడ్డి జిల్లా బాన్సువాడ మండలంలోని గట్టుమీది గ్రామాలైన హన్మాజీపేట్‌, కోనాపూర్‌, సంగోజీపేట్‌, కాద్లాపూర్‌ తదితర గ్రామాలకు సాగునీరు అందించేందుకు సిద్దాపూర్‌ రిజర్వాయర్‌ పూర్తి చేస్తానని స్పష్టంచేశారు.

•  ఎవరెన్ని అడ్డంకులు సృష్టించినా ఊరుకోను
• మాజీ స్పీకర్‌, ఎమ్మెల్యే పోచారం శ్రీనివాసరెడ్డి

బాన్సువాడ రూరల్‌, జూన్‌ 8: సిద్దాపూర్‌ రిజర్వాయర్‌ పూర్తి చేయడమే తన సంకల్పమని మాజీ స్పీకర్‌, బాన్సువాడ ఎమ్మెల్యే శ్రీనివాసరెడ్డి అన్నారు. కామారెడ్డి జిల్లా బాన్సువాడ మండలంలోని గట్టుమీది గ్రామాలైన హన్మాజీపేట్‌, కోనాపూర్‌, సంగోజీపేట్‌, కాద్లాపూర్‌ తదితర గ్రామాలకు సాగునీరు అందించేందుకు సిద్దాపూర్‌ రిజర్వాయర్‌ పూర్తి చేస్తానని స్పష్టంచేశారు. బాన్సువాడ మండలం కోనాపూర్‌లో రూ.12 కోట్లతో నిర్మించనున్న గిరిజన బాలికల గురుకుల పాఠశాల భవన నిర్మాణ పనులకు పోచారం శనివారం శంకుస్థాపన చేశారు. అనంతరం ఆయన మాట్లాడుతూ.. రూ.200 కోట్లతో సిద్దాపూర్‌ రిజర్వాయర్‌ పనులు చేపట్టామని, కొందరి వల్ల ప్రస్తుతం పనులు నిలిచిపోయాయని తెలిపారు. పనులు చేపట్టేందుకు కొందరు అడ్డంకులు సృష్టిస్తున్నారని విమర్శించారు. ఎవరెన్ని అడ్డంకులు సృష్టించినా రిజర్వాయర్‌ పనులు పూర్తి చేయడమే తన సంకల్పమని ప్రకటించారు.

గతంలో 230 ఉన్న గురుకులాలను 1120కి పెంచిన ఘనత కేసీఆర్‌కే దక్కిందని కొనియాడారు. పేద విద్యార్థులకు నాణ్యమైన విద్యను అందించాలనే సంకల్పంతో పని చేశానని, గురుకులాలు, మోడల్‌ స్కూళ్లు, జూనియర్‌, డిగ్రీ కాలేజీలతోపాటు నర్సింగ్‌ కాలేజీ, ఫుడ్‌ సైన్స్‌ టెక్నాలజీ కళాశాల సహా నియోజకవర్గంలో అన్ని రకాల విద్యాలయాలు ఏర్పాటు చేసినట్టు వివరించారు. కేసీఆర్‌ కృషితో కోనాపూర్‌- హన్మాజీపేట్‌ గ్రామాల మధ్య గిరిజన గురుకుల పాఠశాల మంజూరైందని తెలిపారు. విద్యార్థినులకు శాశ్వత భవన నిర్మాణం కోసం రూ.12 కోట్లు మంజూరు చేశామని, పనులను త్వరితగతంగా చేపట్టి విద్యార్థులకు భవనాన్ని అందుబాటులోకి తీసుకొస్తామని చెప్పారు. కాగా కోనాపూర్‌ గ్రామానికి వచ్చిన ఎమ్మెల్యే పోచారం శ్రీనివాసరెడ్డిని సంగోజీపేట్‌కు చెందిన ఆర్మీ జవాన్‌ రాసాలం మహేశ్‌ సన్మానించారు. ‘సార్‌ మీ కృషి, మీ కుమారుడు పోచారం భాస్కర్‌రెడ్డి’ సహకారంతో ఆర్మీ జవాన్‌ ఉద్యోగం సాధించినట్టు పేర్కొన్నాడు.