Visit:
హైదరాబాద్‌: తాను కేసీఆర్‌ సైనికుడినని, నిఖార్సయిన తెలంగాణ బిడ్డను అని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ (KTR) అన్నారు. హైదరాబాద్‌ బ్రాండ్‌ ఇమేజ్‌ను అంతర్జాతీయం చేయడానికి ప్రయత్నించామన్నారు. మీలా బావమరుదులకు కోట్లాది రూపాయల కాంట్రాక్టులు తాము కట్టబెట్టలేలదని విమర్శించారు. ఎమ్మెల్యేలను కొనుగోలు చేయడానికి వెళ్లి మీలా దొరికిపోయిన దొంగను కాదని ఆగ్రహం వ్యక్తం చేశారు. తాను అరపైసా అవినీతికి పాల్పడలేదని చెప్పారు. ఏదో రకంగా బురదజల్లి తాత్కాలిక ప్రయోజనం పొందాలని చూస్తున్నారని మండిపడ్డారు. కాంగ్రెస్‌ 420 హామీలపై ప్రశ్నిస్తూనే ఉంటామని, వెయ్యి కేసులు పెట్టినా ఎదుర్కొంటామని స్పష్టం చేశారు. న్యాయస్థానాలపై తమకు గౌరవం ఉందని, అవసరమైతే చస్తా తప్ప.. లుచ్చా పనులు చేయనని తెలిపారు. ఫార్ములా-ఈ రేసు కేసులో మాజీ ఏఏజీ రామచంద్రారావుతో కలిసి ఏసీబీ విచారణకు కేటీఆర్‌ హాజరయ్యారు. ఈ సందర్భంగా విచారణకు బయల్దేరుతూ నందినగర్‌లోని తన నివాసం వద్ద మీడియాతో మాట్లాడారు.
‘‘తెలంగాణ బిడ్డగా, తెలంగాణ రాష్ట్రం కోసం పోరాటం చేసిన ఒక కార్యకర్తగా, కేసీఆర్‌ సైనికుడగా స్వచ్ఛమైన మనసుతో, నిర్మలమైన హృదయంతో మరోసారి చెబుతున్నా.. తెలంగాణ ప్రతిష్ట పెంచడానికి, హైదరాబాద్‌ బ్రాండ్‌ ఇమేజ్‌ను అంతర్జాతీయం చేయడానికి, హైదరాబాద్‌ను ప్రపంచ పటంలో నిలపడానికి రాష్ట్ర మంత్రిగా ఎన్నో ప్రయాత్నాలు చేశాం. అవి ఫలించి హైదరాబాద్‌, తెలంగాణ భారత దేశంలోనే ఒక ప్రధానమైన నగరంగా ప్రపంచ దృష్టిని ఆకర్షించే స్థాయికి తీసుకొచ్చేలా పనిచేశాం. తొమ్మిదిన్నర పదేండ్ల తమ ప్రభుత్వంలో మా బావమర్దులకు రూ.11 వందల 37 కోట్ల కాంట్రాక్టులు ఇచ్చే దౌర్భాగ్యపు పని చేయలేదు. మంత్రిగా నేను మంత్రిమండలిలో కూర్చుని నా కొడుకు కంపెనీలకు కాంట్రాక్టులు ఇచుకోలేదు. కాంట్రాక్టులు ఇచ్చి ప్రతిఫలంగా ల్యాండ్‌క్రూజర్‌ కొనుక్కోలేదు. ఆ పనులు రేవంత్‌ రెడ్డి, ఆయన మంత్రివర్గ సహచరులు చేశారు. ఆ చావు తెలివితేటలు, అవినీతి తెలివితేటలు వాళ్లకే ఉన్నాయి. నేను రూ.55 లక్షతో ఎమ్మెల్యేలను కొనుగోలు చేయడానికి పోయి దొరికిపోయిన దొంగను కూడా కాదు.
అరపైసా అవినీతి చేయలే..
నేను నిఖార్సయిన తెలంగాణ బిడ్డను. ఏ పనిచేసినా తెలంగాణ కోసం, హైదరాబాద్‌ ప్రతిష్టను పెంచడానికి చేశాను. అరపైసా అవినీతి చేయలేదు. చేయబోను. ఇవాళ కొంత మంది అర్ధమై కానివాళ్లు, తెలిసీ తెలియని వాళ్లు, ఏదో కొంత బురదజల్లి తాత్కాలికంగా మీడియా మేనేజ్‌మెంట్‌ ద్వారా రాజకీయ పబ్బం గడుపుకోవాలనుకునే కాంగ్రెస్‌ వాళ్లకు చెప్పేదొకటే.. నిజం నిలకడమీద తెలుస్తుంది.
నీలా లుచ్చా పనులు చేయలే..
మీరు ఇవ్వాళ జల్లే బురద నన్నుగానీ, మా పార్టీని కానీ ఎట్టి పరిస్థితుల్లో మాధృష్టిని మరల్చలేదు. మేము మాట్లాడుతూనే ఉంటాం. కొట్లాడుతూనే ఉంటాం. గత ఏడాది కాలంగా విద్యుత్‌ చార్జీలు పెంచొద్దని కొట్లాడింది బీఆర్‌ఎస్‌. లగచర్లలో రైతులను జైల్లో పెడితే అడ్డుకున్నది బీఆర్‌ఎస్‌. హైడ్రా పేరుతో ఇండ్లు కూలగొడితే అడ్డుకున్నది బీఆర్‌ఎస్‌. ఆరు గ్యారంటీలను అమలు చేయకపోతే అడుగడుగునా నిలదీసింది కేసీఆర్‌ బృందం. మా దృష్టిని మేం మరల్చం. నామీద కేసుపెట్టి నన్నేదో చేసి దానివల్ల మా పార్టీ క్యాడర్‌ను, నాయకత్వాన్ని నువ్వు దారి మళ్లింపు, దృష్టి మళ్లింపు దిశగా ప్రయత్నం చేస్తానని అనుకుంటున్నవ్ రేవంత్‌ రెడ్డి. అది నీవల్ల కాదు.
ఎన్ని కేసులు పెట్టినా ఎదుర్కొంటాం..
ముమ్మాటికీ నువ్విచ్చిన 420 హామీలపై ప్రశ్నిస్తూనే ఉంటాం. ఇదే కాదు ఎన్ని కేసులు పెట్టినా ఎదుర్కొంటాం. న్యాయస్థానాలపై, ఈ దేశంలోని చట్టాల మీద, భారత రాజ్యాంగంపై మాకు సంపూర్ణ గౌరవం, విశ్వాసం ఉన్నది. నువ్వు ఏ ప్రశ్నలన్నా అడుగు సమాధానం మావద్ద ఉంది. ఎందుకంటే మేం నిజాయితీగా ఉన్నాం. నీలాగా లుచ్చా పనులు చేయలేదు, తుచ్చపు పనులు చేయలేదు. చేయబోము. నికార్సయిన తెలంగాణ బిడ్డగా.. కేసీఆర్‌ రక్తం పంచుకుని పుట్టిన కొడుకుగా చెబుతున్నా.. తెలంగాణ కోసం అవసరమైతే చస్తాను తప్ప ఇలాంటి లుచ్చాల ముందు తల వంచను. తప్పకుండా కొట్లాడుతూనే ఉంటా. పోరాడుతూనే ఉండా. తెలంగాణ జయించేదాకా, కాంగ్రెస్‌ కబంధ హస్తాల నుంచి తెలంగాణ బయటకు వచ్చేదాకా కొట్లాడుతూనే ఉంటా.’’నని కేటీఆర్‌ స్పష్టం చేశారు.
