Visit:
మల్యాల, నవంబర్‌ 30 : ఉత్తర తెలంగాణలోనే ప్రముఖ పుణ్యక్షేత్రమైన జగిత్యాల జిల్లా కొండగట్టు దిగువన శనివారం రాత్రి 11.30 గంటల ప్రాంతంలో అగ్ని ప్రమాదం జరిగింది. షార్ట్‌ సర్క్యూట్‌తో ప్లాస్టిక్‌ దుకాణ సముదాయం దగ్ధమైంది. 30 దుకాణాలలోని ప్లాస్టిక్‌ ఆట వస్తువులు, బొమ్మలు, ఇతర సామగ్రి పూర్తిగా కాలిబూడిదైంది. షార్ట్‌ సర్క్యూట్‌తో ఒక దుకాణంలో ఎగిసిపడిన నిప్పురవ్వలు క్రమంగా ఒక దుకాణం నుంచి మరో దుకాణానికి విస్తరిస్తూ పోవడంతో వరుసలో ఉన్న దుకాణాలన్నీ కాలిపోయాయి. మంటలు చెలరేగడంతో ఉన్న వస్తువులు, సామగ్రి, నగదు, బంగారం అన్నింటినీ వదిలేసి తాము బతికితే చాలంటూ భయాందోళనతో బాధితులు బయటికి పరుగులు తీశారు.
దశాబ్దాలుగా రూపాయీ రూపాయీ పోగు వేసుకొని ఏర్పాటు చేసుకున్న వ్యాపారం కండ్ల ముందే కాలిబూడిదవుతుంటే, ఏం చేయలేని నిస్సహాయ స్థితిలో కన్నీరు పెట్టారు. బాధితుల కథనం ప్రకారం.. శనివారం రాత్రి 11 గంటల ప్రాంతంలో కొండగట్టు దిగువన ఉన్న ఒక దుకాణంలో షార్ట్‌ సర్క్యూట్‌తో నిప్పు రవ్వలు ఎగిసిపడి మంటలు చెలరేగాయి. ముప్పైకి పైగా దుకాణాలు ఒకదాన్ని ఆనుకొని ఒకటి ఉండటం, అన్నీ రేకుల షెడ్డులే కావడంతో ఒకదాని నుంచి మరొక దుకాణానికి మంటలు విస్తరించాయి. మొదటి దుకాణంలో మంటలు అంటుకున్న సమయంలోనే దుకాణదారులు గమనించి108తోపాటు ఫైర్‌ ఇంజిన్‌కు సమాచారం ఇచ్చారు.
జగిత్యాల నుంచి బయలు దేరిన ఫైర్‌ ఇంజిన్‌కు మధ్యలోనే ఆగిపోవడం, మరో ఫైర్‌ ఇంజిన్‌ మిషనరీ మొరాయించడంతో కోరుట్ల, కరీంనగర్‌ నుంచి ఫైర్‌ ఇంజిన్లను పిలిపించారు. ఆ ఫైర్‌ ఇంజిన్లు వచ్చే సరికే అన్ని దుకాణాలు పూర్తిగా కాలిపోవడంతో తీవ్ర ఆస్తి నష్టం వాటిల్లింది. అర్ధరాత్రి రెండున్నర గంటల వరకు మంటలను ఫైర్‌ సిబ్బంది అదుపులోకి తీసుకొచ్చినా, అప్పటికే జరగాల్సిన నష్టం వాటిల్లింది. ప్రతి దుకాణ యజమానికి 5 లక్షల వరకు నష్టం జరిగింది. అగ్ని ప్రమాదంలో కోటి రూపాయల వరకు నష్టం వాటిలినట్టు ప్రాథమిక అంచనా. అగ్ని ప్రమాదంలో సర్వం కోల్పోయి రోడ్డున పడ్డ చిరు వ్యాపారుల కుటుంబాల రోదన కొండగట్టు దిగువన అంజన్న ప్రతిమ సాక్షిగా మిన్నంటింది. ఫైర్‌ ఇంజిన్లు సకాలంలో వచ్చి ఉంటే 25కు పైగా దుకాణాలు కాపాడబడేవని, ప్రభుత్వ అధికారుల నిర్లక్ష్యం వల్లే అన్ని దుకాణాలు అహుతి అయిపోయాయంటూ ఆగ్రహం వ్యక్తంచేశారు.
సర్వం కోల్పోయిన కుటుంబాలను మంత్రి అడ్లూరి, ఎమ్మెల్యే మేడిపల్లి సత్యం పరామర్శించి, ప్రభుత్వం తరుఫున రూ.20వేల ఆర్థిక సాయం అందజేస్తామని, భవిష్యత్తులో ఇతర పద్ధతుల్లో సహకరిస్తామని చెప్పి వెళ్లారు. సాయంత్రం వరకు పంచనామా నిర్వహించిన అధికారులు, చీకటి పడే వేళ బాధిత కుటుంబాలకు పది కిలోల బియ్యం, రూ.5వేల తక్షణ సాయం అంటూ అందజేసి వెళ్లిపోయారు. అధికారులు, మంత్రి, ఎమ్మెల్యేలు రూ.20 వేల ఆర్థిక సాయం చేస్తామని చెప్పి, ఇప్పుడు ఐదువేల రూపాయలు అందజేయడం ఏమిటని బాధితులు ఆగ్రహం వ్యక్తంచేశారు.
కొండగట్టులో అగ్ని ప్రమాదం జరిగిన ఘటనలో బాధితులకు అండగా ఉంటామని చొప్పదండి మాజీ ఎమ్మెల్యే సుంకె రవిశంకర్‌ భరోసా కల్పించారు. ఆదివారం స్థానిక నాయకులతో కలిసి బాధితులను ఓదార్చారు. బీఆర్‌ఎస్‌ పక్షాన ఎమ్మెల్సీ ఎల్‌ రమణ రూ.లక్ష అందజేయగా, స్థానిక నాయకుల సహకారంతో రూ.60 వేలు పోగుచేసి ఒక్కో కుటుంబానికి రూ.5వేల చొప్పున అందించారు. ఈ సందర్భంగా సుంకె మాట్లాడుతూ, ప్రమాద ఘటన తెలిసిన వెంటనే ఫైర్‌సిబ్బంది స్పందించి ఉంటే ఇంత తీవ్రంగా నష్టం జరిగేది కాదని చెప్పారు. రాబోయే సమ్మక్క-సారక్క జాతర నేపథ్యంలో ప్రతి దుకాణాదారుడు అధిక మొత్తంలో తీసుకొచ్చిన సరుకు మొత్తం అగ్నికి ఆహుతి అయిందని తెలిపారు. బాధిత కుటుంబాలకు రూ.30లక్షల చొప్పున ప్రభుత్వం ఎక్స్‌గ్రేషియా చెల్లించాలని డిమాండ్‌ చేశారు.
ఘోర అగ్నిప్రమాదంపై బీఆర్‌ఎస్‌ వరింగ్‌ ప్రెసిడెంట్‌ కేటీఆర్‌ ఆవేదన వ్యక్తంచేశారు. ప్లాస్టిక్‌ బొమ్మల దుకాణాల సముదాయం షార్ట్‌సర్క్యూట్‌కు గురై పూర్తిగా కాలిపోయిన ఘటనపై ఆయన ట్విట్టర్‌లో ప్రకటన చేశారు. చొప్పదండి మాజీ ఎమ్మెల్యే సుంకె రవిశంకర్‌కు ఫోన్‌ చేసి మాట్లాడారు. క్షేత్రస్థాయిలో జరిగిన నష్టం వివరాలను అడిగి తెలుసుకున్నారు. ఉపాధి కోసం అప్పులు చేసి, ఎంతో కష్టపడి దుకాణాలు పెట్టుకున్న పేద, మధ్య తరగతి కుటుంబాలు ఈ ప్రమాదంతో ఒకసారిగా రోడ్డున పడ్డాయని, మేడారం జాతర కోసం తెచ్చిన సరుకు, బొమ్మలు, ఇతర సామగ్రి సర్వం అగ్నికి ఆహుతయ్యాయని, 30 కుటుంబాల భవిష్యత్తు నాశనం అయిందని మాజీ ఎమ్మెల్యే సుంకె ..కేటీఆర్‌కు వివరించారు. దుర్ఘటనపై కేటీఆర్‌ తీవ్ర విచారం వ్యక్తంచేశారు. రూ.కోటి వరకు ఆస్తి నష్టం జరగడం దురదృష్టకరమని చెప్పారు.
సకాలంలో ఫైరింజన్లు రాకపోవడమే ఆస్తి నష్టం భారీగా పెరగడానికి ప్రధాన కారణమని మండిపడ్డారు. జగిత్యాల ఫైర్‌ ఇంజన్‌ రిపేర్‌లో ఉండటం, వచ్చిన ఒక ఇంజన్‌ పని చేయకపోవడం, గంట తర్వాత కోరుట్ల, కరీంనగర్‌ నుంచి వాహనాలు రావడం ప్రభుత్వ యంత్రాంగం వైఫల్యానికి, నిర్లక్ష్యానికి నిదర్శనమని మండిపడ్డారు. ఈ వైఫల్యానికి రాష్ట్ర ప్రభుత్వమే బాధ్యత వహించాలని డిమాండ్‌ చేశారు. సర్వం కోల్పోయిన కుటుంబాలను రాష్ట్ర ప్రభుత్వం వెంటనే ఆదుకోవాలని విజ్ఞప్తి చేశారు. పూర్తిగా దెబ్బతిన్న వ్యాపారం, దుకాణాలు ఏమాత్రం పనికిరాని స్థితికి చేరడాన్ని దృష్టిలో ఉంచుకొని, మానవతా దృక్పథంతో ఒకో కుటుంబానికి రూ.30 లక్షల ఆర్థిక సహాయం అందించాలని డిమాండ్‌ చేశారు.
ప్రమాద విషయం తెలియగానే సహాయక చర్యల్లో పాల్గొని సేవలందించిన సుంకె రవిశంకర్‌ను కేటీఆర్‌ అభినందించారు. బాధిత కుటుంబాలకు రూ.5వేల చొప్పున బీఆర్‌ఎస్‌ ఎమ్మెల్సీ ఎల్‌ రమణ ఆర్థిక సాయం చేయడం అభినందనీయమని కొనియాడారు. నష్టపోయిన కుటుంబాలకు బీఆర్‌ఎస్‌ అండగా ఉంటుందని భరోసా ఇచ్చారు. బాధిత కుటుంబాలకు నష్టపరిహారం చెల్లించి ఆదుకోకుంటే, పార్టీ తరఫున ప్రభుత్వంపై ఒత్తిడి తెస్తామని తెలిపారు.
