హైదరాబాద్, ఫిబ్రవరి 1 (నమస్తే తెలంగాణ): క్రిప్టో కరెన్సీపై కేంద్రం రివర్స్ గేర్ తీసుకున్నది. మొన్నటివరకు క్రిప్టోను ఒక కరెన్సీగా గుర్తించబోమని, క్రిప్టో పెట్టుబడులను నిషేధిస్తామని కేంద్ర ప్రభుత్వం చెప్పింది. ప్రత్యేకంగా పార్లమెంట్లో బిల్లు తెచ్చేందుకూ ప్రయత్నించింది. ఇప్పుడు ఆదాయంపై ఏకంగా 30 శాతం పన్ను విధించింది. క్రిప్టో కరెన్సీలు, ఇతర అదృశ్య ఆస్తుల లావాదేవీల నుంచి పొందే ఆదాయంపై గరిష్ఠంగా 30 శాతం పన్నును ప్రతిపాదిస్తున్నట్టు బడ్జెట్లో ఆర్థిక మంత్రి నిర్మలా సీతారామన్ ప్రకటించారు. అలాగే క్రయవిక్రయాలపై ఒక శాతం టీడీఎస్ (ట్యాక్స్ డిడక్టెడ్ ఎట్ సోర్స్) ఉంటుందని తెలిపారు. క్రిప్టో, డిజిటల్ ఆస్తుల్లో ఇచ్చిపుచ్చుకునే బహుమతులపైనా పన్నులుంటాయని తేల్చిచెప్పారు. ఈ ఏడాది ఏప్రిల్ 1 నుంచి పన్ను ప్రతిపాదనలు అమల్లోకి వస్తాయన్నారు. కాగా, ఈ 30 శాతం పన్ను డిజిటల్ రూపీకి కూడా వర్తిస్తుందా? అన్న సందేహాలూ వ్యక్తమవుతున్నాయి. దీనిపై స్పష్టత రావాల్సిన అవసరం ఉందంటున్నారు.
క్రిప్టోలు లీగలేనా?..
క్రిప్టో కరెన్సీలపై పన్నుతో కేంద్రం వాటిని లీగలైజ్ చేసిందా? అన్న ప్రశ్నలు పెద్ద ఎత్తున వినిపిస్తున్నాయిప్పుడు. దేశంలో వాటి ఆదాయంపై పన్ను పడితే.. వాటిని చట్టబద్దం చేసినట్టేనని నిపుణులు అంటున్నారు. ఓవైపు నిషేధం.. మరోవైపు పన్ను.. ఇంకోవైపు డిజిటల్ కరెన్సీ.. ఇలా స్పష్టత లేని ప్రకటనలు పార్లమెంట్ సాక్షిగా బడ్జెట్లో రావడం విచిత్రంగా ఉందనీ అంటున్నారు. ఇక ఈ 30 శాతం పన్ను.. లాటరీ, గేమ్ షోస్, పజిల్స్ తదితర వాటిల్లో గెల్చుకున్న మొత్తాలపై విధించే పన్ను తరహాలోనే ఉందని నిపుణులు అభిప్రాయపడుతున్నారు. దీంతో క్రిప్టో కరెన్సీలను కేంద్రం జూదంగా చూస్తుందా? అనే ప్రశ్నలు వినిపిస్తున్నాయి.
వీటికే పన్ను పోటు..
క్రిప్టో కరెన్సీలు, డీసెంట్రలైజ్డ్ ఫైనాన్స్, నాన్ ఫంజిబుల్ టోకెన్స్ (ఎన్ఎఫ్టీ)పై ఈ 30 శాతం పన్ను పడనున్నది. ఈ పన్ను నుంచి డిజిటల్ గోల్డ్, సెంట్రల్ బ్యాంక్ డిజిటల్ కరెన్సీ లేదా ఇతర సంప్రదాయ డిజిటల్ ఆస్తులకు మినహాయింపుంటుంది.
ఎన్ఎఫ్టీ అంటే?
ఎన్ఎఫ్టీ అంటే.. ‘నాన్ ఫంజిబుల్ టోకెన్’. ఇది ఎలాంటి భౌతిక రూపం లేని వర్చువల్ ఆస్తి. సాధారణంగా ఒక వ్యక్తి తాను తయారు చేసిన వస్తువునో.. వేసిన పెయింటింగ్నో వేలం వేస్తే డబ్బు వస్తుంది. దీనికి డిజిటల్ రూపమే ఎన్ఎఫ్టీ. ఒక వ్యక్తి తీసిన ఫొటో, వీడియో, వేసిన పెయింటింగ్, చేసిన ట్వీట్, కొటేషన్, మీమ్, వీడియో గేమ్.. ఇలా డిజిటల్ రూపంలో మనం సొంతంగా తయారు చేసిన వస్తువును దేనినైనా ఎన్ఎఫ్టీగా మార్చుకోవచ్చు. మన దేశంలో సెలబ్రెటీస్ ఎన్ఎఫ్టీలను సృష్టిస్తున్నారు.
పన్నులు కట్టకుండా..
ఎన్ఎఫ్టీల క్రయవిక్రయాలన్నీ క్రిప్టో కరెన్సీ రూపంలో సాగుతాయి. వీటికి మన దేశంలో ఇన్నాళ్లూ గుర్తింపు లేదు. ఎవరు ఎంత మొత్తంలో లావాదేవీలు చేశారో లెక్కలు ఉండవు. అవి ఆదాయం కిందికిరావు. దీంతో వాటికి పన్ను ఉండదు. ఇలా దేశంలో ఏటా వందల కోట్ల రూపాయల్లో లావాదేవీలు సాగుతుండటంతో డిజిటల్ ఆస్తుల లావాదేవీలు, ఆదాయంపై పన్నులు వచ్చిపడ్డాయి.