High Court | బీఆర్‌ఎస్‌ ఫిర్యాదును పరిష్కరించండి.. ఫోన్ల ట్యాపింగ్‌పై కేంద్రానికి హైకోర్టు ఆదేశం

ఫోన్ల ట్యాపింగ్‌ వ్యవహారంలో బీఆర్‌ఎస్‌ నాయకులపై తప్పుడు ప్రచారం జరగకుండా చూడాలన్న ఫిర్యాదును పరిషరించాలని హైకోర్టు కేంద్ర ప్రభుత్వాన్ని ఆదేశించింది.

High Court | హైదరాబాద్‌, మే 3 (నమస్తే తెలంగాణ): ఫోన్ల ట్యాపింగ్‌ వ్యవహారంలో బీఆర్‌ఎస్‌ నాయకులపై తప్పుడు ప్రచారం జరగకుండా చూడాలన్న ఫిర్యాదును పరిష్కరించాలని హైకోర్టు కేంద్ర ప్రభుత్వాన్ని ఆదేశించింది. తమ నేతల ప్రతిష్ఠను దెబ్బతీసేలా గూగుల్‌, యూట్యూబ్‌, ఇతర షోషల్‌ మీడియా వేదికల్లో జరుగుతున్న ప్రచారాన్ని నిరోధించడంలో కేంద్రం విఫలమైందంటూ బీఆర్‌ఎస్‌ ప్రధాన కార్యదర్శి ఎం శ్రీనివాసరెడ్డి దాఖలు చేసిన వ్యాజ్యంపై జస్టిస్‌ సీవీ భాసర్‌రెడ్డి శుక్రవారం విచారణ జరిపారు.

ఫోన్ల ట్యాపింగ్‌ అంశంపై సోషల్‌ మీడియాలో వస్తున్న ఊహాజనిత కథనాలు 2021లో కేంద్రం జారీచేసిన మార్గదర్శకాలకు విరుద్ధంగా ఉన్నాయని, బీఆర్‌ఎస్‌ నేతలపై నిరాధార ఆరోపణలు రాకుండా నిరోధించాల్సిన అవసరం ఉన్నదని పిటిషనర్‌ తరఫున సీనియర్‌ న్యాయవాది బీ మయూర్‌రెడ్డి వివరించారు. ఈ విషయమై గత నెల 25న కేంద్రానికి వినతిపత్రం ఇచ్చినా ఎలాంటి చర్యలు చేపట్టలేదని తెలిపారు. బీఆర్‌ఎస్‌ నేతల ప్రతిష్ఠను దెబ్బతీసేలా ఉన్న సమాచారాన్ని గూగుల్‌, యూట్యూబ్‌ నుంచి తొలగించాలని, లేదంటే ఆ సమాచారం ఇతరులకు అందుబాటులో లేకుండా నియంత్రించేలా ఆయా సంస్థలకు ఉత్తర్వులు ఇవ్వాలని కోరారు. దీంతో బీఆర్‌ఎస్‌ వినతిపత్రంపై చట్టప్రకారం చర్యలు చేపట్టాలని హైకోర్టు కేంద్రాన్ని ఆదేశించింది.