Visit:
హైదరాబాద్, సెప్టెంబర్ 22 (నమస్తే తెలంగాణ): వినాయక చవితి ఉత్సవాలు, గణేశ విగ్రహాల నిమజ్జనం సందర్భంగా హైదరాబాద్, సికింద్రాబాద్తోపాటు పరిసర ప్రాంతాల్లో శబ్ద కాలుష్య నియంత్రణ, ట్రాఫిక్ సమస్యల నివారణ, శాంతి భద్రతల పరిరక్షణ కోసం చేపట్టిన చర్యలపై ఈ నెల 24లోగా ప్రాథమిక నివేదిక సమర్పించాలని హైకోర్టు రాష్ట్ర హోంశాఖను ఆదేశించింది. నిరుడు ఆగస్టు 26న తాము జారీచేసిన మార్గదర్శకాలను ఏటా అమలు చేయాల్సిందేనని స్పష్టం చేసింది.
నిరుటి ఆదేశాలకు విరుద్ధంగా ఈ నెల 13, 16న గణేశ మండపాల నిర్వాహకులు విపరీతమైన శబ్దంతో డీజేలు పెట్టడంతోపాటు, వాహన రాకపోకలకు అంతరాయం కలిగించారని పేర్కొంటూ నిర్మల్కు చెందిన దామోదర్రెడ్డి, మరొకరు పోలీసులపై కోర్టు ధిక్కరణ పిటిషన్ దాఖలు చేయడంతో జస్టిస్ ఎన్వీ శ్రవణ్ కుమార్ మంగళవారం ఈ ఆదేశాలు జారీచేశారు.
