Visit:
సిద్దిపేట, నవంబర్‌ 29( నమస్తే తెలంగాణ ప్రతినిధి): ‘కేసీఆర్‌ ఆమరణ నిరాహార దీక్ష ఒక చరిత్ర.. ఆయన ఆమరణ దీక్ష, అమరుల త్యాగఫలంతో ప్రత్యేక తెలంగాణ రాష్ట్ర కల సాకారమైంది’ అని మాజీ మంత్రి, సిద్దిపేట ఎమ్మెల్యే హరీశ్‌రావు తెలిపారు. నాడు సిద్దిపేటలోని అంబేద్కర్‌ భవన్‌లో జరిగిన సమావేశంలోనే నవంబర్‌ 29న తాను సిద్దిపేటలో ఆమరణ దీక్షకు పూనుకోనున్నట్టు కేసీఆర్‌ ప్రకటించారని తెలిపారు. ‘2001లో కోనాయిపల్లి వేంకటేశ్వరస్వామి ఆలయంలో పూజలు చేసి గులాబీ జెండాను ఎత్తడం ఒక చరిత్ర. 2001లో సిద్దిపేట ఉపఎన్నికల్లో ఆనాటి అధికార పార్టీ ధన ప్రవాహాన్ని, అధికార దుర్వినియోగాన్ని తిప్పకొట్టి కేసీఆర్‌ను గెలిపించిన గడ్డ సిద్దిపేట’ అని కొనియాడారు. శనివారం సిద్దిపేట పట్టణంలోని బీఆర్‌ఎస్‌ జిల్లా కార్యాలయంలో దీక్షాదివస్‌ కార్యక్రమాన్ని ఘనంగా నిర్వహించారు. బీఆర్‌ఎస్‌ జిల్లా అధ్యక్షుడు, దుబ్బాక ఎమ్మెల్యే కొత్త ప్రభాకర్‌రెడ్డి అధ్యక్షతన ఈ కార్యక్రమం జరిగింది. ఎమ్మెల్సీలు దేశపతి శ్రీనివాస్‌, యాదవరెడ్డి, ఎఫ్‌డీసీ మాజీ చైర్మన్‌ వంటేరు ప్రతాప్‌రెడ్డి, నాయకులు వేలేటి రాధాకృష్ణశర్మ పార్టీ శ్రేణులతో కలిసి హరీశ్‌రావు పాల్గొన్నారు. ఇటీవల మరణించిన ఉద్యమకారుడు అందెశ్రీకి తొలుత నివాళులు అర్పించారు.
అనంతరం సభలో హరీశ్‌రావు మాట్లాడారు. కేసీఆర్‌ 11 రోజులపాటు ప్రాణాన్ని సైతం లెక్క చేయకుండా ఆమరణ దీక్ష చేసి తెలంగాణ రాష్ర్టాన్ని సాధించారని తెలిపారు. ‘తెలంగాణ వచ్చేదాకా నా ప్రాణం పోదు’ అని కేసీఆర్‌ తనకు ధైర్యం చెప్పారని గుర్తుచేశారు. ‘నేను సచ్చిపోను.. ఒకవేళ చస్తే నా శవంపై తెలంగాణ జెండా కప్పాలి’ అని కేసీఆర్‌ ఆనాడు చెప్పారని తెలిపారు. కేసీఆర్‌ ఆమరణ దీక్షపై కొందరు ఉద్యమ ద్రోహులు ప్రేలాపనలు పేలుతున్నారని ధ్వజమెత్తారు. జయశంకర్‌ సార్‌, మందకృష్ణ, విద్యాసాగర్‌రావుతోపాటు పార్టీ శ్రేణులందరికీ కేసీఆర్‌ చిత్తశుద్ధి తెలుసని గుర్తుచేశారు. సీఎం రేవంత్‌రెడ్డి, పీసీసీ చీఫ్‌ మహేశ్‌గౌడ్‌ తెలంగాణ ఉద్యమంలో ఎక్కడ ఉన్నారని ప్రశ్నించారు. కేసీఆర్‌ ప్రత్యేక రాష్ట్రం తేవడం వల్లే వారిద్దరికీ, ఇతర మంత్రులకు పదవులు దక్కాయన్న విషయాన్ని మరువొద్దని గుర్తుచేశారు.
కాంగ్రెస్‌ ముమ్మాటికీ తెలంగాణ ద్రోహి: మధుసూదనాచారి
హనుమకొండ చౌరస్తా ; కాంగ్రెస్‌ పార్టీ ముమ్మాటికి తెలంగాణ ద్రోహి అని శాసనమండలిలో ప్రతిపక్ష నేత సిరికొండ మధుసూదనాచారి మండిపడ్డారు. మాజీ ఎమ్మెల్యే దాస్యం వినయ్‌భాస్కర్‌ ఆధ్వర్యంలో శనివారం హనుమకొండలోని కాళోజీ విగ్రహం వద్ద దీక్షాదివస్‌ కార్యక్రమాన్ని నిర్వహించారు. ఈ సందర్భంగా మధుసూదనాచారి మాట్లాడుతూ ఏనాడు జై తెలంగాణ అనని పాపాల రేవంత్‌రెడ్డి ముఖ్యమంత్రి అయ్యాడని ఎద్దేవా చేశారు. కార్యక్రమంలో మాజీ ఎంపీ కెప్టెన్‌ లక్ష్మీకాంతారావు, మాజీ ఎమ్మెల్యేలు చల్లా ధర్మారెడ్డి, వొడితల సతీశ్‌బాబు, నాగుర్ల వెంకటేశ్వర్లు, లింగంపెల్లి కిషన్‌రెడ్డి, మర్రి యాదవరెడ్డి, ఎల్లావుల లలితాయాదవ్‌ తదితరులు పాల్గొన్నారు.
రంగారెడ్డి ; తెలంగాణ రాష్ట్ర సాధనకోసం చావుకైనా సిద్ధపడిన వ్యక్తి కేసీఆర్‌ అని మాజీమంత్రి సబితాఇంద్రారెడ్డి పేర్కొన్నారు. శనివారం శంషాబాద్‌లోని రంగారెడ్డి జిల్లా పార్టీ కార్యాలయంలో అధ్యక్షుడు మంచిరెడ్డి కిషన్‌రెడ్డి అధ్యక్షతన నిర్వహించిన దీక్షాదివస్‌ కార్యక్రమంలో ఆమె పాల్గొన్నారు. ఈ సందర్భంగా సబిత మాట్లాడుతూ కేంద్రం మెడలు వంచి తెలంగాణ రాష్ర్టాన్ని సాధించిన మహోన్నత వ్యక్తి కేసీఆర్‌ అని పేర్కొన్నారు.
మళ్లీ వంద సీట్లతో కేసీఆర్‌ సీఎం: గంగుల
కరీంనగర్‌ కార్పొరేషన్‌ ; తెలంగాణలో రాబోయేది బీఆర్‌ఎస్‌ ప్రభుత్వమేనని, మళ్లీ వంద సీట్లతో కేసీఆర్‌ సీఎం కావడం ఖాయమని మాజీ మంత్రి, ఎమ్మెల్యే గంగుల కమలాకర్‌ ధీమా వ్యక్తం చేశారు. ‘రామరాజ్యం ఏర్పాటు కావాలంటే.. రాముడు వనవాసం చేయాల్సి వచ్చింది. తెలంగాణలో రామరాజ్యం కోసం ప్రస్తుతం కేసీఆర్‌ ఐదేండ్లు వనవాసం చేస్తున్నట్లుగానే భావించుకుందాం’ అని పేర్కొన్నారు. దీక్షా దివస్‌ను పురస్కరించుకొని శనివారం కరీంనగర్‌ జిల్లా కేంద్రంలోని పార్టీ కార్యాలయంలో వేడుకలు నిర్వహించారు. ఎమ్మెల్యే పాడి కౌశిక్‌రెడ్డి, సుంకె రవిశంకర్‌, రవీందర్‌సింగ్‌ తదితరులు పాల్గొన్నారు.
పాలమూరులో ఘనంగా దీక్షాదివస్‌
వనపర్తి (నమస్తే తెలంగాణ)/మహబూబ్‌నగర్‌ అర్బన్‌/గద్వాల, ; తెలంగాణ రాష్ట్ర సాధన కోసం నాడు కేసీఆర్‌ ప్రాణాలకు తెగించి చేసిన పోరాటాన్ని గుర్తుచేసుకుంటూ ఉమ్మడి మహబూబ్‌నగర్‌ జిల్లాలో దీక్షా దివస్‌ ఘనంగా నిర్వహించారు. వనపర్తి జిల్లా కేంద్రంలో మాజీ మంత్రి నిరంజన్‌రెడ్డి, పాలమూరులో మాజీ మంత్రులు శ్రీనివాస్‌గౌడ్‌, లక్ష్మారెడ్డి ఆధ్వర్యంలో నిర్వహించారు. నారాయణపేటలో మాజీ ఎమ్మెల్యేలు రాజేందర్‌రెడ్డి, చిట్టెం రామ్మోహన్‌రెడ్డి, పట్నం నరేందర్‌రెడ్డి, నాగర్‌కర్నూల్‌లో మాజీ ఎమ్మెల్యేలు మర్రి జనార్దన్‌రెడ్డి, బీరం హర్షవర్ధన్‌రెడ్డి, జోగుళాంబ గద్వాలలో ఎమ్మెల్యే విజయుడు, ఆంజనేయగౌడ్‌, బాసు హనుమంతు దీక్షా దివస్‌లో పాల్గొన్నారు.
దీక్షాదివస్‌తోనే దిగొచ్చిన కేంద్రం: ఎర్రబెల్లి
పర్వతగిరి ; దీక్షాదివస్‌తోనే ఆనాటి కేంద్రంలోని కాంగ్రెస్‌ ప్రభుత్వ వెన్నులో వణుకు పుట్టిందని మాజీ మంత్రి ఎర్రబెల్లి దయాకర్‌రావు అన్నారు. శనివారం వరంగల్‌ జిల్లా పర్వతగిరి మండల కేంద్రంలో ఉద్యమ నేత కేసీఆర్‌ చిత్రపటానికి క్షీరాభిషేకం చేశారు. ఈ సందర్భంగా ఎర్రబెల్లి మాట్లాడుతూ కేసీఆర్‌ సచ్చుడో-తెలంగాణ వచ్చుడో అంటూ కేసీఆర్‌ చావు నోట్లో తలపెట్టి ప్రత్యేక తెలంగాణ రాష్ర్టాన్ని సాధించారని గుర్తుచేశారు.
లక్ష్యాన్ని ఛేదించిన కేసీఆర్‌ ఉద్యమం: సత్యవతి
మహబూబాబాద్‌ ; దేశంలో ఎంతోమంది నాయకులు ఉద్యమాలు చేశారని, లక్ష్యాన్నిచేరుకునేలా ఉద్యమం చేసిన ఒకే ఒక నాయకుడు కేసీఆర్‌ అని మాజీ మంత్రి సత్యవతి రాథోడ్‌ కొనియాడారు. మహబూబాబాద్‌ జిల్లా కేంద్రంలోని బీఆర్‌ఎస్‌ కార్యాలయంలో దీక్షాదివస్‌ను పార్టీ జిల్లా అధ్యక్షురాలు, మాజీ ఎంపీ మాలోత్‌ కవిత అధ్యక్షతన నిర్వహించారు. కార్యక్రమంలో ఎమ్మెల్సీ తకళ్లపల్లి, రెడ్యానాయక్‌, శంకర్‌ నాయక్‌ పాల్గొన్నారు.
తెలంగాణలో లూటీ, లాఠీ పాలన: జగదీశ్‌రెడ్డి
యాదాద్రి భువనగిరి ; తెలంగాణలో లూటీ, లాఠీ పాలన కొనసాగుతున్నదని మాజీ మంత్రి, ఎమ్మెల్యే జగదీశ్‌రెడ్డి విమర్శించారు. యాదాద్రి భువనగిరి జిల్లా కేంద్రంలో దీక్షా దివస్‌ను ఘనంగా నిర్వహించారు. ఈ సందర్భంగా జగదీశ్‌రెడ్డి మాట్లాడుతూ దీక్షాదివస్‌ మనందరికీ స్వాతంత్య్రం తెచ్చిన రోజు అని, దేశానికి ఆగస్టు 15వ తేదీ ఎలాగో.. నవంబర్‌ 29వ తేదీ కూడా అలాగే అని చెప్పారు. కార్యక్రమంలో మాజీ ఎమ్మెల్యేలు సునీత, పైళ్ల, కూసుకుంట్ల, నేతలు రాకేశ్‌రెడ్డి, జిల్లా నేతలు తదితరులు పాల్గొన్నారు.
పోరాట యోధుడు కేసీఆర్‌: మల్లారెడ్డి
పీర్జాదిగూడ ; బీఆర్‌ఎస్‌ పాలనలో రాష్ట్రం దేశంలోనే అగ్రభాగాన నిలిచిందని మాజీ మంత్రి, ఎమ్మెల్యే మల్లారెడ్డి చెప్పారు. పీర్జాదిగూడ మున్సిపల్‌ కార్పొరేషన్‌ పరిధిలో నిర్వహించిన దీక్షాదివస్‌లో మాజీ మేయర్‌ జక్కా వెంకట్‌రెడ్డితో కలిసి ఆయన పాల్గొన్నారు. అమరులస్తూపానికి నివాళులర్పించిన తర్వాత మల్లారెడ్డి మాట్లాడుతూ చావును సైతం లెక్కచేయకుండా పోరాటం చేసిన యోధుడు కేసీఆర్‌ అని కొనియాడారు.
రేవంత్‌కు ఉద్యమ చరిత్ర లేదు: వేముల
నిజామాబాద్‌ ; తెలంగాణ ఉద్యమంతో సంబంధం లేని వ్యక్తులు నేడు పాలకులుగా చలామణి అవుతుండటం దురదృష్టకరమని మాజీ మంత్రి, ఎమ్మెల్యే వేముల ప్రశాంత్‌రెడ్డి దుయ్యబట్టారు. సీఎం, ఉపముఖ్యమంత్రి, పీసీసీ చీఫ్‌కు ఉద్యమంతో సంబంధం లేదన్నారు. నిజామాబాద్‌ జిల్లా బీఆర్‌ఎస్‌ పార్టీ కార్యాలయంలో దీక్షా దివస్‌ను ఘనంగా నిర్వహించారు. ఆశన్నగారి జీవన్‌రెడ్డి, బిగాల గణేష్‌ గుప్తా, వీజీ గౌడ్‌ తదితరులు పాల్గొన్నారు.
మహేశ్‌గౌడ్‌.. ఉద్యమ సమయంలో ఎక్కడున్నవ్‌: కొప్పుల
పెద్దపల్లి ; తెలంగాణ ఉద్యమ సమయంలో టీపీసీసీ అధ్యక్షుడు మహేశ్‌కుమార్‌గౌడ్‌ ఎక్కడున్నాడో చెప్పాలని మాజీ మంత్రి కొప్పుల ఈశ్వర్‌ ధ్వజమెత్తారు. శనివారం పెద్దపల్లి జిల్లా కేంద్రంలోని బీఆర్‌ఎస్‌ కార్యాలయంలో పార్టీ జిల్లా అధ్యక్షుడు, మాజీ ఎమ్మెల్యే కోరుకంటి చందర్‌ అధ్యక్షతన ‘దీక్షా దివస్‌’ నిర్వహించారు. అమరులస్తూపం వద్ద కొప్పుల ఈశ్వర్‌, మాజీ ఎమ్మెల్యేలు దాసరి మనోహర్‌రెడ్డి, పుట్ట మధూకర్‌ తదితరులు నివాళులర్పించారు.
కేసీఆర్‌ దీక్ష చారిత్రక ఘట్టం: వద్దిరాజు
భద్రాద్రి కొత్తగూడెం ; తెలంగాణ రాష్ట్ర సాధన కోసం తన ప్రాణాలను సైతం లెక్క చేయకుండా అలుపెరుగని పోరాటం చేసింది కేసీఆరేనని ఎంపీ వద్దిరాజు రవిచంద్ర చెప్పారు. ఆయన పట్టుదలతో చేపట్టిన దీక్ష ఒక చారిత్రక ఘట్టమని పేర్కొన్నారు. దీక్షా దివస్‌ సందర్భంగా భద్రాద్రి కొత్తగూడెం జిల్లా పార్టీ కార్యాలయంలో సభ ఏర్పాటు చేశారు. ఇందులో పార్టీ జిల్లా అధ్యక్షుడు రేగా కాంతారావు, వనమా వెంకటేశ్వరరావు, మెచ్చా నాగేశ్వరరావు, బానోత్‌ హరిప్రియానాయక్‌ తదితరులు పాల్గొన్నారు.
దీక్షాదివస్‌తోనే తెలంగాణ: జోగు రామన్న
ఆదిలాబాద్‌ ; మాజీ ముఖ్యమంత్రి, ఉద్యమ నాయకుడు కేసీఆర్‌ చేపట్టిన దీక్షా దివస్‌తోనే తెలంగాణ రాష్ట్రం సిద్ధించిందని మాజీ మంత్రి జోగు రామన్న చెప్పారు. శనివారం ఆదిలాబాద్‌ జిల్లా బీఆర్‌ఎస్‌ పార్టీ కార్యాలయంలో దీక్షా దివస్‌ నిర్వహించి తెలంగాణ తల్లి విగ్రహానికి పూలమాల వేశారు. ఈ సందర్భంగా జోగు రామన్న మాట్లాడుతూ కేసీఆర్‌ నాడు సీఎం హోదాలో రాష్ర్టాన్ని అన్ని రంగాల్లో అభివృద్ధి చేసి దేశంలోనే అగ్రస్థానంలో నిలిపారని చెప్పారు. కార్యక్రమంలో బోథ్‌ ఎమ్మెల్యే అనిల్‌ జాదవ్‌, బీఆర్‌ఎస్‌ నాయకులు యూనిస్‌ అక్బానీ, మనోహర్‌, సాజిదుద్దీన్‌, మెట్టు ప్రహ్లాద్‌, కిరణ్‌ పాల్గొన్నారు.
మూడేళ్లలో అధికారం మనదే: పువ్వాడ
మామిళ్లగూడెం ; వచ్చే మూడేండ్లలో మళ్లీ వచ్చేది బీఆర్‌ఎస్‌ ప్రభుత్వమేనని మాజీ మంత్రి పువ్వాడ అజయ్‌కుమార్‌ ధీమా వ్యక్తం చేశారు. శనివారం ఖమ్మంలో దీక్షా దివస్‌ కార్యక్రమాన్ని చేపట్టారు. బీఆర్‌ఎస్‌ జిల్లా కార్యాలయంలో ఏర్పాటు చేసిన కేసీఆర్‌ దీక్షాదివస్‌ చిత్రపటానికి పార్టీ జిల్లా అధ్యక్షుడు తాతా మధుసూదన్‌, పువ్వాడ అజయ్‌కుమార్‌, మాజీ ఎమ్మెల్యేలు సండ్ర వెంకటవీరయ్య, కందాల ఉపేందర్‌రెడ్డి, బానోత్‌ చంద్రావతి,జడ్పీ మాజీ చైర్మన్‌ లింగాల కమల్‌రాజు క్షీరాభిషేకం చేశారు.
