రాష్ట్రంలో ప్రభుత్వ ఉద్యోగాల జాతర కొనసాగుతున్నది. ఉద్యోగ ఖాళీల భర్తీని శరవేగంగా పూర్తిచేసేందుకు ప్రయత్నిస్తున్న రాష్ట్ర ప్రభుత్వం నిరుద్యోగులకు నూతన సంవత్సర కానుకగా మరో శుభవార్తను ప్రకటించింది. 80వేలకు పైగా ఉద్యోగాలు భర్తీ చేస్తామన్న సీఎం కేసీఆర్ ప్రకటనతో మొదలైన కొలువుల జాతరలో భాగంగా వరుసగా మూడో రోజు 6,569 పోస్టుల భర్తీకి రెండు నోటిఫికేషన్లు విడుదలయ్యాయి. గ్రూప్-3లో 1,365 పోస్టుల భర్తీకి తెలంగాణ పబ్లిక్ సర్వీస్ కమిషన్ (టీఎస్పీఎస్సీ) నోటిఫికేషన్ జారీ చేయగా, వైద్యారోగ్యశాఖలో 5,204 స్టాఫ్ నర్స్ పోస్టుల భర్తీకి మెడికల్ హెల్త్ సర్వీసెస్ రిక్రూట్మెంట్ బోర్డు శుక్రవారం నోటిఫికేషన్ విడుదల చేసింది. గ్రూప్-3 ఉద్యోగాల కోసం జనవరి 24 నుంచి ఫిబ్రవరి 23 వరకు దరఖాస్తులు స్వీకరించనున్నారు. కాగా, స్టాఫ్ నర్స్ పోస్టుల భర్తీకి జనవరి 25 నుంచి ఫిబ్రవరి 15 వరకు దరఖాస్తు చేసుకొనేందుకు గడువు విధించారు.
హైదరాబాద్, డిసెంబర్ 30 (నమస్తే తెలంగాణ): వరుస ఉద్యోగ ప్రకటనలతో దూసుకుపోతున్న తెలంగాణ పబ్లిక్ సర్వీస్ కమిషన్ (టీఎస్పీఎస్సీ) శుక్రవారం 1,365 పోస్టులతో గ్రూప్ 3 నోటిఫికేషన్ జారీ చేసింది. జనవరి 24 నుంచి ఫిబ్రవరి 23 వరకు దరఖాస్తులు స్వీకరించనున్నట్టు టీఎస్పీఎస్సీ సెక్రటరీ అనితా రామచంద్రన్ తెలిపారు. వివ రాలకు https:// www.tspsc.gov.in వెబ్సైట్లో సంప్రదించాలని సూచించారు. గ్రూప్ 3లో ఆర్థిక శాఖలోనే అత్యధికంగా 712 పోస్టులు ఉన్నాయి.
టీఎస్పీఎస్సీ ఇప్పటివరకూ 17,457 ఉద్యోగాలకు నోటిఫికేషన్ జారీచేసింది. ఏప్రిల్ 26న 503 పోస్టులతో గ్రూప్-1 తొలి నోటిఫికేషన్ ఇచ్చింది. ఆ తర్వాత డిసెంబర్ 1న గ్రూప్-4లో భాగంగా 9,168 ఉద్యోగాల భర్తీకి ప్రకటన జారీ చేసింది. ఇలా.. ఇప్పటి వరకు గ్రూప్ 1, 2, 3, 4 అన్ని నోటిఫికేషన్లు ఇచ్చేసింది. 9 నెలల్లోనే ఇన్ని ఉద్యోగాల భర్తీకి ప్రకటనలు జారీ చేయడం కమిషన్ చరిత్రలో ఇదే తొలిసారి.