విద్యార్థుల పోరు.. తోకముడిచిన సర్కార్‌!

విద్యార్థుల పోరాటం నేపథ్యంలో సురవరం ప్రతాపరెడ్డి తెలుగు విశ్వవిద్యాలయం నాంపల్లి ప్రాంగణాన్ని ప్రైవేట్‌ సంస్థకు అప్పగించాలన్న నిర్ణయంపై సర్కార్‌ వెనక్కి తగ్గిం ది.

• నాంపల్లి ప్రాంగణం ప్రైవేట్‌కు అప్పగింతపై యూటర్న్‌
• తాజా పరిణామాలపై వర్సిటీ అధికారులతో సంప్రదింపులు
• ప్రభుత్వానికి సమగ్ర నివేదిక అందజేసిన విశ్వవిద్యాలయం
• ప్రజల ఆస్తిని ప్రైవేట్‌కివ్వడంపై అభ్యంతరం తెలిపిన వర్సిటీ
• ‘ప్రైవేట్‌కు ఇవ్వబోం’ అని స్పష్టం చేసిన కాంగ్రెస్‌ సర్కార్‌
• తెలుగు యూనివర్సిటీ పరిరక్షణ సమితి హర్షాతిరేకం

హైదరాబాద్‌, జూలై 14(నమస్తే తెలంగాణ) : విద్యార్థుల పోరాటం నేపథ్యంలో సురవరం ప్రతాపరెడ్డి తెలుగు విశ్వవిద్యాలయం నాంపల్లి ప్రాంగణాన్ని ప్రైవేట్‌ సంస్థకు అప్పగించాలన్న నిర్ణయంపై సర్కార్‌ వెనక్కి తగ్గిం ది. ఉవ్వెత్తున ఎగిసిన విద్యార్థుల ఉద్యమం, మేధావులు, సాహితీవేత్తలు, తెలుగు భాషాభిమానుల నుంచి తీవ్ర వ్యతిరేకతతో ప్రభుత్వం వెనక్కి తగ్గింది. ప్రైవేట్‌ వ్యక్తులకిచ్చే ప్రతిపాదనను ఉపసంహరించుకున్నది. మంగళవారం వర్సిటీ అధికారులతో స చివాలయంలో సమీక్షించిన సర్కార్‌.. నాంప ల్లి ప్రాంగణాన్ని ఎట్టిపరిస్థితుల్లో ప్రైవేట్‌కు ఇ వ్వబోమని స్పష్టం చేసింది. విద్యార్థుల ప్రయోజనాలకు భంగం కలిగించే నిర్ణయాలు తీసుకోబోమని వెల్లడించింది. విద్యార్థులు ఆందోళన చెందవద్దని పేర్కొన్నది. అనంతరం వీసీ ఆచా ర్య నిత్యానందరావు నాంపల్లి ప్రాంగణంలోని దీక్షా శిబిరాన్ని సందర్శించి ప్రభుత్వ నిర్ణయా న్ని ప్రకటించారు. దీంతో వర్సిటీ పరిరక్షణ సమితి సభ్యులు హర్షం వ్యక్తంచేశారు.

15 రోజులుగా పోరాటం..

తెలుగు యూనివర్సిటీ నాంపల్లి ప్రాంగణాన్ని ప్రైవేట్‌ వ్యక్తులకు కట్టబెట్టనున్నారన్న వార్తలు కలకలం సృష్టించిన విషయం తెలిసిం దే. ఈ ప్రాంగణంలోని గ్రౌండ్‌ఫ్లోర్‌ను ఆద్యకళా మ్యూజియానికి కట్టబెట్టేందుకు ప్రయత్నాలపై విద్యార్థులు, అధ్యాపకులు, పూర్వ విద్యార్థులు, ప్రజాసంఘాలు ఆగ్రహం వ్యక్తంచేశాయి. క్యాంపస్‌లో ఆందోళనలు చేశాయి. అన్నివర్గాలు కలిసి పోరుబాట పట్టారు. ఏబీవీపీ సహా పలు విద్యార్థి సంఘాలు కలిసి 15 రోజులపాటు నాంపల్లి, బాచుపల్లి క్యాంపస్‌లలో ఉద్యమించారు. బోధన, బోధనేతర సిబ్బంది ఉద్యమానికి మద్దతు పలికారు.

సెక్రటేరియట్‌లో సంప్రదింపులు

తాజా పరిణామాలపై వర్సిటీ అధికారులు, ఇంటెలిజెన్స్‌ విభాగాలు సర్కార్‌కు వేర్వేరు నివేదికలు సమర్పించాయి. విద్యాశాఖ కార్యదర్శి యోగితారాణా సెక్రటేరియట్‌లో ఉన్నతస్థాయి సమావేశమై ఆ స్థలాన్ని ప్రైవేట్‌కు అప్పగింత వల్ల ఏర్పడే ప్రతికూలతలను ప్రభుత్వానికి నివేదించారు. సోమవారం ఇంటెలిజెన్స్‌ విభాగం నాంపల్లి ప్రాంగణాన్ని సందర్శించి స మగ్ర నివేదిక సర్కార్‌కు అందించింది. ఆద్యకళా మ్యూజియానికి కేటాయింపు ప్రతిపాదనను ఉపసంహరించుకోవాలని మంగళవారం విద్యాశాఖకు నివేదికను సమర్పించింది. నాంపల్లిలోని గ్రౌండ్‌ఫ్లోర్‌ను ఆది ధ్వని ఫౌండేషన్‌కు అప్పగించే విషయంపై పర్యాటక, సాంస్కృతికశాఖ స్పె షల్‌ సీఎస్‌ వాణీప్రసాద్‌ ఓ లేఖ రాయగా, ఈ లేఖపై యూనివర్సిటీ నివేదికను అందజేసింది. ఎట్టిపరిస్థితుల్లో నాంపల్లి ప్రాంగణాన్ని ప్రైవేట్‌ వ్యక్తులకు ఇవ్వడం కుదరదని నివేదికలో పేర్కొన్నది. విద్యార్థులు, కళాకారులు, అధ్యాపకులు తీవ్ర ఆగ్రహంగా ఉన్నట్టు సర్కార్‌కు సూచించింది. వీటిని పరిగణనలోకి తీసుకున్న సర్కార్‌, నాంపల్లి ప్రాంగణాన్ని ప్రైవేట్‌కు ఇవ్వడం లేదని స్పష్టతనిచ్చింది.

నివేదికలో ప్రస్తావించిన అంశాలు..

• నాంపల్లి క్యాంపస్‌ ఖాళీగా ఉందన్నది అవాస్తవం. ఇదే ప్రాంగణంలో 650 మంది రెగ్యులర్‌ విద్యార్థులు, వివిధ డిగ్రీ, పీజీ, డిప్లొమా, సర్టిఫికెట్‌ కోర్సులు చదువుతున్నారు. దూర విద్యాకేంద్రం ద్వారా 3వేల మందికి తరతగతులు, పరీక్షలు నిర్వహిస్తున్నాం.
• భవనంలో వీసీ, రిజిస్ట్రార్‌ కార్యాలయాలు ఉన్నాయి. లీగల్‌ సెల్‌, పీఆర్‌వో, గ్రంథాలయం, కంప్యూటర్‌ సెల్‌, మ్యూజియం, ఆడిటోరియం, ఆర్ట్‌ గ్యాలరీ ఉన్నాయి. దీనిని ప్రైవేట్‌ సంస్థకు కేటాయించే పరిస్థితులు ఏమాత్రం లేవు.
• ప్రొఫెసర్‌ జయధీర్‌ తిరుమలరావు ఇప్పటికే వర్సిటీలో ఐదారు గదులను తాను సేకరించిన వస్తువుల కోసం ఉపయోగిస్తున్నారు. ఆ వస్తువులు విలువైనవైతే విశ్వవిద్యాలయ మ్యూజి యం, ప్రభుత్వ మ్యూజియాలకు అప్పగించవచ్చు కదా?
• స్టేట్‌ మ్యూజియం, ఆర్ట్‌ గ్యాలరీ, ట్రైబల్‌ మ్యూజియం, బంజారా మ్యూజియం, సమ్మక్క-సారలమ్మ మ్యూజియం వంటి వాటిల్లో స్థలమున్నది. వాటిల్లో ఆద్యకళా మ్యూజియం ఏర్పాటుచేసే అవకాశమున్నది. అయినా వర్సిటీ ప్రాంగణాన్ని ఇవ్వాలనడం అసంబద్ధం.
• తెలుగు లలిత కళాతోరణం(ఓపెన్‌ ఎయిర్‌ థియేటర్‌) స్థలాన్ని ప్రత్యామ్నాయంగా వాడుకునే అవకాశమున్నది. కానీ తెలుగు వర్సిటీ ప్రాంగణమే కావాలని పట్టుబట్టడం సబబుకాదు.
• సీఎం రేవంత్‌, వర్సిటీకి సురవరం ప్రతాపరెడ్డి పేరు పెట్టి ప్రాధాన్యతనిచ్చారు. ఈ నేపథ్యంలో ప్రైవేట్‌ సంస్థకు ప్రాంగణం కేటాయించి, వర్సిటీ కార్యకలాపాలకు ఆటంకం కలిగించడం మంచిదికాదు.

తెలుగు వర్సిటీ పరిరక్షణ సమితి హర్షం

తెలుగు యూనివర్సిటీ, జూలై 14 : తెలుగు యూనివర్సిటీ నాంపల్లి ప్రాంగణంలో 15 రోజులుగా నెలకొన్న ఉద్రిక్తతలకు తెరపడింది. మంగళవారం సచివాలయంలో ఉన్నత విద్యాశాఖ అధికారులు, తెలుగు వర్సిటీ వీసీ నిత్యానందరావు మధ్య జరిగిన సుదీర్ఘ చర్చల అనంతరం ప్రైవేట్‌ సంస్థలు, వ్యక్తులకు వర్సిటీలో చోటులేదని ప్రభుత్వం స్పష్టంచేసింది. దీంతో వర్సిటీ విద్యార్థులు, అధ్యాపకులు, బోధన, బోధనేతర సిబ్బంది, విద్యార్థి సంఘాలు హర్షం వ్యక్తంచేశాయి. ఈ సందర్భంగా ఏబీవీపీ ఆలిండియా యూనివర్సిటీస్‌ స్టేట్‌ కో-కన్వీనర్‌ కమల్‌ సురేశ్‌ మాట్లాడుతూ.. నాంపల్లి ప్రాంగణంలో తిరుమలరావుకు సంబంధించిన వస్తువులను వెంటనే ఖాళీ చేయించాలని వీసీని కోరారు. విశ్వవిద్యాలయాలు పరిశోధనా కేంద్రాలుగా కొనసాగాలే తప్ప, ప్రైవేట్‌ వ్యక్తులు, సంస్థల కార్యక్రమాలకు వినియోగించరాదని స్పష్టంచేశారు.