Godavari water | గోదావరి జలాలు విడుదల చేయాలని పురుగుల మందు డబ్బాలతో రైతుల ధర్నా

యేనే చెరువును గోదావరి జలాలతో నింపాలని డిమాండ్ చేస్తూ రైతులు రోడ్డుపై పురుగుల మందు డబ్బాలతో బైఠాయించి ఆందోళన చేపట్టడంతో ఉద్రిక్తత నెలకొంది.

జనగామ రూరల్ : యేనే చెరువును గోదావరి జలాలతో నింపాలని డిమాండ్ చేస్తూ రైతులు రోడ్డుపై పురుగుల మందు డబ్బాలతో బైఠాయించి ఆందోళన చేపట్టడంతో ఉద్రిక్తత నెలకొంది. జనగామ – హుస్నాబాద్ ప్రధాన రహదారిపై జనగామ మండలంలోని వడ్లకొండ గ్రామం వద్ద రైతులు ఆందోళనకు దిగారు. ఈ సందర్భంగా వారు మాట్లాడుతూ.. గత కొన్నేళ్లుగా నీళ్లు లేక భూములు బీడుగా మారి పంటలు ఎండిపోతున్నాయని, అధికారులు స్పందించి నీళ్లు విడుదల చేయాలన్నారు.

రైతుల నిరసనతో రోడ్డుపై భారీగా వాహనాలు నిలిచిపోయి ట్రాఫిక్‌కు అంతరాయం ఏర్పడింది. సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని అదుపులోకి తెచ్చే ప్రయత్నం చేశారు. ఎండిపోయిన పంటలకు వెంటనే నష్టపరిహారం చెల్లించాలని, లేనిపక్షంలో ఆందోళనను మరింత ఉధృతం చేస్తామని రైతులు హెచ్చరించారు.