Visit:
హైదరాబాద్‌, నవంబర్‌ 28 (నమస్తే తెలంగాణ): పంచాయతీ ఎన్నికల బరిలో నిలిచే అభ్యర్థులకు కేటాయించే ఉచిత గుర్తులను రాష్ట్ర ఎన్నికల కమిషన్‌ జారీచేసినట్టు తెలిసింది. సర్పంచ్‌ అభ్యర్థులకు 30, వార్డు సభ్యుల అభ్యర్థులకు 20 చొప్పున గుర్తులను కేటాయించినట్టు సమాచారం. తెలంగాణ పంచాయతీరాజ్‌ చట్టం-2018 ప్రకారం.. సెక్షన్‌ 200 కింద సర్పంచ్‌, వార్డు అభ్యర్థులను ఎన్నుకునేందుకు ఉచిత గుర్తులను ప్రకటిస్తూ నోటిఫికేషన్‌ జారీచేసిందని తెలిసింది. బ్యాలెట్‌లో అభ్యర్థుల జాబితాలో చివరన నోటా గుర్తు కూడా ఉంటుంది.
అభ్యర్థుల్లో ఎవరూ కూడా నచ్చకపోతే నోటా (నన్‌ ఆఫ్‌ ది ఎబో) ఆప్షన్‌ను ఓటర్లు ఎన్నుకోవచ్చు. తొలి విడత నామినేషన్ల ప్రక్రియ శనివారం సాయంత్రం 5 గంటలతో ముగియనున్నది. నామినేషన్ల ప్రక్రియ, అప్పీళ్ల స్వీకరణ పరిష్కారం వంటి ప్రక్రియలు పూర్తయిన తర్వాత డిసెంబర్‌ 3న అభ్యర్థుల తుది జాబితా ప్రకటిస్తారు. అదేరోజు బరిలో నిలిచిన అభ్యర్థులకు గుర్తులను కేటాయిస్తారు. సోషల్‌ మీడియాలో ఫ్రీ సింబల్స్‌ పేరుతో అనేక గుర్తులు ప్రచారంలోకి వస్తుండటంతో వాటిని నియంత్రించేందుకు, అపోహలను తొలగించేందుకు ఎస్‌ఈసీ 2023 డిసెంబర్‌లో సిద్ధంచేసి పెట్టిన గుర్తులను తాజాగా విడుదల చేసింది.
సర్పంచ్‌ అభ్యర్థులకు ఈసారి 30 గుర్తులను కేటాయించారు. వీటిలో ఉంగరం, కత్తెర, బ్యాట్‌, ఫుట్‌బాల్‌, లేడీపర్సు, టీవీ రిమోట్‌, టూత్‌పేస్ట్‌, స్పానర్‌, చెత్తడబ్బ, నల్లబోర్డు, బెండకాయ, కొబ్బరితోట, వజ్రం, బకెట్‌, డోర్‌ హ్యాండిల్‌, టీ జల్లెడ, చేతికర్ర, మంచం, పలక, టేబుల్‌, బ్యాటరీ లైట్‌, బ్రష్‌, బ్యాట్స్‌మాన్‌, మనిషి తెరచాప పడవ, బిస్కట్‌, వేణువు (పిల్లనగ్రోవి), చెయిన్‌ (గొలుసు), చెప్పులు, బెలూన్‌, వికెట్లు ఉన్నాయి.
వార్డు అభ్యర్థులకు మాత్రం 20 గుర్తులను ఎస్‌ఈసీ అధికారులు కేటాయించారు. వీటిలో గౌను, గ్యాస్‌స్టవ్‌, స్టూల్‌, గ్యాస్‌ సిలిండర్‌, బీరువా, విజిల్‌, కుండ, డిష్‌ యాంటినా, గరాటా (గౌరా), మూకుడు, ఐస్‌క్రీమ్‌, గాజు గ్లాసు, పోస్టు డబ్బా, ఎన్వోలప్‌ కవర్‌, హాకీ బ్యాట్‌ బంతి, నెక్‌ టై, కట్టింగ్‌ ప్లేయర్‌, పెట్టె, విద్యుత్తు స్తంభం, కెటిల్‌ ఉన్నాయి.
