Visit:
హైదరాబాద్‌: రాష్ట్రంలో మరోసారి పోలీసు అధికారులు బదిలీ (IPS Transfers) అయ్యారు. ఎనిమిది మంది ఐపీఎస్‌ అధికారులను బదిలీ చేస్తూ సీఎస్‌ శాంతి కుమారి ఉత్తర్వులు జారీచేశారు. హైదరాబాద్‌ క్రైమ్స్‌ అదనపు కమిషనర్‌గా విశ్వప్రసాద్‌, హైదరాబాద్‌ ట్రాఫిక్‌ జాయింట్‌ కమిషనర్‌గా జోయల్‌ డేవిస్‌, సైబరాబాద్‌ ట్రాఫిక్‌ జాయింట్‌ కమిషనర్‌గా గజరావు భూపాల్ ను ట్రాన్స్‌ఫర్‌ చేశారు.
సీఐడీ ఎస్పీగా నవీన్‌ కుమార్‌, సీఐడీ ఏడీసీగా రామ్‌రెడ్డి, ఇంటెలిజెన్స్‌ ఎస్పీగా శ్రీధర్‌, హైదరాబాద్‌ ఎస్బీ డీసీపీగా చైతన్యకుమార్‌, గవర్నర్‌ ఏడీసీగా శ్రీకాంత్‌ నియమితులయ్యారు.
కాగా, రాష్ట్రంలో విధులు నిర్వర్తిస్తున్న ఇద్దరు ఏపీ క్యాడర్‌ ఐపీఎస్‌ అధికారులను కేంద్ర హోంశాఖ ఆదేశాల మేరకు రాష్ట్ర ప్రభుత్వం రిలీవ్‌ చేసింది. రోడ్‌ సేఫ్టీ డీజీగా పనిచేస్తున్న అంజనీకుమార్‌, రాష్ట్ర పోలీస్‌ అకాడమీ డైరెక్టర్‌గా విధులు నిర్వర్తిస్తున్న డీజీ అభిలాష బిస్త్‌ను రిలీవ్‌ చేస్తూ సీఎస్‌ శాంతి కుమారి శనివారం ఉత్తర్వులు జారీ చేశారు.
తక్షణమే ఏపీ ప్రభుత్వానికి రిపోర్ట్‌ చేయాలని వారిని ఆదేశించారు. ఎమ్మెల్సీ ఎన్నికల కోడ్‌ ఉన్నందున కరీంనగర్‌ సీపీ అభిషేక్‌ మొహంతి రిలీవింగ్‌పై ఎన్నికల కమిషన్‌కు ప్రభుత్వం లేఖ రాసింది. ఈసీ నిర్ణయంపై ఆయన రిలీవింగ్‌ ఆధారపడి ఉంటుంది. రాష్ట్ర విభజన సందర్భంగా ఏపీకి కేటాయించిన కొందరు అధికారులు క్యాట్‌ ఉత్తర్వుల మేరకు తెలంగాణాలోనే పనిచేస్తున్నారు.
