ప్రజావాణి దరఖాస్తులకు ప్రాధాన్యమివ్వండి డీజీపీ జితేందర్‌

పోలీసులకు సంబంధించి ప్రజావాణిలో వచ్చే దరఖాస్తులకు కమిషనర్లు, ఎస్పీలు, పోలీసు ఉన్నతాధికారులు ప్రాధాన్యమివ్వాలని డీజీపీ జితేందర్‌ ఆదేశించారు.

హైదరాబాద్‌, జూలై 16 (నమస్తే తెలంగాణ) : పోలీసులకు సంబంధించి ప్రజావాణిలో వచ్చే దరఖాస్తులకు కమిషనర్లు, ఎస్పీలు, పోలీసు ఉన్నతాధికారులు ప్రాధాన్యమివ్వాలని డీజీపీ జితేందర్‌ ఆదేశించారు. ముఖ్యమంత్రి అధ్యక్షతన జరిగిన కలెక్టర్లు, ఎస్పీల సదస్సులో పాల్గొనేందుకు హైదరాబాద్‌కు వచ్చిన వారితో డీజీపీ ఆఫీసులో జితేందర్‌ ఉన్నతస్థాయి సమీక్ష నిర్వహించారు.

పోలీస్‌ స్టేషన్లలో వచ్చే ఫిర్యాదుల ఆధారంగా వెంటనే కేసులు నమోదు చేయాలని, ప్రజలతో మర్యాదపూర్వకంగా వ్యవహరించాలని సూచించారు. పోలీసు కమిషనర్లు, ఎస్పీలు తప్పనిసరిగా పోలీస్‌ స్టేషన్లలో ఆకస్మిక తనిఖీల చేయాలని ఆదేశించారు. తాను కూడా త్వరలోనే జిల్లాల వారీగా తనిఖీలు చేపడుతానని వెల్లడించారు.

హిస్టరీ షీట్‌లు సమీక్షించాలని, ఆయుధాల లైసెన్స్‌ జారీపై జాగ్రత్త వహించాలని, శాంతి భద్రతల నిర్వహణ, ఎస్సీ, ఎస్టీ, మహిళలకు సంబంధించిన కేసులను త్వరితగతిన పరిషరించాలని తెలిపారు. ‘నేను సైతం’ కార్యక్రమం ద్వారా ఏర్పాటు చేసిన సీసీ కెమెరాల పనితీరును పర్యవేక్షించడంతోపాటు రోడ్డు భద్రత ప్రాముఖ్యత, రాష్ట్రంలో డ్రగ్స్‌ అక్రమ రవాణాను అరికట్టాల్సిన అవసరాన్ని వివరించారు. స్టేషన్‌ హౌస్‌ఆఫీసర్ల పనితీరును అంచనా వేసేందుకు నేర సమీక్ష సమావేశాలు నిర్వహించాలని సూచించారు.