నెల రోజుల్లో 8 సెట్‌లు

ప్రవేశ పరీక్షల రోజులివి. ఈ మాసమంతా పరీక్షల షెడ్యూళ్లతో నిండిపోయింది. రాష్ట్రంలో ఈ నెల 10 నుంచి ఎంసెట్‌తో మొదలుకానున్న పరీక్షలు జూన్‌ 10 వరకు కొనసాగనున్నాయి. పాలిసెట్‌, ఎడ్‌సెట్‌, ఈసెట్‌ (రెండోసంవత్సరంలోకి), పీజీఈసెట్‌, లాసెట్‌, ఐసెట్‌, పీఈసెట్‌ పరీక్షలు ఈ నెలలోనే నిర్వహించనున్నారు.

• మే 10 నుంచి జూన్‌ 10 వరకు
• పరీక్షలు ముగియగానే ఫలితాలు
• జూన్‌, జూలైలో సీట్ల భర్తీ ప్రక్రియ
• 2024 పోస్టుల కోసం 7 పరీక్షలు

హైదరాబాద్‌, మే 1 (నమస్తే తెలంగాణ) : ప్రవేశ పరీక్షల రోజులివి. ఈ మాసమంతా పరీక్షల షెడ్యూళ్లతో నిండిపోయింది. రాష్ట్రంలో ఈ నెల 10 నుంచి ఎంసెట్‌తో మొదలుకానున్న పరీక్షలు జూన్‌ 10 వరకు కొనసాగనున్నాయి. పాలిసెట్‌, ఎడ్‌సెట్‌, ఈసెట్‌ (రెండోసంవత్సరంలోకి), పీజీఈసెట్‌, లాసెట్‌, ఐసెట్‌, పీఈసెట్‌ పరీక్షలు ఈ నెలలోనే నిర్వహించనున్నారు. దీంతో ఈ నెలను ప్రవేశాల మాసంగా అధికారులు వ్యవహరిస్తున్నారు. పరీక్షలు ముగిసిన తర్వాత ఫలితాలు ప్రకటించి, జూన్‌, జూలై మాసాల్లో సీట్ల భర్తీ ప్రక్రియను చేపడుతారు. ఈ నేపథ్యంలో పరీక్షల కౌన్సెలింగ్‌ షెడ్యూళ్లను రూపొందించడంపై ఉన్నత విద్యామండలి అధికారులు దృష్టిసారించనున్నారు.

సకాలంలో తరగతులు

కరోనాతో గత రెండేండ్లుగా ప్రవేశ పరీక్షలు ఆలస్యంగా జరుగుతుండగా, సీట్ల భర్తీ ఆలస్యమవుతున్నది. దీని ప్రభావం సెమిస్టర్‌ పరీక్షలపై పడి విద్యాసంవత్సరాన్ని పొడగించాల్సిన పరిస్థితులున్నాయి. ఇప్పుడు ముందుగానే షెడ్యూళ్లను ప్రకటించడంతో ఈ ఏడాది తరగతులు సకాలంలో ప్రారంభమవుతాయి. అంతేకాకుండా కోర్సులు పూర్తిచేసిన వారికి అనువైన సమయంలోనే సర్టిఫికెట్లు చేతికందనున్నాయి.