Visit:
హైదరాబాద్‌, నవంబర్‌ 29 (నమస్తే తెలంగాణ): కాంగ్రెస్‌ సర్కారు రాష్ర్టాన్ని అప్పుల ఊబిలోకి నెడుతున్నది. పరపతి బాండ్ల విక్రయం ద్వారా మరో రూ.ఆరువేల కోట్ల రుణం సేకరించేందుకు ప్రతిపాదించింది. ప్రస్తుత ఆర్థిక సంవత్సరం ముగియడానికి ఇంకా నాలుగు నెలలు మిగిలివుండగానే ఎఫ్‌ఆర్‌బీఎం పరిమితికి మించి అదనంగా రూ.ఆరువేల కోట్లు సేకరించింది. తాజాగా మరో రూ.ఆరువేల కోట్లు సేకరించేందుకు ఆర్బీఐకి ప్రతిపాదించింది. డిసెంబర్‌ 2న జరిగే వేలం ద్వారా ఈ నిధులు సేకరించనున్నారు. తాజా వేలంలో 13 రాష్ర్టాలు కలుపుకొని రూ.31,350 కోట్లు సేకరిస్తుండగా, అందులో అత్యధికంగా తెలంగాణ రూ.ఆరు వేల కోట్లు సేకరించనుండటం గమనార్హం. గత పాలకులు రాష్ర్టాన్ని అప్పుల ఊబిలోకి నెట్టారని పదేపదే ఆరోపిస్తున్న కాంగ్రెస్‌ సర్కారు.. రాష్ట్రంలో ఒక్కటి కూడా చెప్పుకోదగ్గ ప్రాజెక్టు చేపట్టకుండానే రాష్ర్టాన్ని రుణాల సుడిగుండంలోకి నెడుతున్నది.
రాష్ట్ర ప్రభుత్వం 2025-26 బడ్జెట్‌లో ఓపెన్‌ మార్కెట్లో పరపతి బాండ్ల విక్రయం ద్వారా రూ.54,009 కోట్లు సేకరిస్తామని ప్రతిపాదించింది. ఎఫ్‌ఆర్‌బీఎం కింద కేంద్ర ప్రభుత్వం సైతం మారెట్‌ రుణాల కింద 54,009 కోట్ల రుణాలకు అనుమతించింది. కాగా, మొదటి రెండు త్రైమాసికాల్లో (ఏప్రిల్‌-సెప్టెంబర్‌) రూ.48,000 కోట్లు రుణం తీసుకున్న రాష్ట్ర సర్కారు, మూడో త్రైమాసికంలో అక్టోబర్‌-డిసెంబర్‌ వరకు మరో రూ.9,600 కోట్లు తీసుకుంటామని ఆర్బీఐకి ప్రతిపాదించింది. ఇంకా డిసెంబర్‌ నెల ఉండగానే ఇప్పటికే రూ.ఐదువేల కోట్లు సేకరించి, తాజాగా మరో రూ.ఆరువేల కోట్లు సేకరించేందుకు ప్రతిపాదించడం విశేషం. దీంతో మొత్తం బాండ్ల ద్వారా రాష్ట్ర సర్కారు సేకరించిన రుణం రూ.66 వేల కోట్లకు చేరుకుంటుంది.
ఇది ఎఫ్‌ఆర్‌బీఎం పరిమితికి సుమారు రూ.12వేల కోట్లు అధికం. ఇంకా చివరి త్రైమాసికం మిగిలివుండగానే బడ్జెట్‌లో ప్రతిపాదిత రుణాలకన్నా అదనంగా రుణాలు తీసుకోవడం రాష్ట్ర ఆర్థిక పరిస్థితికి అద్దం పడుతున్నది. పదేండ్ల బీఆర్‌ఎస్‌ పాలనలో ఆర్థిక క్రమశిక్షణను పాటిస్తూ ఎఫ్‌ఆర్‌బీఎంసహా ఆర్బీఐ నిబంధనలకు లోబడి రుణాలు సేకరించి అనేక భారీ ప్రాజెక్టులను నిర్మించింది. దీనికి భిన్నంగా ప్రస్తుత కాంగ్రెస్‌ ప్రభుత్వం చెప్పుకోదగ్గ ప్రాజెక్టు ఒక్కటి కూడా చేపట్టకుండానే రాష్ర్టాన్ని అప్పుల ఊబిలోకి నెడుతున్నదనే విమర్శలు వినిపిస్తున్నాయి.
రాష్ట్రంలో కాంగ్రెస్‌ సర్కారు ఏర్పడి రెండేండ్లు అవుతున్నా ఇంతవరకు ఆరు గ్యారెంటీలను అమలు చేయకపోగా, ఒక్క అభివృద్ధి ప్రాజెక్టునైనా చేపట్టిన దాఖలాలు లేవు. సర్కారు భూములన్నీ అమ్ముకోవడమే కాకుండా తాజాగా హిల్ట్‌ పాలసీ పేరుతో ఏకంగా 22 పారిశ్రామికవాడలను గంపగుత్తగా ఎత్తేసేందుకు చర్యలు చేపట్టింది. ల్యాండ్‌ కన్వర్షన్‌ రైట్స్‌ ఇస్తామంటూ వేల కోట్ల రూపాయలు సమీకరించేందుకు సన్నాహాలు చేస్తున్నది. హౌసింగ్‌ బోర్డు, హెచ్‌ఎండీఏ, టీజీఐఐసీ తదితర సంస్థల ఆధీనంలోని విలువైన భూములను విక్రయిస్తున్న ప్రభుత్వం..
తద్వారా వస్తున్న నిధులను ఎటు మళ్లిస్తున్నదో అర్థం కావడంలేదని ఆర్థిక నిపుణులు ఆశ్చర్యం వ్యక్తంచేస్తున్నారు. ప్రస్తుత ఆర్థిక సంవత్సరంలో ఇప్పటివరకు తీసుకున్న అప్పులను చూస్తే, తెలంగాణ రాష్ట్ర ప్రభుత్వం సగటున రోజుకు దాదాపు రూ.250 కోట్లకుపైగా అప్పులు తీసుకుంటున్నట్టు స్పష్టమవుతున్నది. పరిస్థితి ఇలాగే కొనసాగితే వచ్చే మూడేండ్లలో రాష్ట్ర అప్పులు ఏ స్థాయికి చేరుతాయో.. రాష్ట్ర భవిష్యత్తు ఏ విధంగా ఉంటుందోననే ఆందోళన వ్యక్తమవుతున్నది.
